«Ալաշկերտ» – «Արարատ». Տեղեկություններ, որոնք մարզադաշտ այցելելու առիթ կդառնան

«ԱԼԱՇԿԵՐՏ»  – «ԱՐԱՐԱՏ»

20 խաղ,  +10=4-6, 32-25

3 նոյեմբերի, ժ.15:00, Երևան, «Ալաշկերտ»  մարզադաշտ

1-ին շրջան. 12.08.2017  «Ալաշկերտ»  – «Արարատ»՝  3-0 (1-0)
Միհրան Մանասյան (36, 63), Արթուր Եդիգարյան (75):

2-րդ շրջան. 27.09.2017  «Արարատ» – «Ալաշկերտ»՝  1-3 (1-0)
Ալեքսանդր Պետրոսյան (18) – Արտակ Եդիգարյան (75՝ 11մ), Ուրոշ Նենադովիչ (78, 90):

Առաջնության 2-րդ շրջանում տոնած 4 անընդմեջ հաղթանակների շնորհիվ «Ալաշկերտին» հաջողվել էր շրջանցել «Շիրակին»  ու գլխավորել մրցաշարային աղյուսակը: 2-րդ շրջանի ավարտական տուրում գանձասարցիներից կրած խոշոր հաշվով պարտությունը չսասանեց չեմպիոնի առաջատարի դիրքը:

Իսկ ահա նախորդ տուրում Գյումրիում «Շիրակի» հետ կայացած սկզբունքային մրցավեճում տոնած հաղթանակի շնորհիվ ալաշկերտցիներն ավելի ամրապնդեցին առաջատարի իրենց դիրքերը՝ 5 միավորով առաջ անցնելով շիրակցիներից ու գանձասարցիներից:

Ճիշտ է, Գյումրիում տոնած հաղթանակը թանկ նստեց «Ալաշկերտի»  վրա: Խաղից հետո տեղի ունեցած տհաճ միջադեպի պատճառով ՀՖՖ կարգապահական կոմիտեի որոշմամբ Աբրահամ Խաշմանյանը որակազրկվել է 10 խաղով, «Ալաշկերտ» ակումբը տուգանվել է 200 հազար դրամով:

Այնպես որ առաջիկա խաղում Արկադի Անդրեասյանի հետ միասին Աբրահամ Խաշմանյանն էլ իր սաների գործողությունները պետք է ղեկավարի տրիբունայից: Նշենք, որ այս որակազրկումն ընթացիկ առաջնությունում արդեն 2-րդն է Աբրահամ Խաշմանյանի համար: Մինչ այդ նա պատժվել էր 3 խաղով:

Թեև «Արարատը» նախորդ մրցաշրջանի համեմատ զգալիորեն բարելավել է խաղամակարդակը, սակայն սպասված արդյունքը դեռ չկա: Մեկնարկային տուրում «Գանձասար-Կապանի» նկատմամբ տոնած հաղթանակն առայժմ միակն է արարատցիների համար անցկացրած 10 հանդիպումներում:

Ճիշտ է, ընդհանուր առմամբ արարատցիներն իրենց վատ չեն դրսևորում առաջնության հանդիպումներում, սակայն պաշտպանությունում թույլ տված կոպիտ սխալների պատճառով ցավալի պարտություններ են կրում:

Առջևի գծում էլ արարատցիները միշտ չէ, որ արդյունավետ են գործում՝ հաճախ չկարողանալով իրացնել գոլային իրական պահերը: Ի դեպ, վերջին երկու խաղերում արարատցիներին չի հաջողվել գրավել մրցակիցների դարպասը: Այս ամենի արդյունքում «Արարատը» կրկին հանգրվանել է մրցաշարային աղյուսակի վերջին հորիզոնականում, ինչպես նախորդ մրցաշրջանում էր:

Հետաքրքիր է, որ մրցակիցների առաջին շրջանի հանդիպումից առաջ մրցաշարային աղյուսակում լրիվ այլ պատկեր էր: «Արարատը» գլխավորում էր մրցաշարային աղյուսակը, իսկ չեմպիոնը գտնվում էր 5-րդ տեղում: Նախորդ առաջնության բացահայտ հետնապահ «Արարատը» երկրի փոխչեմպիոն «Գանձասար-Կապանի» հետ մրցավեճում շատերի համար անսպասելի հաճելի անակնկալ էր մատուցել իր երկրպագուներին՝ 3-1 հաշվով կամային հաղթանակ տոնելով ու 722 օրվա ընդմիջումից հետո կրկին գլխավորելով մրցաշարային աղյուսակը:

Իսկ ահա «Ալաշկերտն» իր պատմության մեջ առաջին անգամ առաջնությունը սկսել էր պարտությամբ՝ Գյումրիում 1-2 հաշվով զիջելով «Շիրակին», որին նախորդ մրցաշրջանում այդպես էլ չէր հաջողվել հաղթել չեմպիոնին: Ընդ որում այդ խաղում «Ալաշկերտն» առաջինն էր բացել հաշիվը, իսկ գյումրեցիները հաղթական գնդակը խփել էին Արսեն Բեգլարյանի կոպիտ սխալի հետևանքով:

Առաջին շրջանի խաղում արարատցիներին չհաջողվեց զարգացնել հաջողությունն ու լրջորեն դիմադրել չեմպիոնին՝ 0-3 հաշվով պարտություն կրելով: 2-րդ շրջանի խաղում չեմպիոնը կրկին 3 անգամ գրավեց «Արարատի» դարպասը, որին այս անգամ հաջողվեց խփել հեղինակության գոլը:

Դա «Արարատի» նկատմամբ ալաշկերտցիների տոնած 7-րդ անընդմեջ հաղթանակն էր: Վերջին անգամ «Արարատը» չեմպիոնին հաղթել է նախորդ առաջնության առաջին շրջանի խաղում՝ 3-1:

Մրցակիցների մրցավեճում բոլորից արդյունավետ է գործել «Ալաշկերտի» բոլոր տարիների լավագույն ռմբարկու Միհրան Մանասյանը, ով 14 անգամ գրավել է արարատցիների դարպասը: Այդ գոլերից 9-ը նա խփել է անցած մրցաշրջանում: Ընդ որում 3-րդ շրջանի խաղում Միհրանը ֆուտբոլային պոկերի հեղինակ էր դարձել:

Արարատցիներից ամենաարդյունավետը թիմի նախկին ավագ Ալեքսանդր Ռակիչն է` դառնալով 6 գոլի հեղինակ:

Միացի՛ր հայկական ամենասպորտային Instagram-ին: