fbpx

«Արարատ-73». Փառքի երկու գագաթին. «Արարատը»՝ առաջին շրջանի հաղթող

Այս տարի լրանում է հայկական ֆուտբոլի երբեմնի դրոշակակիր Երևանի «Արարատի» փառահեղ հաղթանակի 45-ամյակը: 1973թ. հայկական ֆուտբոլի տարեգրությունում մի նոր վառ ու անկրկնելի էջ գրվեց: «Արարատն» իսկական մարզական սխրանք գործեց՝ նվաճելով խորհրդային ֆուտբոլի ամենապատվավոր տիտղոսները՝ երկրի չեմպիոնի ոսկե մեդալներն ու բյուրեղապակյա գավաթը:

VNews.am-ը փառահեղ հաղթանակի 45-ամյակի կապակցությամբ շարունակում է մրցաշրջան-73-ում «Արարատի»  ելույթների մասին պատմող հոդվածաշարի տպագրությունը, ինչն անկասկած հաճելի հուշեր կարթնացնի ֆուտբոլասերներից շատերի մոտ:

 «Չոր»  հաշվով  5-րդ անընդմեջ  հաղթանակն  անհարմար մրցակցի նկատմամբ

 «Արարատ»  – ԲԿՄԱ  Մոսկվա`  1-0 (0-0)

Երևան, 8 հուլիսի, «Հրազդան» մարզադաշտ, 66 հազար հանդիսական:

Մրցավար՝ Վլադիմիր Ֆարդման (Եյսկ):

«Արարատ» – Ալյոշա Աբրահամյան – 5, Սանասար Գևորգյան – 5, Արմեն Սարգսյան – 5, Ալեքսանդր Կովալենկո – 5, Նորայր Մեսրոպյան – 5, Սերգեյ Պողոսյան – 5, Սերգեյ Բոնդարենկո – 5 (Արկադի Անդրեասյան, 46 – 5), Լևոն Իշտոյան – 5 (Նազար Պետրոսյան, 80 – 5), Էդուարդ Մարգարով – 5, Հովհաննես Զանազանյան – 5, Նիկոլայ Ղազարյան – 5:

ԲԿՄԱՎլադիմիր Աստապովսկի – 3, Վալենտին Ուտկին – 4,  Վլադիմիր Բաբենկո – 4, Յուրի Իստոմին – 4, Վլադիմիր Կապլիչնի – 4, Ֆարիդ Խիսամուտդինով – 3, Վլադիմիր Դորոֆեև – 3 (Վլադիմիր Պոլիկարպով, 72 – ա/գ), Վիլհելմ Տելինգեր – 3 (Բորիս Կոպեյկին, 55 – 3), Վլադիմիր Ֆեդոտով – 3, Սերգեյ Շլապակ – 4, Վլադիմիր Դուդարենկո – 3:

Գոլը՝ Մարգարով 51՛:

57-րդ րոպեին Անդրեասյանը  չիրացրեց 11մ հարվածը (բարձր):

Առաջնության առաջին շրջանի ավարտական տուրում «Արարատը»  սեփական հարկի տակ հյուրընկալեց Մոսկվայի ԲԿՄԱ-ին, որն ընթանում էր երկրորդ հորիզոնականում և ընդամենը 2 միավորով էր հետ մնում արարատցիներից:

Ուստի այդ խաղում հաղթանակի արժեքը շատ մեծ էր: Հաջողության դեպքում արարատցիները 4 միավորով առաջ կանցնեին բանակայիններից և կամրապնդեին առաջատարի իրենց դիրքը: Իսկ ահա պարտությունը զգալիորեն կշիկացներ մթնոլորտը մրցաշարային աղյուսակի վերին հորիզոնականներում, թեև նույնիսկ այդ դեպքում «Արարատը» կդառնար առաջին շրջանի հաղթող:

Նշենք, որ մինչև 1970թ. ԲԿՄԱ-ն ԽՍՀՄ առաջնություններում «Արարատի» ամենաանհարմար մրցակիցն էր: Արարատցիներին ոչ մի կերպ չէր հաջողվում հաղթել բանակայիններին: Եվ միայն թիմերի 19-րդ հանդիպման ժամանակ՝ 1970թ. մայիսի 20-ին Մոսկվայի «Դինամո» մարզադաշտում կայացած խաղում էր արարատցիներին հաջողվել առաջին հաղթանակը տոնել ՝ առավելության հասնելով 2-1 հաշվով:

Այդ հաղթանակը շրջադարձային եղավ: Հաջորդ երկու մրցաշրջաններում արդեն «Արարատն» էր դարձել ԲԿՄԱ-ի ամենադժվարին մրցակիցը՝  հաղթելով բոլոր 4 հանդիպումներում էլ ընդհանուր 5-0 հաշվով:

Այս անգամ էլ ավանդույթը չխախտվեց: Բանակայինները կրկին զիջեցին նվազագույն հաշվով՝ չկարողանալով խոցել Ալյոշա Աբրահամյանի պաշտպանած դարպասը: Ի դեպ, վերջինս արդեն առաջնության 6-րդ անընդմեջ խաղում դարպասն անառիկ պահեց: Մինչ այդ վերջին գոլն Աբրահամյանը  բաց էր թողել մայիսի 27-ին Ալմա Աթայում «Կայրաթի»  հետ կայացած 9-րդ տուրի խաղում:

Անբարենպաստ եղանակի պատճառով ԲԿՄԱ-ն Երևան ժամանեց միայն խաղի օրն առավոտյան: Դժվար էր ասել՝ հոգնածությունն էր պատճառը, թե նման վճռորոշ խաղում ռիսկի չդիմելու ցանկությունն էր ստիպել հյուրերին առաջին իսկ րոպեներից դիմելու խոր պաշտպանության: Նրանք անհատական հսկողության տակ էին առել արարատցիներին: Նույնիսկ Ֆեդոտովն էր նահանջել սեփական կիսադաշտ և ավելի շատ օգնում էր հետին գծի խաղացողներին, քան հարձակվողներին:

Նման պայմաններում արարատցիների խաղն առաջին խաղակեսում չստացվեց: Նրանք չկարողացան կոմբինացիոն խաղ ցուցադրել, հաճախ էին տարվում անհատական խաղով, լավ չէին օգտագործում հարձակման եզրերը: Առաջին 45 րոպեներին թերևս հիշատակության էին արժանի Զանազանյանի հեռահար 4 հարվածները, որոնցից և ոչ մեկը նպատակին չհասավ:

Անդրեասյանը չմերժեց խաղընկերներին ու խաղադաշտ դուրս եկավ

Ընդմիջումից հետո Նիկիտա Սիմոնյանը Բոնդարենկոյի փոխարեն խաղադաշտ դուրս բերեց Անդրեասյանին, ով հունիսի 13-ին, առաջնության 11-րդ տուրում «Շախտյորի» հետ կայացած խաղում ծանր վնասվածք ստանալուց հետո բավական ժամանակ չէր մարզվել: Ինչպես վերհիշում է Արկադի Անդրեասյանը, Սիմոնյանի այդ քայլն իր համար անսպասելի էր: Պարզվում է, որ ընդմիջմանը հանդերձարանում խաղընկերները խնդրել էին Անդրեասյանին խաղադաշտ դուրս գալ և օգնել թիմին: Բնականաբար, Անդրեասյանը չէր կարող մերժել խաղընկերներին:

Սակայն բավական ժամանակ չմարզվելն ու խաղային պրակտիկայի պակասը չար կատակ խաղացին Անդրեասյանի հետ: Այդ մասին մի փոքր հետո: Իսկ 2-րդ խաղակեսը սկսվեց բանակայինների գրոհներով և երկու անգամ Ֆեդոտովը վտանգավոր հարվածներ կատարեց «Արարատի» դարպասին:

Անդրեասյանի վերադարձը խաղադաշտ դրական ազդեցություն ունեցավ արարատցիների գործողություններում, որոնք շուտով բացեցին հաշիվը: Գրոհներից մեկի ժամանակ Խիսամուտդինովը սխալվեց՝ գնդակը փոխանցելով Պողոսյանին: Վերջինս այն անմիջապես հասցեագրեց Մարգարովին, որի հարվածն Աստապովսկին անզոր էր կասեցնել:

6 րոպե անց «Արարատը» հաշիվը կրկնապատկելու հիանալի առիթ ունեցավ: Իշտոյանն ու Ղազարյանը շրջանցեցին դարպասապահին, սակայն վերջին պահին պաշտպան Ուտկինն ակրոբատիկ ցատկով դարպասային գծի վրա որսաց գնդակը:

11մ հարվածի իրացումը վստահվեց Անդրեասյանին՝  հնարավորություն ընձեռելով նրան կրկնապատկելու հաշիվն ու հավասարվելու առաջնության լավագույն ռմբարկուների ցանկը գլխավորող Միխայիլ Բուլգակովին: Սակայն թերմարզվածությունն իր դերը խաղաց: Անդրեասյանը, ով մինչ այդ անվրեպ էր իրացրել կատարած 5 հարվածներն էլ (2-ը՝ հետխաղյա հարվածաշարում), այս անգամ վրիպեց: Նրա հարվածը բարձր ստացվեց:

Լավ էր, որ այդ ցավալի վրիպումը չազդեց խաղի ելքի վրա: Բանակայինները կարող էին հավասարեցնել հաշիվը, սակայն Աբրահամյանը հաղթող դուրս եկավ Կոպեյկինի հետ մենամարտում: Իսկ խաղավերջում գոլ խփելու լավ հնարավորությունները չօգտագործեցին Զանազանյանն ու Անդրեասյանը:

ԲԿՄԱ-ի նկատմամբ տոնած հաղթանակի շնորհիվ «Արարատը» 20 միավորով դարձավ առաջնության առաջին շրջանի հաղթող: Արարատցիներն ամրապնդեցին առաջատարի իրենց դիրքը՝ 4 միավորով առաջ անցնելով Մոսկվայի «Դինամոյից», «Շախտյորից»  և ԲԿՄԱ-ից: Նշենք, որ «Արարատն» առաջին անգամ առաջատարի դերը ստանձնել էր 9-րդ տուրում և մինչև առաջին շրջանի ավարտը ոչ մեկին չէր զիջել 1-ին հորիզոնականը:

«Արարատն» առջևում է նաև «Մեծ ֆուտբոլի մրցանակների» համար պայքարում

Առաջին շրջանում «Արարատի» ցույց տված արդյունքները վկայում էին մրցակիցների նկատմամբ հայ ֆուտբոլիստների անվիճելի առավելության մասին: Արարատցիները տոնել էին բոլորից շատ հաղթանակ (9), խփել էին բոլորից շատ գոլ (26)՝ առջևից ընթանալով Գ. Ֆեդոտովի անվան մրցանակի համար պայքարում: «Արարատը»  լավագույն արդյունքն ուներ նաև «Խոշոր հաշվով հաղթանակի» (4), «Լավագույն տարբերության» (+ 16), «Ագրեսիվ հյուրի» (7 միավոր, «Շախտյորի» հետ միասին) մրցանակների համար մղվող պայքարում, իսկ Արկադի Անդրեասյանը միայն մեկ գնդակով էր զիջում առաջնության լավագույն ռմբարկուների ցանկը գլխավորող սպարտակցի Միխայիլ Բուլգակովին (8), ով գոլերից 6-ը խփել էր 11մ հարվածով:

«Արարատի» կազմում 5 գոլի հեղինակ էր դարձել Նիկոլայ Ղազարյանը, 4 անգամ մրցակիցների դարպասը խոցել էր Էդուարդ Մարգարովը, 3 անգամ՝ Հովհաննես Զանազանյանը, 2-ական անգամ աչքի էին ընկել Սերգեյ Բոնդարենկոն, Լևոն Իշտոյանն ու Սերգեյ Պողոսյանը, մեկ գնդակ էլ խփել էր Նազար Պետրոսյանը:

«Ֆուտբոլ-Հոկեյ» շաբաթաթերթում ամփոփելով առաջին շրջանի արդյունքները, Վիկտոր Դուբինինն «Արարատի» մասին հետևյալն էր գրել. «Այսօր «Արարատն» արժանիորեն է գլխավորում մրցաշարային աղյուսակը: Երևանցիները պահպանել են իրենց ներուժը և ոսկե մեդալների համար պայքարում դիրքերն ամրապնդելու հիանալի հնարավորություն ունեն:

«Արարատը»  դեռևս 1971թ. էր վարպետ թիմի համբավ ձեռք բերել: Եվ թեև այդ տարի թիմը չեմպիոն չդարձավ, սակայն վառ հետք թողեց առաջնությունում: Վերջին երկու տարիներին  «Արարատը»  ոչ միայն պահպանեց, այլև կատարելագործեց իր խաղաոճը: Ինչպես ոչ մի թիմ, «Արարատը» գերազանց է խաղում եզրերով, որտեղ վարպետ կատարողներ ունի: Թիմն աչքի է ընկնում գրոհների արդյունավետությամբ: «Արարատն»  ուժեղ է նաև իր կազմի կայունությամբ, նաև ունի պահեստային խաղացողներ, որոնք խաղադաշտ դուրս գալիս կարող են բեկում մտցնել մրցակցությունում»:

Աշոտ Հայրապետյան

Հետևե՛ք VNews.am-ին նաև Youtube-ում և Instagram-ում:


Աբրահամ Խաշմանյանի յուրօրինակ հեթ-տրիկը հայկական ֆուտբոլում

Աշոտ Աղաբաբյանը վարվել էր Չելոյանցի պես․ Ի՞նչ էր պատահել 2000 թվականին Ճաղարյանի մրցավարության հետևանքով

Արկադի Անդրեասյան․ «Լսել եմ՝ Գյուլբուդաղյանցին Մխիթարյանի ասելով են նշանակել հավաքականի մարզիչ» (տեսանյութ)

Արմեն Սարգսյանը իրականացրել է փոքրիկ Մանվելի երազանքն (լուսանկարներ, տեսանյութ)

Մխիթարյանը հանդիպել է ՀՀ նախագահ Արմեն Սարգսյանին և մարզաշապիկ նվիրել (լուսանկար)

Փաշիկ Ալավերդյանը պարգևատրվել է «Հայրենիքին մատուցած ծառայությունների համար» 2-րդ աստիճանի մեդալով

«Ռեալին» հաղթած ԲԿՄԱ-ն պարտվեց «Վիկտորիային», «Այաքսը» շրջանցեց «Բավարիային» (տեսանյութ)

Պաշտոնական. Մարկոս Պիզելին՝ Ղազախստանի առաջնության լավագույն ֆուտբոլիստ

Նախագահ Արմեն Սարգսյանը պարգևատրել է Սիմոն Մարտիրոսյանին և Գոռ Մինասյանին

Արթուր Վանեցյանը պարգևատրել է Սերգեյ Բոնդարենկոյին

«Արարատ-73». Փառքի երկու գագաթին. «Արարատը» նվաճեց նաև չեմպիոնական բարձունքը

ԲԿՄԱ-ի հայազգի ֆուտբոլիստը Չեմպիոնների լիգայի Մ-19 մրցաշարում խաղացել է «Ռոմայի» դեմ

«Արարատ-73». Փառքի երկու գագաթին. Վերջին վճռորոշ քայլը դեպի չեմպիոնական բարձունքը

«Ռեալը» հաղթեց տևական դադարից հետո, «Ռոման» չնկատեց ԲԿՄԱ-ին (տեսանյութ)

Չեմպիոնների լիգա․ Բոլոր արդյունքները և գոլերն առաջին խաղակեսերից հետո (տեսանյութ)

«Արարատ-73». Փառքի երկու գագաթին. Կամային հաղթանակ, որն ավելի իրական դարձրեց չեմպիոնության նվաճումը