Խելահեղ մարզավիճակում գտնվող Մարկոս Պիզելին նոր նվաճման է հասել - VNews
Բաժիններ

Խելահեղ մարզավիճակում գտնվող Մարկոս Պիզելին նոր նվաճման է հասել

Մինչ ֆուտբոլային հանրության ուշադրության կենտրոնում Ռուսաստանում ընթացող ֆուտբոլի աշխարհի առաջնության մրցախաղերն են, Հայաստանի ազգային հավաքականի և ղազախական «Ակտոբեի» հարձակողական ոճի կիսապաշտպան Մարկոս Պիզելին հրաշքներ է գործում Ղազախստանի ընթացող առաջնությունում՝ աչքի ընկնելով աննախադեպ բարձր արդյունավետությամբ:

Հուլիսի 1-ին կայացած առաջնության 16-րդ տուրում Կարագանդայի «Շախտյորի» հետ խաղում էլ Մարկոսն իրեն գերազանց դրսևորեց՝ դառնալով մրցակցի դարպասը խփած իր թիմի 2 գեղեցիկ գոլերի հեղինակը: Հիշեցնենք, որ նախորդ տուրում՝ հունիսի 23-ին «Տոբոլի» հետ խաղում Մարկոսը դարձել էր հեթ-տրիքի հեղինակ:

Ի դեպ, «Տոբոլի» հետ հանդիպումը պաշտոնական մրցումներում Մարկոսի հոբելյանական՝ 400-րդ խաղն էր: Դրանցից 128-ը բրազիլացի ֆուտբոլիստն անցկացրել է ՀՀ առաջնություններում «Արարատի» և «Փյունիկի» կազմում, 13-ը՝ ՀՀ գավաթի, մեկը՝ Հայաստանի Սուպերգավաթի, 8-ը՝ հայկական ակումբների կազմում եվրոգավաթների մրցաշարերում, 62-ը՝ ՀՀ ազգային հավաքականում, 161-ը՝ արտերկրի առաջնություններում, 20-ը՝ այդ երկրների գավաթի մրցաշարերում, 7 անգամ էլ «Ակտոբեի» կազմում մասնակցել է եվրոգավաթների հանդիպումներին:

Այսպիսով, «Ակտոբեում» անցկացրած 12 հանդիպումներում խփած 11 գնդակով Մարկոսը ներկայումս գլխավորում է Ղազախստանի առաջնության լավագույն ռմբարկուների ցանկը: Նա 3 գնդակով գերազանցում է իրեն հետապնդող Պատրիկ Տվումասին («Աստանա») և Հաբիբ Էսեոլային («Ակժայիկ»):

Նշենք նաև, որ առաջնության վերջին 5 հանդիպումներում Մարկոսը խաղադաշտից առանց գոլի չի հեռացել՝ իր օգտին գրանցելով 9 գնդակ: Հարկ է նշել, որ Մարկոս Պիզելիի ներկայիս արդյունքը լավագույնն է արտերկրում հանդես գալիս: Մինչև ընթացիկ մրցաշրջանը նա առավել արդյունավետ էր գործել 2014թ. «Ակտոբեի» կազմում՝ առաջնության 28 հանդիպումներում դառնալով 8 գոլի հեղինակ:

Իսկ ահա Մարկոսի արդյունավետության բացարձակ ռեկորդը գրանցվել է 2007թ. «Արարատում» խաղալիս, երբ առաջնության 26 հանդիպումներում 22 գոլ էր խփել ու ճանաչվել էր մրցաշարի լավագույն ռմբարկու:

Ի դեպ, նշենք, որ ընդամենը 5 լրիվ մրցաշրջան անցկացնելով Հայաստանում` Մարկոսն «Արարատի» և «Փյունիկի» կազմերում ՀՀ առաջնություններում 75 գոլ է խփել՝ ցույց տալով լավագույն արդյունքն այլազգի ֆուտբոլիստների շրջանում:

Կարագանդայի «Շախտյորի» հետ խաղում դառնալով դուբլի հեղինակ` Մարկոս Պիզելին պաշտոնական մրցումներում խփած իր գոլերի քանակը հասցրեց 146-ի և ընդգրկվեց անկախության շրջանի հայկական ֆուտբոլի ամենաարդյունավետ ֆուտբոլիստների լավագույն տասնյակում:

Ինչպես արդեն վերը նշեցինք, գոլերից 75-ը Մարկոսը խփել է «Արարատում» և «Փյունիկում» ՀՀ առաջնություններում: Բացի այդ, բրազիլացի ֆուտբոլիստը 8 անգամ աչքի է ընկել Հայաստանի գավաթի հանդիպումներում, մեկ գնդակ է խփել Հայաստանի Սուպերգավաթի մրցաշարում, 2 անգամ էլ «Արարատում» գոլի հեղինակ է դարձել եվրոգավաթի հանդիպումներում: Ազգային հավաքականում Մարկոսի հաշվին 9 գոլ է գրանցված:

Արտերկրի 6 ակումբներում անցկացրած պաշտոնական մրցումներում Մարկոսի հաշվին առայժմ 51 գոլ է գրանցված: Դրանցից 44-ը նա խփել է այդ երկրների առաջնություններում, 7-ը՝ գավաթի մրցախաղերում:

Եվս 3 գոլ խփելու դեպքում Մարկոսը հայկական ֆուտբոլի ռմբարկուների ցանկում կշրջանցի Տիգրան Եսայանին ու Արման Քարամյանին և կհանգրվանի 8-րդ հորիզոնականում: Իսկ հետագայում կարող է փորձել շրջանցելու նաև 160 գոլի հեղինակ դարձած Արամ Ոսկանյանին:

Առայժմ Հայաստանի անկախության շրջանի հայկական ֆուտբոլի լավագույն ռմբարկուն Արսեն Ավետիսյանն է, ով պաշտոնական մրցումներում իր բոլոր 236 գոլերը խփել է հայկական ակումբներում և ՀՀ ազգային հավաքականում: Նրա ցուցանիշը գերազանցելու միակ թեկնածուն ներկայումս Հենրիխ Մխիթարյանն է:

Ճիշտ է, դրա համար Հենրիխից մեծ ջանքեր կպահանջվեն, քանի որ անհրաժեշտ է ևս 49 գոլ խփել: Իսկ դա այնքան էլ հեշտ խնդիր չէ՝ հաշվի առնելով Հենրիխի տարիքն ու տարեցտարի նվազող արդյունավետությունը:

Դրա վառ ապացույցը նախորդ մրցաշրջանն էր, որի ընթացքում «Մանչեսթեր Յունայթեդի» և «Արսենալի» կազմում անցկացրած պաշտոնական 39 հանդիպումներում Մխիթարյանն ընդամենը 5 անգամ գրավեց մրցակիցների դարպասները: Ազգային հավաքականի կազմում անցկացրած 10 հանդիպումներում էլ մեր ընտրանու ավագը 3 գոլ խփեց:

Իսկ ահա ՀՀ հավաքականի նախկին գլխավոր մարզիչ Արթուր Պետրոսյանի ցուցանիշը նոր մրցաշրջանում Հենրիխը պետք է որ գերազանցի և ռմբարկուների ցանկում հանգրվանի 2-րդ հորիզոնականում: Դրա համար նրան անհրաժեշտ է ընդամենը 4 գոլ խփել:

VNews.am-ը ներկայացնում է հայկական ֆուտբոլի լավագույն ռմբարկուների ցանկը, որոնք պաշտոնական մրցումներում 100 և ավելի գոլ են խփել: Հաշվի են առնված ՀՀ առաջնություններում (Ա), ՀՀ գավաթի մրցաշարերում (Գ), Հայաստանի Սուպերգավաթի հանդիպումներում (Ս), հայկական ակումբներում եվրոգավաթների մրցաշարերում (Ե), ՀՀ ազգային (ԱՀ) և երիտասարդական (ԵՀ) հավաքականներում, «Համագործակցության գավաթի» խաղարկություններում (ԱՊՀ) և արտերկրի բարձրագույն խմբի թիմերում (ԱԵ) պաշտոնական մրցումներում խփած գոլերը:

Ֆուտբոլիստներ Ա Գ Ս Ե ԱՀ ԵՀ ԱՊՀ ԱԵ ԸՆԴ
1.Արսեն Ավետիսյան 197 28 4 2 5 236
2.Արթուր Պետրոսյան 125 15 1 11 2 37 191
3.Հենրիխ Մխիթարյան 30 6 25 9 118 188
4.Արթուր Քոչարյան 140 23 4 19 186
5.Արա Հակոբյան 131 13 7 6 2 21 180
6.Վարդան Ղազարյան 20 2 155 177
7.Արամ Ոսկանյան 89 17 1 2 1 50 160
8.Արման Քարամյան 100 18 3 5 1 21 148
9.Տիգրան Եսայան 125 14 4 1 3 147
10.Մարկոս Պիզելի 75 8 1 2 9 51 146
11.Արամ Հակոբյան 110 26 4 2 2 2 146
12.Արմեն Շահգելդյան 105 19 3 3 6 10 146
13.Գեղամ Հովհաննիսյան 111 32 1 1 145
14.Վահե Յաղմուրյան 104 18 6 128
15.Յուրա Մովսիսյան 9 109 118
16.Սամվել Նիկոլյան 86 24 1 1 112
17.Վարազդատ Ավետիսյան 83 19 1 1 2 106
18.Մհեր Ավանեսյան 89 10 1 1 4 105
19.Արտյոմ Ադամյան 85 15 1 1 102
20.Շիրակ Սառիկյան 96 3 1 1 101

Աշոտ Հայրապետյան

Հայաստանի հավաքականի վերջին նորությունները

Միացի՛ր հայկական ամենասպորտային Instagram-ին:


Հայաստան-Քուվեյթ հանդիպումը չի կայանա

Վարդին փոխարինման մտավ և խփեց «Արսենալ» – «Լեսթեր» խաղի միակ ու հաղթական գոլը (տեսանյութ)

«Ռոման» վերջին մարզումն է անցկացրել «Միլանի» դեմ արտագնա խաղից առաջ (լուսանկարներ)

Ֆոնսեկան Մխիթարյանին նշել է թիմի տուգանայինների հիմնական իրացնողների թվում

«Ռոմայի» հայտացուցակը «Միլանի» դեմ մրցավեճի համար

Արամ Ոսկանյանի գլխավորած «Ատիրաուն» Ղազախստանի Պրեմիեր լիգայի ուղեգիր է նվաճել

Էվրա․ «Վան դե Բեկը հարկավոր չէ «Մանչեսթեր Յունայթեդին»

4 խաղ՝ 4 տարբեր քաղաքներում․ Ամենաուշագրավ փաստերը՝ VBET Հայաստանի Պրեմիեր լիգայի 9-րդ տուրին ընդառաջ

Ռուրյան դերբիում հաղթեց «Բորուսիան», «Չելսին» ու «Մանչեսթեր Յունայթեդը» չորոշեցին հաղթողին (տեսանյութ)

Խաղաղության կոչ աշխարհին՝ արցախցի երեխաներից. Մխիթարյանը տեսանյութ է հրապարակել

Կառլո Պելեգատի. «Ինձ շատ դուր է գալիս Մխիթարյանի խաղը»

Կավանին այսօր կարող է իր նորամուտը նշել «Մանչեսթեր Յունայթեդի» կազմում

«Ռոման» սկսել է նախապատրաստվել Ա սերիայի առաջատարի՝ «Միլանի» դեմ հանդիպմանը (լուսանկարներ)

Մխիթարյանի և Կումբուլայի կառուցած գոլային գրոհը՝ համակարգչային գրաֆիկայի միջոցով (տեսանյութ)

«Արարատը» խզել է պայմանագիրը Ալեքսանդր Կոզլովի հետ

Մխիթարյանի գնահատականները՝ «Յանգ Բոյսի» դեմ խաղում