Մենամարտի են դուրս գալու փոխչեմպիոնն ու չեմպիոնը․ Ամենահետաքրքիրը՝ «Բանանց» – «Ալաշկերտ» խաղին ընդառաջ

«ԲԱՆԱՆՑ» – «ԱԼԱՇԿԵՐՏ»

16 սեպտեմբերի, ժ.16:00, Երևան, «Բանանց-1» մարզադաշտ, 8-րդ տուր

24 խաղ, «Բանանցը» հաղթել է 6 անգամ, «Ալաշկերտը»՝ 10, գրանցվել է 8 ոչ-ոքի, խփած և բաց թողած գոլերի հարաբերակցությունը՝ 35-41

Լավագույն մեկնարկը վերջին 8 առաջնություններում

Անհաջող մեկնարկից հետո, որում «Բանանցը» 3 խաղում ընդամենը մեկ միավոր էր վաստակել, երկրի փոխչեմպիոնը վերելքով հանդես եկավ՝ տոնելով 3 անընդմեջ հաղթանակ «Արարատի» (4-2), «Փյունիկի» (4-2) և «Գանձասար-Կապանի» (1-0) նկատմամբ:

Արամ Ոսկանյանից թիմի ղեկը ստանձնած Իլշատ Ֆայզուլինին շատ կարճ ժամանակահատվածում հաջողվեց կարգավորել «Բանանցի» խաղը ու շտկել մրցաշարային վիճակը: Ներկայումս «Բանանցը» 6 խաղից հետո վաստակած 10 միավորով ընթանում է 4-րդ հորիզոնականում՝ հավասար ցուցանիշներ ունենալով «Ալաշկերտի» հետ, որն այս պահի դրությամբ 5 հանդիպում է անցկացրել: Այնպես որ 8-րդ տուրի կենտրոնական խաղում հաղթանակի արժեքը շատ բարձր է:

«Բանանցը» կրկին վերագտել է իր խաղը, իսկ թիմի ավագ Վահագն Այվազյանն իրավամբ դարձել է կոլեկտիվի առաջատարներից մեկը՝ աչքի ընկնելով տուգանային հարվածների հիանալի կատարմամբ: Նա 3 գնդակով գլխավորում է թիմի լավագույն ռմբարկուների ցանկը:

«Բանանցի» ներկայիս արդյունքը լավագույնն է թիմի պատմության մեջ վերջին 8 առաջնություններում: Ավելի հաջող թիմն առաջնությունը սկսել էր 2010թ.՝ մակեդոնացի Ստևիցա Կուզմանոսկու գլխավորությամբ մեկնարկային 6 հանդիպումներում վաստակելով 11 միավոր:

«Ալաշկերտը» կրկնեց խոշոր հաշվով հաղթանակի իր ռեկորդը

«Ալաշկերտն» առայժմ փոփոխական հաջողությամբ է հանդես գալիս: Մեկնարկային երկու հանդիպումներում նվազագույն հաշվով հաղթելով «Արարատին» ու «Գանձասար-Կապանին», ալաշկերտցիները հաջորդ երկու խաղերում ընդամենը մեկ միավոր վաստակեցին:

Եվ ահա նախորդ տուրում չեմպիոնը վերջապես աչքի ընկավ իրեն բնորոշ խաղով ու արդյունավետությամբ՝ 6-0 հաշվով ջախջախելով Բարձրագույն խմբի նորեկ «Արցախին», որին նույնպիսի արդյունքով հաղթել էր նաև նախորդ տարի ՀՀ գավաթի մրցաշարում:

«Ալաշկերտը» Բարձրագույն խմբում իր ամենախոշոր հաշվով հաղթանակը տոնեց: Դրանում իր մեծ ներդրումն ունեցավ վերջին երկու առաջնությունների լավագույն ռմբարկու Արտակ Եդիգարյանը, ով վերջապես բացեց գոլերի հաշիվն ընթացիկ մրցաշարում՝ դառնալով առաջնությունում գրանցված առաջին հեթ-տրիքի հեղինակը:

Հետաքրքիր 5 փաստ՝ հանդիպմանն ընդառաջ

• Նախորդ առաջնությունում մրցակիցների միջև կայացած հանդիպումներում թիմերից յուրաքանչյուրը սեփական հարկի տակ մեկական հաղթանակ է տոնել, 4 խաղ ավարտվել է ոչ-ոքի միևնույն 2-2 հաշվով: Ընդ որում «Ալաշկերտին» 2 անգամ, «Բանանցին»՝ մեկ անգամ հաջողվել է 0-2 հաշվի ժամանակ խուսափել պարտությունից: Նախորդ մրցաշրջանում մրցակիցները հանդիպել են նաև ՀՀ գավաթի կիսաեզրափակչում, որում կայացած երկու հանդիպումներում էլ նվազագույն հաշվով հաղթել է «Ալաշկերտը»:

• Նախորդ առաջնության 5-րդ շրջանում «Ալաշկերտի» նկատմամբ տոնած հաղթանակով «Բանանցն» ընդհատել էր չեմպիոնի հետ առաջնության հանդիպումներում առանց հաղթանակների 11 խաղերի շարքը, որում միայն 3-ում  էր կարողացել մեկական միավոր վաստակել: Իսկ մինչ այդ վերջին հաղթանակն «Ալաշկերտի»  նկատմամբ «Բանանցը»  տոնել էր 2016թ. մարտի 12-ին՝ սեփական հարկի տակ առավելության հասնելով 2-0 հաշվով:
• «Ալաշկերտը» «Բանանցի» հետ հատկապես հաջող է խաղացել սեփական հարկի տակ՝ մնալով անպարտելի: 12 հանդիպումներից 7-ում ալաշկերտցիները հաղթել են, 5-ում գրանցվել է ոչ-ոքի:
• Վարուժան Սուքիասյանի օրոք «Ալաշկերտին» դեռ չի հաջողվել առաջնությունում հաղթել «Բանանցին»: Կայացած երկու հանդիպումներից առաջինում չեմպիոնը հյուրընկալվելիս պարտվել է 0-3 հաշվով, իսկ երկրորդում սեփական հարկի տակ գրանցվել է ոչ-ոքի՝  2-2:

• Նախորդ առաջնությունում մրցակիցների մրցավեճում արդյունավետությամբ աչքի են ընկել Արտակ Եդիգարյանն ու Լեսթեր Պելտիերը՝ խփելով 4-ական գնդակ: Ընդ որում Պելտիերն առաջին գոլը խփել է «Ալաշկերտի» կազմում, իսկ առաջնության գարնանային հատվածում հանդես գալով «Բանանցում»` 3 անգամ գրավել է իր նախկին թիմի դարպասը: Ղուկաս Պողոսյանն էլ «Բանանցում» խփած միակ գոլն իր հաշվին է գրանցել հենց «Ալաշկերտի» հետ խաղում:

Գլխավոր հակամարտությունը՝ «Բանանցի» կիսապաշտպանություն VS «Ալաշկերտի» կիսապաշտպանություն

2 թիմի դեպքում էլ գլխավոր ուժը կիսապաշտպանությունն է։ Պատահական չէ, որ թե՛ «Բանանցը», թե՛ «Ալաշկերտը» դավանում են 4-2-3-1 մարտավարությունը, իսկ «կրակակետերն» արագաշարժ եզրերն են։ Կիսապաշտպաններին, բնականաբար, օգնության են հասնում նաև եզրային պաշտպանները։ Մրցակցության տեսանկյունից նախանձելի իրավիճակ է «Ալաշկերտում», որտեղ մարզչական շտաբը ցանկության դեպքում ամեն խաղում կարող է ռոտացիայի դիմել ու նոր ֆուտբոլիստների վստահել։

Մրցակից թիմերում ամենավտանգավորն այս պահին ձախ եզրն է։ «Ալաշկերտում» լավ մարզավիճակում է Ղուկաս Պողոսյանը, իսկ խորքից անընդհատ աջակցում է Գագիկ Դաղբաշյանը։ «Բանանցում» էլ իրեն վերջին շրջանում հիանալի է դրսևորում Իգոր Ստանոևիչը, բայց գրոհներին ավելի շատ միանում է աջ եզրային Վահագն Այվազյանը։ Բացի այդ, Արթուր Եդիգարյան–Արտակ Գրիգորյան տանդեմը փորձելու է հենակետային գոտում իշխանություն հաստատել Հակոբ Հակոբյան–Սոլոմոն Իմե Ուդո զույգի նկատմամբ։

Դիմակայության լավագույն ռմբարկուները`

«Բանանց»՝ Վահագն Այվազյան՝ 4 գոլ:

«Ալաշկերտ»՝ Արտակ Եդիգարյան, Միհրան Մանասյան՝ 9-ական գոլ:

Աշոտ Հայրապետյան

Միացի՛ր հայկական ամենասպորտային Instagram-ին: