Էդվարդ Կպոդոն վերադառնում է Գյումրի․ Ամենահետաքրքիրը՝ «Շիրակ» – «Բանանց» խաղին ընդառաջ

«ՇԻՐԱԿ» – «ԲԱՆԱՆՑ» 

29 սեպտեմբերի, ժ.14:00, Գյումրի, Քաղաքային մարզադաշտ, 10-րդ տուր

75 խաղ, «Շիրակը» հաղթել է 23 անգամ, «Բանանցը»՝ 33, գրանցվել է 19 ոչ-ոքի, խփած և բաց թողած գոլերի հարաբերակցությունը՝ 72-121

1-ին շրջան. 04.08.2018 «Բանանց» 0-0 «Շիրակ»

Առաջին հաղթանակը պետք է ոգեշնչի շիրակցիներին

Այս հանդիպումով մեկնարկում է առաջնության 2-րդ շրջանը: Նախորդ տուրում «Շիրակին» վերջապես հաջողվեց ընթացիկ առաջնությունում վայելել հաղթանակի բերկրանքն՝ ընդհատելով առանց հաղթանակների 7 խաղերի տխուր շարքը: Շիրակցիները սեփական հարկի տակ վստահ հաղթանակ տոնեցին մրցակիցների դաշտերում առայժմ անհաջող հանդես եկող «Արցախի» նկատմամբ՝ 3 անպատասխան գնդակ խփելով հակառակորդի դարպասը:

Հատկանշական է, որ բոլոր գոլերն էլ հեղինակեցին թիմի լեգեոնականները, որոնք խաղից խաղ ավելի հստակ են համագործակցում հայ ֆուտբոլիստների հետ:

Ինչ խոսք, այդ հաղթանակը կոգեշնչի շիրակցիներին, որոնք առաջիկա հանդիպումներում կփորձեն զարգացնել հաջողությունն ու շտկել մրցաշարային վիճակը: Այդ առումով «Շիրակի» համար անչափ կարևոր է առաջատարներից մեկի հետ կայանալիք հանդիպումը:

«Բանանցը» շարունակեց հաղթարշավը

«Բանանցը» շարունակում է ուրախացնել իր երկրպագուներին: Նախորդ տուրում թիմը ևս մեկ վստահ հաղթանակ տոնեց՝  3-1 հաշվով առավելության հասնելով «Արարատ-Արմենիայի» նկատմամբ: Դա առաջնությունում «Բանանցի» տոնած 5-րդ անընդմեջ հաղթանակն էր, որով Իլշատ Ֆայզուլինի սաները կրկնեցին «Լոռիի» ռեկորդային ցուցանիշը: Այդ հաղթանակը նաև հնարավորություն տվեց միավորներով հավասարվելու առաջնության առաջատար «Լոռիին»:

Իլշատ Ֆայզուլինին շատ կարճ ժամանակահատվածում հաջողվեց կարգավորել «Բանանցի» խաղը, որը ներկայումս աչքի է ընկնում իր դիտարժանությամբ: «Բանանցն» ունի խաղային իր հստակ ձեռագիրը, աչքի է ընկնում խաղային տարբեր մարտավարությամբ, որն իրավիճակից կախված հմտորեն փոփոխվում է:

Առաջին շրջանում թիմի ունեցած ելույթները վկայում են, որ «Բանանցը» մարտունակ կոլեկտիվ է և ունակ է պայքարելու չեմպիոնի տիտղոսի համար: Իսկ դրա համար հարկավոր է շարունակել հաղթարշավը:

Հետաքրքիր 5 փաստ՝ խաղին ընդառաջ

• Մրցակիցների միջև կայացած առաջնության նախորդ 3 հանդիպումներն անցել են «Շիրակի» առավելությամբ, որոնք տոնել են երկու հաղթանակ, մեկ խաղ ավարտել են գոլազուրկ ոչ-ոքի: Ընդ որում «Բանանցին» չի հաջողվել գտնել «Շիրակի» դարպասի բանալին: Վերջին հաղթանակը շիրակցիների նկատմամբ «Բանանցը» տոնել է նախորդ առաջնության գարնանային հատվածի մեկնարկային տուրում՝  մարտի 4-ին Գյումրիում կայացած խաղում 3 անպատասխան գնդակ ուղարկելով մրցակցի դարպասը:

• Նախորդ առաջնության նույն ժամանակահատվածի համեմատ «Բանանցը» 4 միավոր ավելի է վաստակել: Թիմի ներկայիս արդյունքը լավագույնն է վերջին 8 առաջնություններում: Ավելի հաջող «Բանանցն»  առաջնությունը սկսել էր 2010թ.՝ մակեդոնացի Ստևիցա Կուզմանոսկու գլխավորությամբ մեկնարկային 8 հանդիպումներում վաստակելով 17 միավոր:
• Իսկ ահա «Շիրակը» զգալի հետընթաց է ունեցել՝  8 միավոր պակաս վաստակելով: Նախորդ առաջնության 8-րդ տուրից հետո գյումրեցիները 16 միավորով 2-րդ տեղում էին և մեկ միավոր էին զիջում առաջատար «Ալաշկերտին»: «Շիրակի» արդյունքը վատագույնն է վերջին 8 առաջնություններում: Ավելի անհաջող գյումրեցիները հանդես են եկել 2010թ.՝ Վարդան Բիչախչյանի գլխավորությամբ պարտվելով մեկնարկային 8 հանդիպումներում էլ:
• Առաջին շրջանում «Բանանցի» կազմում ասպարեզ դուրս եկան 20 ֆուտբոլիստներ, որոնցից 10-ը լեգեոնականներ էին: Բոլորից արդյունավետ գործեց թիմի ավագ Վահագն Այվազյանը՝ խփելով 4 գնդակ:

• Վարդան Բիչախչյանն առաջին շրջանի հանդիպումներում խաղադաշտ դուրս բերեց 19 ֆուտբոլիստների, որոնցից 9-ը լեգեոնականներ էին: Բոլոր հանդիպումներին առանց փոխարինման մասնակցել են դարպասապահ Վսևոլոդ Երմակովն ու թիմի ավագ Աղվան Դավոյանը: Առավել արդյունավետ է գործել Պաբլո Կրուզը, որի հաշվին 2 գոլ է գրանցված:

Գլխավոր դիմակայությունը՝ Էդվարդ Կպոդո VS «Շիրակ»

Բոլորն են հիշում, թե ինչ է տեղի ունեցել այս թիմերի՝ նախորդ առաջնության վերջնամասում կայացած մրցավեճից հետո։ Եվ ամբողջ աղմուկը կապված էր հիմնականում Էդվարդ Կպոդոյի անվան հետ։ Վերջինս նախկինում եղել է հենց «Շիրակի» ֆուտբոլիստ, իսկ հիմա պաշտպանում է «Բանանցի» մարզական պատիվը։

Առաջին շրջանում, երբ «Բանանցն» ու «Շիրակը» հանդիպել էին Երևանում, խաղից առաջ կայացած ավանդական ձեռքսեղման ժամանակ Գյումրին ներկայացնող թիմի բոլոր ֆուտբոլիստները հրաժարվել էին ողջունել Կպոդոյին։ «Բանանցի» պաշտպանության առաջատարներից մեկն «Արարատ-Արմենիայի» հետ վերջին հանդիպումը բաց է թողել ոչ լուրջ վնասվածքի պատճառով և, ամենայն հավանականությամբ, պատրաստ կլինի վաղը խաղալ «Շիրակի» դեմ։ Երկրպագուներն, անկասկած, «ջերմ» ընդունելություն կկազմակերպեն նրա համար։

Դիմակայության լավագույն ռմբարկուները՝    

 «Բանանց»՝ Արամ Հակոբյան, Արսեն Բալաբեկյան՝ 8-ական գոլ:

 «Շիրակ»՝ Անդրանիկ Բարիկյան՝ 8 գոլ:

«Բանանցի» կազմում հանդիպմանը չի մասնակցի 2 խաղով որակազրկված Արամ Լոռեցյանը:

Աշոտ Հայրապետյան

Հետևե՛ք VNews.am-ին նաև Youtube-ում և Instagram-ում: