fbpx
Բաժիններ

Երյոմենկոյի «տխուր» ցուցանիշը. Ո՞վ է ամենահաջողակ մարզիչը «Փյունիկի» պատմության մեջ

Ինչպես արդեն տեղեկացրել ենք, Ալեքսեյ Երյոմենկոն հեռացել է «Փյունիկից» և թիմի գլխավոր մարզչի պաշտոնը կրկին ստանձնել է Արմեն Գյուլբուդաղյանցը, ով նախորդ մրցաշրջանի ավարտից հետո փոխարինել էր Արտակ Օսեյանին: Հենց Գյուլբուդաղյանցի գլխավորությամբ էին փյունիկցիները մասնակցել Եվրոպա լիգայի մրցաշարին, ինչպես նաև անցկացրել էին ընթացիկ առաջնության մեկնարկային տուրի «Բանանցի» հետ հանդիպումը, որում գրանցվել էր մարտական ոչ-ոքի՝ 2-2:

Ռուսաստանցի մասնագետ Ալեքսեյ Երյոմենկոն «Փյունիկի» ղեկը ստանձնել էր առաջնության երկրորդ տուրում: Նրա նորամուտը հաջող ստացվեց. փյունիկցիները սեփական հարկի տակ 2-1 հաշվով հաղթեցին առաջնությունում անհաջող մեկնարկած «Գանձասար-Կապանին»: Սակայն հաջող սկիզբը շարունակություն չունեցավ: Այդ հաղթանակը ռուսաստանցի մասնագետի օրոք այդպես էլ մնաց միակը: Հաջորդ 8 հանդիպումներում «Փյունիկն» ընդամենը 3 միավոր վաստակեց՝ կրելով 5 անընդմեջ պարտություն: «Փյունիկի» ներկայիս արդյունքը վատագույնն է թիմի 25-ամյա պատմության մեջ:

Ալեքսեյ Երյոմենկոն ՀՀ առաջնություններում «Փյունիկի» ղեկը ստանձնած 16-րդ մարզիչն էր: Նրա գլխավորությամբ անցկացրած 9 հանդիպումներում փյունիկցիներն ընդամենը 6 միավոր վաստակեցին, ինչը հնարավոր միավորների ընդամենը  22,2 տոկոսն է: Այս ցուցանիշը թիմի մարզիչների մեջ վատագույնն է բացառությամբ Վարազդատ Ավետիսյանի, ում գլխավորությամբ 2013/14թթ. անցկացրած 2 հանդիպումներում էլ «Փյունիկը» պարտվել էր:

Ալեքսեյ Երյոմենկոն «Փյունիկի» օտարերկրացի 4-րդ մարզիչն էր: Հետաքրքիր է, որ թիմի օտարերկրացի նախկին 3 մարզիչներն էլ միաժամանակ նաև գլխավորել են Հայաստանի ազգային հավաքականը: Առաջինն արգենտինացի Օսկար Լոպեսն էր, որի օրոք «Փյունիկը» 2002թ. յուրօրինակ հեթ-տրիքի հեղինակ դարձավ՝ նվաճելով Հայաստանի չեմպիոնի, գավաթակրի և սուպերգավաթակրի տիտղոսները: Նրա գլխավորությամբ «Փյունիկն» առաջնությունում վաստակեց հնարավոր միավորների 88,8 տոկոսը, որը լավագույն արդյունքն է թիմը մարզած մարզիչների մեջ:

Հաջորդ մրցաշրջանում Օսկար Լոպեսից «Փյունիկի» ղեկը ստանձնած ռումինացի Միխայ Ստոյկիցան թիմին չեմպիոնական հերթական բարձունքին հասցրեց: Նա թիմից հեռացավ հաջորդ առաջնության 8-րդ տուրից հետո՝ հունիսի կեսին, մինչ այդ հասցնելով «Փյունիկի» հետ նվաճել ՀՀ գավաթն ու Սուպերգավաթը: Ստոյկիցան «Փյունիկի» միակ մարզիչն է, որի օրոք անցկացրած առաջնության 36 հանդիպումներում թիմն այդպես էլ պարտություն չկրեց:

2005թ. առաջնության 6-րդ տուրից հետո «Փյունիկը» գլխավորած հոլանդացի Հենկ Վիսմանի օրոք էլ փյունիկցիները հերթական չեմպիոնությունը գրանցեցին:

1992թ., երբ կազմավորվեց «Փյունիկը», որն այն ժամանակ կրում էր ՀՄԸՄ անվանումը, թիմի գլխավոր մարզիչը հայկական ֆուտբոլի վառ անհատականություններից մեկն էր` Խորեն Հովհաննիսյանը, ով միաժամանակ իր սաների հետ խաղադաշտ էր դուրս գալիս ու հաջողությամբ եզրափակում էր խաղընկերների կազմակերպած գրոհները:

Ազգային անդրանիկ առաջնությունում 37-ամյա Հովհաննիսյանը 17 գոլի հեղինակ դարձավ: Նրա գլխավորությամբ ՀՄԸՄ-ը նվաճեց Հայաստանի չեմպիոնի տիտղոսը, հասավ ՀՀ գավաթի եզրափակիչ, որտեղ 0-2 հաշվով զիջեց «Բանանցին»:

1993թ. ամռանը Հովհաննիսյանը մեկնեց Լիբանան` ստանձնելով Բեյրութի ՀՄԸՄ-ի խաղացող-մարզչի պաշտոնը: Նրա փոխարեն Երևանի ՀՄԸՄ-ում գլխավոր մարզչի պարտականությունները կատարեց Հովհաննիսյանի օգնականը` Գևորգ Պապյանը: Հաջորդ մրցաշրջանում թիմի ղեկը վստահվեց Լևոն Յաբլուկյանին:

1995թ. ամռանը վերադառնալով Հայաստան, Խորեն Հովհաննիսյանը կրկին ստանձնեց իր հարազատ թիմի ղեկը, որը վերանվանվել էր «Փյունիկ»: Նրա օրոք փյունիկցիները 2 անգամ նվաճեցին Հայաստանի չեմպիոնի տիտղոսը, դարձան հանրապետության գավաթակիր ու սուպերգավաթակիր: Հովհաննիսյանը «Փյունիկը» գլխավորեց մինչև 1998թ. առաջնության ավարտը, որից հետո թիմը լուծարվեց:

Իսկ առավել երկար «Փյունիկը» գլխավորել է Վարդան Մինասյանը, ով մարզիչներից առավել հաջող գործունեություն է ծավալել հարազատ ակումբում: Նրա գլխավորությամբ «Փյունիկը»  4-ական անգամ նվաճել է Հայաստանի չեմպիոնի և սուպերգավաթակրի տիտղոսները, 2 անգամ դարձել է ՀՀ գավաթակիր:

Վարդան Մինասյանն առաջին անգամ «Փյունիկի»  ղեկը ստանձնել էր 2004թ. առաջնության 8-րդ տուրից հետո, երբ Միխայ Ստոյկիցան հեռացել էր թիմից: Մինչ այդ նա ռումինացի մարզչի օգնականն էր: Մինասյանի նորամուտը շատ տպավորիչ ստացվեց: Նրա գլխավորությամբ փյունիկցիները 16 անընդմեջ հաղթանակ տոնեցին: Մարզչական կարիերայում այդ տարի Մինասյանը չեմպիոնական առաջին բարձունքը նվաճեց: Մինչև հաջորդ մրցաշրջանի 6-րդ տուրից հետո «Փյունիկի» ղեկը հոլանդացի Հենկ Վիսմանին հանձնելը, Վարդան Մինասյանն իր սաների հետ նվաճեց նաև Սուպերգավաթը:

Արմեն Գյուլբուդաղյանցն առաջին անգամ «Փյունիկը» գլխավորել է 2007թ. մայիսի սկզբին՝ առաջնության 3-րդ տուրից հետո փոխարինելով Սամվել Պետրոսյանին, ով թիմին նախորդ մրցաշրջանում չեմպիոնի կոչմանն էր արժանացրել: Գյուլբուդաղյանցն էլ կրկնեց թիմի չեմպիոնական հաջողությունը, նաև նրա օրոք «Փյունիկը» հերթական անգամ դարձավ սուպերգավաթակիր: Հաջորդ առաջնության 11-րդ տուրից հետո Գյուլբուդաղյանցն իր տեղը զիջեց Վարդան Մինասյանին:

VivaroNews.am-ը ներկայացնում է «Փյունիկը»  գլխավորած մարզիչների ցուցանիշները:

Մարզիչներ Խ Հ Ո Պ Գ Մ % Թվական
1.Վարդան Մինասյան 133 90 26 17 295-104 296 74,1 2004-2005, 2008-2011, 2012
2.Խորեն Հովհաննիսյան 128 86 16 26 336-158 274 71,3 1992-1993, 1995/96-1998
3.Սարգիս Հովսեփյան 68 34 16 18 115-66 118 57,8 2013/14-2015/16
4.Լևոն Յաբլուկյան 39 29 5 5 150-34 92 78,6 1994-1995, 2001
5.Արմեն Գյուլբուդաղյանց 37 20 7 10 62-29 67 60,3 2007-2008, 2017/18
6.Միխայ Ստոյկիցա 36 28 8 0 106-20 92 85,1 2003-2004
7.Սամվել Պետրոսյան 31 26 4 1 94-24 82 88,1 2006-2007
8.Արտակ Օսեյան 30 12 9 9 35-27 45 50 2016/17
9.Սուրեն Չախալյան 27 12 3 12 45-37 39 48,1 2012/13
10.Ռաֆայել Նազարյան 22 9 7 6 35-22 34 51,5 2012/13-2013/14
11.Օսկար Լոպես 21 18 2 1 82-14 56 88,8 2002
12.Սամվել Դարբինյան 20 15 2 3 68-23 47 78,3 2001
13.Հենկ Վիսման 20 11 6 3 36-13 39 65 2005
14.Գևորգ Պապյան 19 14 3 2 57-15 45 78,9 1993
15.Ալեքսեյ Երյոմենկո 9 1 3 5 6-15 6 22,2 2017/18
16.Վարազդատ Ավետիսյան 2 0 0 2 1-4 0 0 2013/14

Աշոտ Հայրապետյան

Հետևե՛ք VNews.am-ին նաև Youtube-ում և Instagram-ում:


Արմեն Պետրոսյան․ «Խաղերը վերլուծելիս հասկանում ենք, որ ամեն ինչ նորմալ է ընթանում, զուտ չենք իրացնում պահերը» (տեսանյութ)

Աշոտ Բարսեղյան․ «Հավասար արդյունքն արդարացի կլիներ» (տեսանյութ)

Ալեքսանդր Տարխանով․ «Օզբիլիսը դեռ լիարժեք պատրաստ չէ, քանի որ շատ ժամանակ է բաց թողել» (տեսանյութ)

«Փյունիկը» հաղթեց «Գանձասար-Կապանին», Օզբիլիսը՝ գոլի հեղինակ (տեսանյութ)

«Գանձասար-Կապան» – «Փյունիկ». Մեկնարկային կազմեր, ուղիղ եթեր

Ինտրիգներով լի արարատյան դերբին՝ չեմպիոնի և առաջատարի միջև․ Ամենաուշագրավ փաստերը՝ ԲԽ-ի 7-րդ տուրին ընդառաջ

«Արարատն» անորսալի է, «Գանձասար-Կապանն» էլ չի գտնում «Շիրակին» հաղթելու բանաձևը

Վարդան Մինասյան․ «Երկրորդ կեսում ստեղծած պահերի քանակը բավարար կլիներ 4-5 խաղի համար» (տեսանյութ)

«Ալաշկերտը» տպավորեց, «Փյունիկը»՝ հիասթափեցրեց․ VNews-ի ֆոտոշարքը գավաթակրի ու փոխչեմպիոնի խաղից

Տարխանով. «Մեր թիմը այսօր չխաղաց» (տեսանյութ)

Արմեն Ադամյան. «Ինչպես ասում են՝ ինչ մտածել էինք, այն էլ ստացվեց» (տեսանյութ)

«Ալաշկերտը» ջախջախեց «Փյունիկին», չեմպիոնը առաջին միավորները կորցրեց (տեսանյութ)

«Փյունիկ» – «Ալաշկերտ». Մեկնարկային կազմեր, ուղիղ եթեր

Կարող է կայանալ Արաս Օզբիլիսի նորամուտը․ Ամենաուշագրավ փաստերը՝ ԲԽ-ի 6-րդ տուրին ընդառաջ

«Փյունիկի» խաղերի տոմսերն այլևս անվճար չեն

«Արարատ-Արմենիայի» պաշտպանը նորամուտն է նշել Բուլղարիայի հավաքականում