«Արարատ-73». Փառքի երկու գագաթին. «Արարատի» հաղթարշավն ընդհատվեց - VNews
Բաժիններ

«Արարատ-73». Փառքի երկու գագաթին. «Արարատի» հաղթարշավն ընդհատվեց

Այս տարի լրանում է հայկական ֆուտբոլի երբեմնի դրոշակակիր Երևանի «Արարատի» փառահեղ հաղթանակի 45-ամյակը: 1973թ. հայկական ֆուտբոլի տարեգրությունում մի նոր վառ ու անկրկնելի էջ գրվեց: «Արարատն» իսկական մարզական սխրանք գործեց՝ նվաճելով խորհրդային ֆուտբոլի ամենապատվավոր տիտղոսները՝ երկրի չեմպիոնի ոսկե մեդալներն ու բյուրեղապակյա գավաթը:

VNews.am-ը փառահեղ հաղթանակի 45-ամյակի կապակցությամբ շարունակում է մրցաշրջան-73-ում «Արարատի» ելույթների մասին պատմող հոդվածաշարի տպագրությունը, ինչն անկասկած հաճելի հուշեր կարթնացնի ֆուտբոլասերներից շատերի մոտ:

Ուկրաինական թիմերի հետ յոթնօրյակը սկսվեց պարտությամբ

«Դնեպր» Դնեպրոպետրովսկ«Արարատ»՝  1-1 (1-1),  5-4՝ 11մ

29 հուլիսի, «Մետեոր» մարզադաշտ,  36 հազար հանդիսական:

Մրցավար՝  Անատոլի Իվանով (Լենինգրադ):

«Դնեպր» – Լեոնիդ Կոլտուն – 5, Ստանիսլավ Եվսեենկո – 5, Նիկոլայ Բոգդանով – 5, Վլադիմիր Ֆեդորենկո – 5, Պյոտր Նայդա – 5, Վիկտոր Մասլով – 5 (Վիկտոր Նազարով, 66 – 5), Սերգեյ Սկլյար, Անատոլի Գրինկո – 5, Անատոլի Պիլիպչուկ – 5, Ալեքսեյ Խրիստյան – 5, Վալերի Պորկույան – 5:

«Արարատ» – Ալյոշա Աբրահամյան – 5, Սուրեն Մարտիրոսյան – 4, Արմեն Սարգսյան – 4, Արկադի Հարությունյան – 4, Նորայր Մեսրոպյան – 3, Արկադի Անդրեասյան – 4, Սերգեյ Բոնդարենկո – 4, Լևոն Իշտոյան – 3, Էդուարդ Մարգարով– 4, Սերգեյ Պողոսյան – 4, Նազար Պետրոսյան – 3 (Սամվել Պետրոսյան 77 – ա/գ):

Գոլերը՝ Մարգարով  29՛, Գրինկո  44՛, 11մ:

11մ հարվածներն իրացրին Նայդան, Սկլյարը, Բոգդանովը, Նազարովը, Պիլիպչուկը, Անդրեասյանը, Իշտոյանը, Մարտիրոսյանը, Հարությունյանը:

11մ հարվածները չիրացրին Գրինկոն, Ֆեդորենկոն (հարվածները հետ մղեց Աբրահամյանը), Պողոսյանը, Մարգարովը (հարվածները հետ մղեց Կոլտունը), Բոնդարենկոն:

Հուլիսի վերջն ու օգոստոսի սկիզբը շատ հագեցած էր «Արարատի» համար, որն ընդամենը 7 օրում արտագնա 3 հանդիպում պետք է անցկացներ ուկրաինական թիմերի հետ: Այդ փաստը Նիկիտա Սիմոնյանին խաղացանկից դժգոհելու առիթ էր տվել, որը նա արտահայտել էր «Զարյայի» հետ գավաթի քառորդ եզրափակիչ պատասխան հանդիպումից հետո: Եվ մարզչի մտահոգությունն իրոք տեղին էր:

Ստացվել էր այնպես, որ 4 օրվա ընթացքում «Արարատը» Դնեպրոպետրովսկում պետք է երկու անգամ մրցեր «Դնեպրի» հետ՝ սկզբում առաջնության խաղում, այնուհետև գավաթի կիսաեզրափակչում:

Հուլիսի 29-ին կայացած առաջնության 18-րդ տուրի խաղին «Արարատը» ներկայացել էր կազմի զգալի կորստով: Տարբեր պատճառներով բացակայում էին Ալեքսանդր Կովալենկոն, թիմի ավագ Հովհաննես Զանազանյանն ու Նիկոլայ Ղազարյանը:

Արարատցիները շատ ուշադիր սկսեցին հանդիպումը՝ լավ գիտակցելով, որ սեփական հարկի տակ «Դնեպրը» սովորաբար բուռն գրոհների է դիմում: Արարատցիների հետ խաղում էլ դաշտի տերերը հավատարիմ մնալով իրենց տակտիկական խաղաոճին, խաղադաշտ էին դուրս եկել 3 հարձակվողներով ու խաղասկզբում մեծ ուժերով գրոհում էին: Սակայն հանդիպելով հյուրերի պաշտպանական պատնեշին, այդ գրոհները մարում էին:

Մրցակցին տեխնիկապես գերազանցող արարատցիները շուտով իրենց հսկողության տակ առան դաշտի կենտրոնը և սկսեցին ավելի հաճախակի հակագրոհել: 29-րդ րոպեին արարատցիների ձեռնարկած սրընթաց գրոհը պսակվեց հաջողությամբ: Գտնվելով մրցակցի տուգանային հրապարակում, Մարգարովը ճիշտ կողմնորոշվեց և դժվարին դրությունից գրավեց դարպասը: Դա ԽՍՀՄ առաջնություններում Մարգարովի 110-րդ գոլն էր:

Թվում էր, թե արարատցիներին կհաջողվի զարգացնել հաջողությունը, սակայն մինչև ընդմիջման գնալը Խրիստյանին վայր գցելու համար նշանակվեց 11մ հարված և Գրինկոն վերականգնեց հավասարակշռությունը:

Աբրահամյանի գերազանց խաղն էլ միավոր չպարգևեց «Արարատին»

Ընդմիջումից հետո ձգտելով խնայել ուժերն առաջիկա գավաթային հանդիպման համար, արարատցիները զգալիորեն թուլացրին ակտիվությունը և նահանջեցին սեփական կիսադաշտ: «Դնեպրը» տարածքային առավելություն ստանալով, մի քանի վտանգավոր պահեր ստեղծեց, սակայն գերազանց խաղ ցուցադրեց Ալյոշա Աբրահամյանը՝ փրկելով թիմին վերահաս գոլերից:

«Արարատի»  դարպասապահն իրեն գերազանց դրսևորեց նաև հետխաղյա 11մ հարվածաշարի ժամանակ՝ հետ մղելով Գրինկոյի և Ֆեդորենկոյի հարվածները: Աբրահամյանն իրոք հանդիպման հերոսն էր: Ցավոք, նրա գերազանց խաղը բավարար չէր «Արարատին»  մրցակցին հաղթելու համար, քանի որ Պողոսյանը, Մարգարովն ու Բոնդարենկոն չկարողացան դիպուկ իրացնել 11մ հարվածները:

Այսպիսով, ընդհատվեց առաջնությունում «Արարատի»  5 անընդմեջ հաղթանակների տպավորիչ շարքը: «Արարատը»  թանկարժեք 2 միավոր կորցրեց: Ճիշտ է, մոտակա հետապնդողներից 5 միավորի տարբերությունը պահպանվեց, քանի որ հետաքրքիր զուգադիպությամբ Կիևի և Մոսկվայի դինամոյականներն էլ անհաջողության մատնվեցին՝  հետխաղյա 11մ հարվածներով (հիմնական ժամանակում գրանցվել էր 1-1 հաշիվ) զիջելով համապատասխանաբար Ռոստովի ԲՄԱ-ին ու «Կայրաթին»:

Փոխարենը ԲԿՄԱ-ն ու «Շախտյորն» էլ միացան դինամոյականներին՝ 5 միավորի տարբերությամբ հետապնդելով արարատցիներին: Իսկ առջևում «Արարատին» սպասում էր «Դնեպրի»  հետ կայանալիք գավաթի կիսաեզրափակիչ առաջին հանդիպումը:

Աշոտ Հայրապետյան

Միացի՛ր հայկական ամենասպորտային Instagram-ին:


#Throwback. Լուչեսկուի համեստ, բայց հզոր «Շախտյորը», որտեղ փայլեց Մխիթարյանը

ՀՀ նախագահը շնորհավորել է Մխիթարյանին հայր դառնալու կապակցությամբ

Լուչեսկու. «Մխիթարյանն ամենաուժեղ ֆուտբոլիստն է, որին երբևէ մարզել եմ»

«Կայրաթի» գլխավոր մարզիչ․ «Գիտենք, որ Կամոն գերազանց արագություն ու կատարողականություն ունի»

Կամո Հովհաննիսյանը «Կայրաթի» հավաքույթի ժամանակ կատարել է Թաթայի երգը (տեսանյութ)

Պաշտոնական. Կամո Հովհաննիսյանը՝ «Կայրաթի» ֆուտբոլիստ

Կամո Հովհաննիսյանը մարզվում է «Կայրաթի» հետ

Մխիթարյանը եվրագավաթներում 100 խաղի սահմանագիծը հատած առաջին հայ ֆուտբոլիստն է

Մխիթարյան-200․ Հենրիխի համար հոբելյանական էր «Վերոնայի» դեմ խաղում խփած գոլը

«Ման․ Սիթին» չպահպանեց հաղթական հաշիվը, «Ատալանտան» հաղթեց Զագրեբի «Դինամոյին» (տեսանյութ)

Լուրջ սկանդալ Ուկրաինայում. «Շախտյորի» ֆուտբոլիստը ռասիզմի զոհ է դարձել, կրքերը բորբոքվել են (տեսանյութ)

«Խեղված ճակատագրեր». Ֆուտբոլիստներ, որոնք վնասվածքից հետո այդպես էլ չվերադարձան իրենց մակարդակին

Մորատան փոխարինման մտավ և հաղթանակ պարգևեց «Ատլետիկոյին», արդյունավետ ոչ-ոքի Ուկրաինայում (տեսանյութ)

«Էսպանյոլի» կիսապաշտպանը եվրագավաթներում գոլ խփած առաջին չինացին է

«Մանչեսթեր Սիթին» առավելության հասավ Զագրեբի «Դինամոյի» նկատմամբ (տեսանյութ)

Նախագահ Արմեն Սարգսյանը գրառում է կատարել Հենրիխ Մխիթարյանի հետ ունեցած հանդիպման վերաբերյալ