«Բանանցը» հյուրընկալվելիս երբեք չի հաղթել «Ալաշկերտին»․ Ամենահետաքրքիրը՝ «Ալաշկերտ» – «Բանանց» խաղին ընդառաջ

«ԱԼԱՇԿԵՐՏ» – «ԲԱՆԱՆՑ»

24 նոյեմբերի, ժ.14:30, Երևան, «Նաիրի» մարզադաշտ, 17-րդ տուր

25 խաղ, «Ալաշկերտը» հաղթել է 10 անգամ, «Բանանցը»` 7, գրանցվել է 8 ոչ-ոքի, խփած և բաց թողած գոլերի հարաբերակցությունը՝ 41-36

1-ին շրջան. 16.09.2018 «Բանանց» 1-0 «Ալաշկերտ»
Գոլը՝ Ադամու Աբդուլահի 68՛:

Հաղթարշավն ընդհատվեց, «չոր» խաղերի շարքը շարունակվում է

Երկշաբաթյա ընդմիջումից հետո այս հանդիպումով վերսկսվում է ֆուտբոլի Հայաստանի Բարձրագույն խմբի առաջնությունը, որում սուր մրցակցություն է ծավալվել չեմպիոնի տիտղոսի համար: 17-րդ տուրի կենտրոնական այս խաղում հաղթանակի գինը չափազանց բարձր է և կարելի է ասել, որ 6 միավորի արժեք ունի:

«Ալաշկերտը» 29 միավորով միանձնյա գլխավորում է մրցաշարային աղյուսակը՝ 3 միավորով գերազանցելով 3-րդ տեղում ընթացող «Բանանցին»: Այդ առավելությունն ավելի մեծ կլիներ, եթե նախորդ տուրում չընդհատվեր «Ալաշկերտի» 6 անընդմեջ հաղթանակների տպավորիչ շարքը, որից 5-ը գրանցվել էր Արամ Ոսկանյանի գլխավորությամբ:

Նախորդ տուրում «Ալաշկերտին» չհաջողվեց առավելության հասնել «Արցախի» նկատմամբ, որին առաջին շրջանում հաղթել էր խոշոր՝ 6-0 հաշվով: Վերջին 7 հանդիպումներում առաջին անգամ ալաշկերտցիներին չհաջողվեց գրավել մրցակցի դարպասը. գրանցվեց գոլազուրկ ոչ-ոքի:

Անշուշտ, կարևորագույն այս խաղում չեմպիոնը ներդնելու է իր ողջ կարողությունները հաղթանակի հասնելու համար: Այն լավ նախադրյալներ կստեղծի առաջնության աշնանային հատվածն առաջին հորիզոնականում ավարտելու համար:

«Բանանցին» հաղթանակն օդ ու ջրի պես է անհրաժեշտ

«Բանանցը», որ իր տպավորիչ ելույթներով ուրախացնում էր թիմի երկրպագուներին, վերջին երկու հանդիպումներում անսպասելիորեն կտրուկ «արգելակեց»՝ պարտվելով «Փյունիկին» (0-2) և «Գանձասար-Կապանին» (0-3): Առաջնության ամենաարդյունավետ թիմերից մեկը, որ նախորդ 12 հանդիպումներում 20 գոլ էր խփել, վերջին երկու խաղերում այդպես էլ չգտավ մրցակիցների դարպասի բանալին՝ սեփականն ընդունելով 5 գոլ:

Այդ պարտությունները թանկ նստեցին «Բանանցի» վրա, որը կորցրեց մրցակիցների նկատմամբ ունեցած առավելությունն ու առաջատարի իր դիրքը և նահանջեց 3–րդ հորիզոնական: Այնպես որ չեմպիոնի հետ մրցավեճում «Բանանցին» հաղթանակն օդ ու ջրի պես է անհրաժեշտ:

Հետաքրքիր 5 փաստ՝ հանդիպմանն ընդառաջ

• Մրցակիցների միջև կայացած առաջնության վերջին 5 հանդիպումներում «Ալաշկերտին» չի հաջողվել հաղթել «Բանանցին»՝ կրելով 2 պարտություն, 3 խաղ ավարտելով ոչ-ոքի: Վերջին հաղթանակը «Բանանցի» նկատմամբ «Ալաշկերտը» տոնել է անցյալ տարվա սեպտեմբերի 30-ին՝ սեփական հարկի տակ առավելության հասնելով 2-0 հաշվով:
•  «Ալաշկերտը» «Բանանցի» հետ շատ հաջող է խաղացել սեփական հարկի տակ՝ մնալով անպարտելի: 12 հանդիպումներից 7-ում ալաշկերտցիները հաղթել են, 5-ում գրանցվել է ոչ-ոքի: Ընդ որում «Նաիրի» մարզադաշտում կայացած վերջին երկու խաղերն էլ ավարտվել են 2-2 հաշվով:
• 2016/17թթ. առաջնությունում ընդամենը 3 խաղով ստանձնելով «Ալաշկերտի» գլխավոր մարզչի պաշտոնը` Արամ Ոսկանյանն իր նոր սաների հետ առաջին իսկ խաղում 2-1 հաշվով հաղթել է «Բանանցին»:

• Իսկ ահա «Բանանցն» Արամ Ոսկանյանի գլխավորությամբ «Ալաշկերտի» հետ անցկացրած առաջնության 9 հանդիպումներից միայն մեկում է հաղթել, 5-ում գրանցվել է ոչ-ոքի (բոլորն էլ՝ 2-2 հաշվով), 3-ում պարտվել է:
• Ընթացիկ առաջնության վերջին 5 խաղերում «Ալաշկերտի» դարպասապահ Օգնեն Չանչարևիչը դարպասն անառիկ է պահել: Վերջին գոլը նա բաց է թողել սեպտեմբերի 30-ին «Արարատի» հետ կայացած հանդիպման 67-րդ րոպեին: Եթե Չանչարևիչին հաջողվի «Բանանցի» հետ հանդիպման առաջին 27 րոպեներին դարպասն անառիկ պահել, ապա կընդգրկվի դարպասապահների խորհրդանշական «500-ի ակումբում»:

Դիմակայության լավագույն ռմբարկուները`

«Ալաշկերտ»՝ Արտակ Եդիգարյան, Միհրան Մանասյան՝ 9-ական գոլ:

«Բանանց»՝ Վահագն Այվազյան՝ 4 գոլ:

Ալաշկերտցիներից այս հանդիպումն էլ բաց կթողնի 4 խաղով որակազրկված Ջեֆերսոն Ռեիսը, ինչպես նաև նախորդ տուրում խաղադաշտից հեռացված Տարոն Ոսկանյանը:

Հավանական մեկնարկային կազմեր՝

«Ալաշկերտ»․ Օգնեն Չանչարևիչ – Գագիկ Դաղբաշյան, Դանիել Ստոյկովիչ, Գորան Անտոնիչ, Մլադեն Զելկովիչ – Արտակ Գրիգորյան, Արթուր Եդիգարյան, Արտակ Դաշյան – Արտակ Եդիգարյան, Գուստավո Մարմենտինի – Ուրոշ Նենադովիչ։

«Բանանց»․ Արամ Հայրապետյան – Նարեկ Պետրոսյան, Էդվարդ Կպոդո, Իլյա Գուլտյաև, Վահագն Այվազյան – Սոլոմոն Իմե Ուդո, Հակոբ Հակոբյան, Արամ Բարեղամյան – Իգոր Ստանոևիչ, Ադամու Աբդուլահի – Նաթանիել Ասամոա։

Աշոտ Հայրապետյան

Միացի՛ր հայկական ամենասպորտային Instagram-ին: