fbpx
Բաժիններ

«Սոված խաղացինք, «Արարատում» փող չունեինք սննդի համար». Մարկոս Պիզելիի ամենաուշագրավ մտքերը

Մարկոս Պիզելին հայկական ֆուտբոլի ամենակոլորիտային կերպարներից մեկն է: Կա՞ մեկը, ով դեռ հիշում է, որ նա բրազիլացի է: Մարկոսն իր ելույթներով ապացուցել է, որ Հայաստանի հավաքականի ամենանվիրված ֆուտբոլիստներից մեկն է և, անկախ մարզավիճակից, անում է առավելագույնը թիմին օգուտ տալու համար:

Ինչպես նրան հաճախ անվանում են՝ ամենահայ բրազիլացին Հայաստանում է հայտնվել 2006թ.-ին՝ Արկադի Անդրեասյանի ջանքերով տեղափոխվելով «Արարատ», հետագայում խաղացել է «Փյունիկում»: Նա ՀՀ քաղաքացի է դարձել 2008թ.-ին: Պիզելիի կարիերան շատ խայտաբղետ է:

Նա խաղացել է Ֆրանսիայում («Արարատ Փարիզ»), Ուկրաինայում («Մետալուրգ Դոնեցկ»), Ռուսաստանում («Կուբան», «Կրասնոդար»), Ղազախստանում («Ակտոբե»), Սաուդյան Արաբիայում («Ալ Ռաեդ»), ԱՄԷ-ում («Ալ Ֆուջայրահ») և Հունաստանում («Քսանտի»): Այժմ էլ պաշտպանում է Սաուդյան Արաբիայի «Ալ-Շաբաբի» մարզական պատիվը:

Մարկոսի դեպքում հետաքրքիրն այն է, որ նա երբեք հասարակ գոլեր չի խփում, դրանց մեջ միշտ կարելի է հանճարեղություն գտնել: Նա մրցակցի դարպասը գրավում է թե՛ հեռու տարածություններից հարվածներով, թե՛ տուգանայիններից, նաև անկյունայիններից (ինչպես պարզվեց վերջերս): Հայաստանի հավաքականի կազմում դարձել է 9 գոլի հեղինակ:

Ձեր ուշադրությանն ենք ներկայացնում Մարկոսի՝ իր հարցազրույցներում հնչեցրած ամենաուշագրավ և հետաքրքիր մտքերը: Օգտագործվել են հատվածներ «Կուբանի» պաշտոնական կայքին, Sportbox.ru-ին, Prosport-ին, ռուսական «Матч ТВ»-ին, հայկական «Ֆուտբոլ Պլյուսին» տված հարցազրույցներից, լրագրողների հետ հանդիպումներից:

 

«Ես 99%-ով հայ եմ, 1%-ով՝ բրազիլացի»:

«Հայաստանն է արել այնպես, որ այսօր ինձնից հարցազրույց եք վերցնում»:

«Հայրս իտալական արմատներ ունի: Իտալիայում ազգականներս շատ ծեր մարդիկ են, և ես ոչ մի կապ չունեմ նրանց հետ: Նախահայրերս Իտալիայից են»:

«Հայրս է ինձ տարել ֆուտբոլի: Նա դարպասապահ է եղել ու շատ բան է սովորեցրել ինձ»:

«Խաղալով Բրազիլիայի 3-րդ դիվիզիոնի համեստ «Սան Կառլոս» թիմում՝ նույնիսկ չէի կարող երազել, որ մի օր կգնամ Եվրոպա և կխաղամ միջազգային մակարդակում: Ֆանտաստիկա է»:

«Երբ Բրազիլիայից եկա Հայաստան, ուզում էի անմիջապես հեռանալ: Սարսափելի էր հայտնվել ցուրտ և անսովոր մթնոլորտում: Թարգմանիչ չունեի, ոչ ոք ինձ չէր հասկանում»:

«Հետագայում արդեն Ռուսաստանում հասկացա, թե ինչ է իսկական ցուրտը»:

«Հայաստանը խիստ տարբերվում է Բրազիլիայից: Բրազիլիայում ապրելը շատ վտանգավոր է»:

«Բրազիլացիները կարողանում են հաճույք ստանալ կյանքից, երջանիկ լինել և դեպրեսիայով չտառապել: Նրանք ապրում են տվյալ օրով, եթե նույնիսկ աշխատանք չունեն: Հայաստանում մարդիկ վախով են սպասում հաջորդ օրվան, նրանք սովոր են անհանգստանալ աշխատանքի և գումարի հարցում»:

«Համաձայնեցի խաղալ Հայաստանի հավաքականում, քանի որ լավ հասկանում էի՝ Բրազիլիայի ընտրանու կազմում հայտնվելը շատ բարդ կլինի»:

«Չեք պատկերացնում՝ ինչ հույզեր ունեցա, երբ ֆեդերացիայի նախագահն ինձ առաջարկեց խաղալ Հայաստանի հավաքականի կազմում: Երբ հիշում եմ այդ պահը, մարմնովս սարսուռ է անցնում»:

«Երբ մեկնում ես հավաքական, նախապատրաստվում խաղերին, հագնում մարզաշապիկը, լսում օրհներգը, հասկանում ես, որ քեզ հետ և շրջապատում բացառիկ մի բան է կատարվում, որն անհնար է զգալ ակումբում»:

«Երբ խաղում էի Երևանի «Արարատում», ոչ միայն ես, այլևս մյուս բրազիլացիները խիստ դժգոհ էին: Աշխատավարձը հաճախ ուշացնում էին, մարզումային պայմաններն ու ապրելակերպն այն չէին»:

«Սովա՞ծ էինք մտել խաղադաշտ «Արարատ»«Փյունիկ» «ոսկե» խաղին. այո, մեզ՝ բրազիլացի ֆուտբոլիստներիս աշխատավարձ վաղուց չէին տվել, և մենք փող չունեինք նույնիսկ սննդի համար»:

«Իմ գլխավոր սկզբունքը երբեք չհանձնվելն է»:

«Առանց խաղադաշտում մեծ ծավալի աշխատանք կատարելու անհնար է դրական արդյունքի հասնել»:

«Սիրածս էակի ձեռքն այսպես եմ խնդրել՝ խաղում էի Հայաստանում, իսկ Նատալիան Բրազիլիայից պետք է ժամաներ Երևան: Համոթ ինձ՝ ես օդանավայական մեկնեցի առանց ծաղիկների: Դրանք տանն էի թողել: Երբ եկանք տուն, ես նվիրեցի այդ ծաղիկները, պատմեցի, թե ինչ եմ զգում և խնդրեցի նրան դառնալ իմ կինը: Նա համաձայնեց»:

«Կարող ես օրը 10 անգամ մարզվել, բայց եթե չես մասնակցում խաղերին, դա արդեն նշանակություն չունի»:

«Դեռևս «Փյունիկում» հասկանում էի, թե ինչքան տաղանդավոր են Հենրիխ Մխիթարյանը և Գևորգ Ղազարյանը»:

«Մխիթարյանը «Փյունիկում» լավ էր հանդես գալիս, բայց չէի պատկերացնում, որ մի օր կխաղա «Մանչեսթեր Յունայթեդում»: Մյուսների համեմատ՝ նա այնքան էլ չէր առանձնանում»:

«Հենրիխն իր կյանքը նվիրում է միայն ֆուտբոլին: Նա միշտ հետևում է իր կենսակերպին, սննդին, շուտ է պառկում քնելու, չի խմում, չի անում ոչինչ, ինչը կարող է վնասել իրեն: Ոչ բոլորը կարող են Մխիթարյանի պես կարգապահ լինել և ուժեղ բնավորություն ունենալ»:

«Բրազիլիայում արագ են ֆուտբոլիստ դառնում: Երիտասարդ խաղացողին բավական է մի քանի կարևոր խաղում իրեն լավ դրսևորել, և նրա վրա անմիջապես ուշադրություն կդարձնեն»:

«Միշտ դուր է եկել Զինեդին Զիդանի խաղը: Անհնար է առանց հիացմունքի դիտել նրա գործողությունները դաշտում: Իմ ամպլուայի խաղացողներից հավասարը չունի Չավի ԷրնանդեսԱնդրես Ինյեստա զույգը»:

«Կրիշտիանու Ռոնալդուն արժանի է կոչվելու լավագույնն աշխարհում»:

«Ռուսական ակումբներում ֆիզիկական պատրաստվածությունը երբեմն ամենաառաջին տեղում է»:

«Երբ վերադառնում եմ Բրազիլիա, դա ինձ համար իսկական տոն է: Ինձ համար դրանից ավելի լավ հանգիստ չի կարող լինել»:

«Մենք՝ բրազիլացիներս, ասում ենք, որ մրցակիցները մեզ խփում ենք այնքան գոլ, որքան կարողանում են, իսկ մենք՝ որքան ցանկանում ենք»:

«Բրազիլացի բոլոր ֆուտբոլիստներն էլ այսպես, թե այնպես առնչություն ունենում են հանցավոր աշխարհի հետ: Իսկ այն ֆուտբոլիստները, ովքեր բախտ չեն ունենում ստորագրելու լավ պայմանագրեր, իրենք էլ են դառնում հանցագործներ»:

«Եվրոպական ֆուտբոլի ոգին վաղուց արդեն հատուկ է նաև բրազիլացի ֆուտբոլիստներին և մարզիչներին, ովքեր շատ բան են սովորում Հին աշխարհամասում աշխատող իրենց գործընկերներից»:

««Կրասնոդար» տեղափոխվելուց հետո Յուրա Մովսիսյանը, կարելի է ասել, ինձ համար բարեխոսել էր՝ զանգահարելով իր նախկին թիմի ղեկավարներին և խնդրելով, որ ազատված 10 համարը հենց ինձ հատկացնեն»:

«Լատինաամերիկացի ֆուտբոլիստների տեխնիկան բնության շնորհ է, իսկ Եվրոպայում դրան ավելանում են նաև արագությունն ու տոկունությունը»:

«Չի կարելի ապրել միայն երազանքներով»:

«Հայաստանի հավաքականում հիանալի մթնոլորտ է տիրում և վայելում եմ այնտեղ անցկացրած յուաքանչյուր վայրկյանը»

«Ֆուտբոլում, ինչպես և այլ ոլորտներում, մասամբ որոշիչ նշանակություն ունի շանսը: Եթե քեզ շանս է ընձեռվում, երբեք չի կարելի այն ձեռքից բաց թողնել»:

««Անժին» ժամանակին լուրջ առաջարկություն էր արել Հենրիխ Մխիթարյանին, բայց նրա հրաժարվել էր: Նա ինձ գրել էր. «Հարցը փողը չէ: Ես երազում եմ խաղալ Եվրոպայում, թոփ-ակումբում»»:

«Ծնողներս այցելել էին Երևան և ներկա էին Հայաստանի հավաքականի խաղին: Նրանց Երևանը շատ դուր եկավ: Սա նրանց առաջին, բայց ոչ վերջին այցելությունն էր»:

«Հայաստանում անցկացրած կյանքս ծիածանի գույներով եմ հիշում»:

«Երբ նոր լեզու ես սովորում, հաճախ չես իմանում, թե ինչ ես ասում: Հավաքականում տղաները երբեմն կատակում էին, համոզում, որ մարզչին այս կամ այն բառն ասեմ: Ես էլ ասում էի: Բոլորը ծիծաղում էին, այդ թվում նաև ես»:

«Հայաստանի և հայերի շնորհիվ է, որ խաղացի Ռուսաստանի առաջնությունում, միջազգային մակարդակում, իմ մասին սկսեցին խոսել…: Նրանք միշտ սատարել են ինձ և իրենց սիրով օգնել հասնելու նոր բարձունքների»:

«Երբեք չեմ մոռանում իմ առաջին հայրենիքը: Բրազիլիայում են ապրում իմ ծնողները, ընկերները, և հարմար առիթի դեպքում անպայման հանդիպում եմ նրանց հետ»:

«Ես Հայաստանի հավաքականում իմ ամեն խաղով փորձում եմ շնորհակալություն հայտնել այս երկրին իմ նկատմամբ վերաբերմունքի համար»:

«Եթե հայտնվեի Աստծո առջև, կասեի. «Տեր Աստված, նայիր աշխարհին, այնտեղ շատ անարդարություններ են տեղի ունենում, շատ մարդիկ ուտելու ոչինչ չունեն, մինչդեռ մյուսները չգիտեն ուրիշ ինչ ցանկանան: Խնդրում եմ՝ այնպես արա, որ անարդարություններ քիչ լինեն»»:

Արման Աբելյան

Հայաստանի հավաքականի վերջին նորությունները

Հետևե՛ք VNews.am-ին նաև Youtube-ում և Instagram-ում:


Վարազդատ Հարոյանն ու Կամո Հովհաննիսյանը հոբելյաններ նշեցին իտալացիների հետ մղձավանջային խաղում

Խայտառակ վերջաբան. Հայաստանի հավաքականի ամենախոշոր հաշվով պարտությունն ու ամենագոլառատ խաղը

Ռոբերտո Մանչինի. «Ցավում եմ Հայաստանի մարզչի համար»

Արյունահեղություն Սիցիլիայում. Իտալիա – Հայաստան խաղի ֆոտոշարքը

Բոնուչի. «Սա նոր ժամանակաշրջանի սկիզբ է Իտալիայի համար»

Մխիթարյան. «Նա կարող է դառնալ աշխարհի լավագույն ֆուտբոլիստներից մեկը»

Մանչինչի. «Պաշտոնական խաղում ամեն օր չէ, որ 9 գոլ ես խփում»

ՀՖՖ-ն՝ իտալացիներին. «Դուք ոչինչ չգիտեք հյուրընկալության մասին»

Էդգար Բաբայան. «Շատ կներե՛ք. կփորձենք՝ նման բան այլևս չստացվի»

Արթուր Սարկիսով. «Որքան շատ էինք տանջվում, այնքան ավելի շատ էինք կործանվում»

Հովհաննես Համբարձումյան. «Շատ վատ արդյունք, շատ վատ խաղ, արժանի պարտություն» (Տեսանյութ)

Ուղիղ․ Աբրահամ Խաշմանյանի մամուլի ասուլիսը Իտալիա – Հայաստան (9-1) խաղից հետո

Խայտառակություն, որը սահմաններ չունի․ Իտալիան 9-1 հաշվով հաղթեց Հայաստանին (տեսանյութ)

Իտալիան 5-րդ անպատասխան գնդակն ուղարկեց Հայաստանի դարպասը (տեսանյութ)

Իտալիայի գոլային հրավառությունը․ VNews-ի ֆոտոշարքը հանդիպման առաջին խաղակեսից

Արդեն 4-0․ Իտալիան ջախջախում է Հայաստանին (տեսանյութ)