fbpx
Բաժիններ

«Էրեբունի» ակումբի ներկան և ապագայի ծրագրերը. պարզաբանում է Սևադա Արզումանյանը

«Էրեբունին» Հայաստանի Առաջին խմբի առաջնության այն 4 մասնակիցներից մեկն է, որ չի հանդիսանում Բարձրագույն խումբը ներկայացնող ակումբի դուստր թիմ:

Հարկ է նշել, որ հանրահայտ մասնագետ Սևադա Արզումանյանի գլխավորած թիմը 2017/18թթ. մրցաշրջանի առաջին հատվածում հանդես է եկել փոխնիփոխ հաջողություններով: «Էրեբունին» 10 թիմի պայքարում այս պահին 6-7-րդ հորիզոնականներն է բաժանում «Ալաշկերտ-2»-ի հետ: Առաջին խմբի առաջնության առաջատարները «Լոռին» (32 միավոր) և «Արցախն» են (31 միավոր):

Սևադա Արզումանյանը VivaroNews.am-ին տված հարցազրույցում խոսել է լեգեոներների հեռանալու պատճառների, զինծառայությունից վերադարձած ֆուտբոլիստներին թիմ ընդունելու, ակումբի առաջիկա ծրագրերի և այլ թեմաների շուրջ:

-Թիմը հունվարի 10-ից վերադարձել է արձակուրդից և վերսկսել մարզումները,- նշում է Սևադա Արզումանյանը: -Հօգուտ մեզ՝ եղանակային պայմանները թույլ են տալիս բնական խոտածածկով խաղադաշտում անցկացնել մարզումները: Այժմ անցկացնում ենք ամենօրյա մարզումներ, որոշ ժամանակ անց մեկ օրվա ընթացքում կունենանք 2 մարզում:

«Էրեբունիի» այսօրվա մարզումը՝

Անցած տարի թիմի կազմում կային լեգեոներներ, նրանք այսօր թիմում չեն: Բոլորի պայմանագրերի ժամկետը լրացել է: Անցած տարվա կազմի հիմնական մասն այժմ մարզումների մեջ է: Կան տղաներ, ովքեր մեկնել են զինծառայության: Այժմ մեզ են միացել մեր ակումբի՝ 2002թ. ծնված որոշ ֆուտբոլիստներ և մարզվում են մեզ հետ: Այս պահին մեր տրամադրության տակ են նաև պատանի ու երիտասարդ այլ ֆուտբոլիստներ, ովքեր փորձաշրջան են անցնում թիմում: Համալրումների հետ կապված որոշումները կկայացվեն ժամանակի ընթացքում:

Մինչ առաջնության վերսկսումը կունենանք նաև ընկերական խաղեր: Արդեն պայմանավորվել ենք, որ փետրվարի 3-ին խաղալու ենք «Փյունիկ-2»-ի հետ: Մինչ այդ կանցկացնենք երկկողմանի խաղեր:

Երբ լեգեոներները թիմում էին, առաջնության որոշ ժամանակահատվածում թիմը բավական լավ արդյունքներ էր գրանցում: Ի՞նչն էր պատճառը, որ նրանք հեռացան «Էրեբունիից»:

-Լեգեոներների հետ նախնական պայմանավորվածություն կար, և նրանց պայմանագրերը նախատեսված էին մինչև դեկտեմբեր: Կարծում եմ՝ նրանց հետ խաղալն ու մարզվելն օգտակար էր մեր երիտասարդ ֆուտբոլիստների համար: Դա տեսանելի էր նաև թիմի արդյունքների տեսքով:

Կային տեղեկություններ, որ «Էրեբունին» չի վճարել այդ լեգեոներների աշխատավարձերը: Դրանք համապատասխանո՞ւմ են իրականությանը:

-Ոչ, դա ճիշտ չէ:

«Ակումբի նախագահը մարզվող բոլոր երեխաներին գիտե անուն-ազգանունով և արտաքին տեսքով»

«Էրեբունի» ակումբն ապագայի համար ինչպիսի՞ հեռանկարներ ունի: Ո՞վ կամ ովքե՞ր են հովանավորում թիմը, և ապագայի հետ կապված պատկերացումները 1-2 տարվա համա՞ր են, թե՞ ավելի երկարաժամկետ:

-«Էրեբունի» ակումբը տարբեր տարիքային խմբերում մասնակցում է Հայաստանի առաջնություններին: Դպրոցն արդեն երկար ժամանակ է, ինչ գործում է: Միգուցե այդքան էլ տեսանելի չէ, բայց այս ակումբը շատ կարևոր գործ է անում այս տարածաշրջանի երեխաների համար: Նրանց բոլորի համար բաց են դռները, նրանք կարող են կտրվել փողոցի կյանքից և գալ մարզումների, դաստիարակվել որպես ֆուտբոլիստ: Ես՝ որպես Երևանի քաղաքացի, շնորհակալություն եմ հայտնում այն մարդկանց, ովքեր նման հնարավորություն են ստեղծում երեխաների համար:

Ակումբի նախագահը Տիգրան Այվազյանն է, ֆինանսավորումը կատարվում է նրա սեփական ուժերով: Բացի այդ ներդրումներից՝ այս ակումբում մեծ հոգևոր սնունդ կա: Մեր ակումբում մարզվում են շուրջ 200-300 երեխա, և ակումբի նախագահը յուրաքանչյուրին անուն-ազգանունով և արտաքին տեսքով գիտե: Այստեղ բոլորը շատ ուշադիր և հոգատար են: Մարզիչները նույնպես ամեն ինչ անում են, որ պատանիները կատարելագործվեն:

Իսկ ակումբի հիմնական նպատակն այն է, որ 6 տարեկան երեխան իմանա՝ գալով մեր ակումբ և առաջադիմություն գրանցելով, կարող է բացահայտել իրեն որպես ֆուտբոլիստ: Այսինքն, մենք մտածում ենք տեղի ֆուտբոլային կադրերի մասին: Իհարկե, լավ կլինի, որ հայտնվեն մարդիկ, և խոսք գնա ավելի լուրջ ներդրումների, ընդհուպ մինչև ակադեմիա ունենալու ծրագրերի մասին, բայց ներկայիս ղեկավարությունն այսօր անում է իր հնարավորություններից նույնիսկ ավելին, որպեսզի հոգա այս ծրագրերի մասին:

Խոսեցիք զինծառայության հետ կապված խնդրի մասին: Փաստորեն, ամեն զորակոչից հետո ստիպված եք լինում մեծ փոփոխություններ կատարել թիմում: Ինչպե՞ս եք տեսնում այս հարցի լուծումը. չէ՞ որ զինծառայությունից հետո քչերն են վերադառնում ֆուտբոլ:

-Դա պետական խնդիր է: Շատ լավ կլիներ, որ մենք ապրեինք խաղաղ երկրում, և զինվորի կարիք չլիներ, բայց այսօր զինվոր նույնպես պետք է պետությանը: Մեր թիմում ներկա պահին մարզվում են թե՛ նախազորակոչային տարիքում գտնվող ֆուտբոլիստներ, թե՛ այնպիսիք, ովքեր վերադարձել են և կրկին ֆուտբոլում են: Մեր թիմը, կարելի է ասել, կամուրջ է դառնում այդ առումով:

«Էրեբունին» հնարավորություն է տալիս այն տղաներին, ովքեր վերադարձել են և նպատակներ ունեն: Կստացվի, թե չի ստացվի՝ դա արդեն կախված է աշխատանքից:

Առաջին խմբի այս առաջնության հետագա հատվածի համար ի՞նչ խնդիրներ են դրված «Էրեբունիի» առջև:

-Պատանի ֆուտբոլիստներին ներգրավելու հետ կապված՝ դժվարություններ լինելու են: Դա լինելու է արդյունքի տեսքով, ունենալու ենք հոգեբանական խնդիրներ: Բայց նրանք էլ պետք է այնպես տրամադրվեն, որ ամեն հանդիպմանը խաղան հաղթանակի համար, պայքարեն մինչև վերջ: Մենք պետք է մոտիվացնենք ֆուտբոլիստներին: Ֆուտբոլիստը կարող է առաջադիմել միայն այն դեպքում, եթե ամեն խաղում փորձի առավելագույն ուժերով հանդես գալ:

Նաև պետք է նշեմ, որ թիմի վրա հոգեբանական մեծ ազդեցություն ունեցավ մեր 18-ամյա ավագ Հայկ Մելքոնյանի մահվան փաստը: Նա շատ կարևոր անձնավորություն էր «Էրեբունիի» համար:

«Էրեբունիի» ֆուտբոլիստները խաղից առաջ լուսանկարվել են Հայկ Մելքոնյանի հիշատակին նվիրված շապիկներով

«Ցանկանում ենք հավաքականների մարզիչներին տեղեկություններ հայտնել մեր թիմից»

ՀՖՖ-ն խնդիր է դրել Բարձրագույն խմբի ակումբների քանակն առաջիկայում հասցնել 10-ի: «Էրեբունին» կարո՞ղ է դառնալ այդ ակումբներից մեկը:

-Իհարկե, շատ լավ նպատակ է, բայց դրանք առայժմ ծրագրեր են: «Էրեբունին» այժմ հիմնական ուշադրությունը կենտրոնացրել է իր սաների հետ աշխատանքի վրա: Թե՛ ես, թե՛ Դուք, թե՛ ակումբի սեփականատերը և նախագահը գիտենք, որ Բարձրագույն խմբում թիմ պահելը բավականին լուրջ գումարներ է պահանջում: Փառք ու պատիվ այն մարդկանց, ովքեր այսօր գործող թիմեր ունեն այնտեղ. դա շատ գովելի է:

Ֆուտբոլում ներդրում անելն այսօր մեծ բեռ է: Որոշում կայացնողներն ակումբի ղեկավարներն են, մենք կատարողներն ենք: Գիտեմ, որ շատ մեծ ցանկություն ունեն, բայց իրականացնելու հետ կապված ամեն ինչ իրենցից է կախված:

Ենթակառուցվածքների վերաբերյալ ի՞նչ անելիքներ ունի ակումբը: Մասնավորապես, նախատեսվո՞ւմ է փոխել «Էրեբունի» մարզադաշտի խոտածածկը:

-Բավականին մեծ աշխատանք է կատարվում, որ մարզադաշտի ներկայիս խոտածածկը լավ վիճակում լինի: Երբ մենք խաղում ենք տարբեր թիմերի հետ, տեսնում ենք, որ այս խոտածածկի որակն ավելի բարձր է, քան մյուս խաղադաշտերինը, որտեղ կայանում են առաջնության հանդիպումներ: Տարվա այս ժամանակահատվածում քիչ թիմեր են մարզվում բնական խոտածածկի վրա: Մարդիկ մեծ աշխատանք են տանում և շատ հոգատար են այս խոտածածկի վրա աշխատելիս:

Եղանակային վատ պայմանների ժամանակ աշխատում ենք մարզվել այլ խաղադաշտերում, որպեսզի կարողանանք պահպանել «Էրեբունի» մարզադաշտի խոտածածկի որակը, իսկ հնարավորության դեպքում մարզվում ենք հենց այնտեղ: Ակումբի ղեկավարները ջանում են, որ առաջիկայում մեր տնային խաղերն անցկացնենք արդեն «Էրեբունի» մարզադաշտում:

Հայաստանի տարբեր տարիքային հավաքականներին կադրերով են ապահովում հիմնականում «Փյունիկը» և «Բանանցը»: Ըստ Ձեզ՝ «Էրեբունիում» այսօր կա՞ն ֆուտբոլիստներ, ովքեր ունակ են լինելու ընտրանիների անդամ: Դա էլ իր հերթին կնպաստի, որ լուծվի նրանց զինծառայության հարցը:

-Մեզ համար գերխնդիր է նման ֆուտբոլիստներ պատրաստելը: Մենք ցանկանում ենք և կփորձենք հավաքականների մարզիչներին ժամանակ առ ժամանակ տեղեկություններ հայտնել մեր թիմից՝ որոշակի անուն-ազգանունների ինֆորմացիայով:

Առաջին խմբում մեկ խաղային օրը միանգամից 5 հանդիպում է կայանում: Դա էլ դժվարություն է ստեղծում մարզիչների համար ժամանակային առումով: Նախապատրաստական այս շրջանում թիմում այդ թեմայով խոսակցություն եղել է, պետք է լինեն գոնե մի քանի խաղացողներ, որ հայտնվեն տեսադաշտում: Այդուհանդերձ, ինչքան էլ մենք՝ մարզիչներս շատ ցանկանանք, հավաքականներում ընդգրկվելու համար շատ բան է կախված հենց ֆուտբոլիստից:

Արման Աբելյան

Հետևե՛ք VNews.am-ին նաև Youtube-ում և Instagram-ում:


Միայն հայ ֆուտբոլիստներ ամենաշատ հանդիպումների մասնակցած 13 խաղացողների շարքում

«Վանը» ներկայացրել է ակումբի ղեկավար կազմն ու մարզչական շտաբը

Սևադա Արզումանյանը հեռացել է «Արցախի» գլխավոր մարզչի պաշտոնից

Սևադա Արզումանյան․ «Տղաներն անվստահ էին գործում խաղային պարզունակ իրավիճակներում»

Սևադա Արզումանյան․ «Բոլոր թիմերի համար էլ դժվար է խաղացանկի տեսանկյունից, բայց պետք է հարմարվել» (տեսանյութ)

«Փյունիկն» իր առաջիկա մրցակցին արդեն 2 անգամ պարտվել է առաջնությունում․ Ամենահետաքրքիր փաստերը՝ ԲԽ-ի 34-րդ տուրին ընդառաջ

Սևադա Արզումանյան․ «Երբ մնացինք 10 հոգով, տղաների մոտ գերբնական ուժ արթնացավ, և պահպանեցինք հաղթանակը» (տեսանյութ)

Սևադա Արզումանյան․ «Հիմնական դեր խաղաց այն հանգամանքը, որ «Փյունիկը» լավ է գործում ստանդարտների ժամանակ» (տեսանյութ)

Սևադա Արզումանյան․ «Այս պարտությունը կօգնի հասկանալ, որ եթե ինչ-որ մեկը մտածի՝ բավարարված է ինքն իրենով, նման խաղերը կպատժեն այդպիսի մտածելակերպը» (տեսանյութ)

Սևադա Արզումանյան․ «Ես հավատում էի այս ֆուտբոլիստներին, և եկավ օրը, որ նրանք իմ հավատն արդարացրին» (տեսանյութ)

Սևադա Արզումանյան․ «Կուզեինք գցել մրցակցի տոնական տրամադրությունը, բայց չստացվեց․ երևի բեկումնային էր Հայրապետյանի սեյվը 2-0 հաշվի ժամանակ» (տեսանյութ)

Սևադա Արզումանյան․ «Մենք ցանկանում ենք հարգանք ձեռք բերել առաջնության մյուս թիմերի կողմից» (տեսանյութ)

Սևադա Արզումանյանը՝ «Արցախի» հաղթանակի, ինչպես նաև Նորայր և Նարեկ Գյոզալյանների հեռանալու պատճառների մասին (տեսանյութ)

Սևադա Արզումանյան․ «Ֆուտբոլիստների վարպետությունը պետք է բարձրացնենք, իսկ հոգեբանական խնդիրը կլուծվի 1-2 հաջող խաղից հետո» (տեսանյութ)

Սևադա Արզումանյան․ «Արցախն» ու «Արարատը» մյուս ակումբներից առանձնանում են նրանով, որ թիմ կառուցելու ճանապարհին են» (տեսանյութ)

Սևադա Արզումանյան․ «Պատժվեցինք թույլ տված տարրական սխալների պատճառով»