fbpx

Հայկական 13 թիմում խաղացած ֆուտբոլիստը, 15-ամյա չեմպիոն Մանուչարյանը և այլ բացառիկ ռեկորդներ․ ՄԱՍ 2

VNews.am-ը ֆուտբոլասերներին ներկայացրել էր ՀՀ առաջնությունների մասնակիցների սահմանած անհատական բացառիկ ռեկորդների առաջին մասը: Այսօր կանդրադառնանք անհատական ռեկորդների եզրափակիչ՝ 2-րդ մասին:

Պաշտոնական մրցումներում անցկացրած խաղերի քանակով ռեկորդակիրը Սարգիս Հովսեփյանն է, ով «Փյունիկում» և Հայաստանի ազգային հավաքականում ընդհանուր առմամբ 605 հանդիպման է մասնակցել: Հովսեփյանին է պատկանում նաև պաշտոնական մրցումներում միևնույն թիմի կազմում անցկացրած խաղերի քանակով ռեկորդը: Նա «Փյունիկի» կազմում 473 խաղի է մասնակցել: Այդ խաղերից 365-ը Հովսեփյանն անցկացրել է բարձրագույն խմբում, 66-ը՝ ՀՀ գավաթի, 3-ը՝ Սուպերգավաթի, 26-ը՝ եվրագավաթների, 13-ը՝ «Համագործակցության գավաթի» խաղարկություններում: Հովսեփյանի ցուցանիշը դեռ երկար ժամանակ անգերազանցելի կմնա: Գործող ֆուտբոլիստներից լավագույն արդյունքն ունի 38-ամյա Գևորգ Կասպարովը՝ 444 խաղ:

ՀՀ առաջնություններում անցկացրած խաղերի քանակով յուրօրինակ ռեկորդակիրը Հովհաննես Թահմազյանն է, ով «Շիրակում» և «Միկայում» ընդհանուր առմամբ 461 հանդիպման է մասնակցել: Նա Հայաստանի առաջին 20 առաջնությունների միակ անփոփոխ մասնակիցն է: Թահմազյանին է պատկանում նաև միևնույն թիմի կազմում ՀՀ առաջնություններում անցկացրած խաղերի քանակով ռեկորդային ցուցանիշը: Նա «Շիրակի» կազմում Բարձրագույն խմբում 378 խաղ է անցկացրել: Գործող ֆուտբոլիստներից իր ներկայիս տեմպերով Թահմազյանի ռեկորդը կարող է գերազանցել 23-ամյա փյունիկցի Ալիկ Առաքելյանը, ով Բարձրագույն խմբում 154 խաղ է անցկացրել: Ռեկորդակիր դառնալու համար նրանից առնվազն 11 մրցաշրջան կպահանջվի:

Բոլորից երկար՝ 20 մրցաշրջան Հայաստանի առաջնություններում հանդես են եկել Հովհաննես Թահմազյանը (1992-2011թթ.) և Գևորգ Կասպարովը (1997-2002, 2004-2006, 2008-2019թթ.):

Դարպասապահներից պաշտոնական մրցումներում անցկացրած խաղերի քանակով ռեկորդակիրը Գևորգ Կասպարովն է, ով 444 խաղի է մասնակցել: Բարձրագույն խմբում անցկացրած խաղերի քանակով էլ (327) Կասպարովի ցուցանիշը ռեկորդային է դարպասապահների մեջ: Նա ՀՀ Բարձրագույն խմբի առաջնությունների մասնակից միակ դարպասապահն է, ով հատել է 300 խաղի սահմանագիծը:

ՀՀ առաջնություններում միևնույն թիմի դարպասը բոլորից հաճախ՝ 261 անգամ պաշտպանել է «Շիրակի» դարպասապահ Ռայմոնդ Զադուրյանը:

Լեգեոնականներից պաշտոնական մրցումներում անցկացրած խաղերի քանակով ռեկորդակիրը «Միկայի» բրազիլացի պաշտպան Ալեքս Էնրիկե դա Սիլվան է՝ 297: Նա նաև ՀՀ առաջնություններում բոլորից շատ հանդիպումների մասնակցած լեգեոնականն է՝ 230:

Այլազգի դարպասապահներից ռեկորդակիրը ռուսաստանցի Անատոլի Այվազովն է, ով Բարձրագույն խմբում 96 խաղ է անցկացրել:

Մեկ մրցաշրջանում անցկացրած խաղերի քանակով ռեկորդակիրներն են փյունիկցի Կամո Հովհաննիսյանը և «Միկայի» կիսապաշտպան Վարդգես Սաթումյանը, որոնք 2012/13թթ. առաջնությունում մասնակցել են բոլոր 42 հանդիպումներին:

«Ղարաբաղի» կիսապաշտպան Սասուն Սարգսյանը 1993թ. մայիսի 20-ին «Ցեմենտի» հետ խաղից մինչև 1999թ. հուլիսի 5-ին «Գյումրիի» հետ կայացած խաղն անընդմեջ մասնակցել է թիմի անցկացրած առաջնության բոլոր 154 հանդիպումներին:

Փյունիկցի Արթուր Յուսպաշյանը 2009թ. նոյեմբերի 1-ից մինչև 2012թ. հուլիսի 29-ն ընկած ժամանակահատվածում առանց փոխարինման, անընդմեջ մասնակցել է թիմի անցկացրած առաջնության բոլոր 72 հանդիպումներին:

Բարձրագույն խմբում հանդես եկած ամենաերիտասարդ ֆուտբոլիստը «Լոռիի» խաղացող Կորյուն Բաբայանն է, ով նորամուտը նշել է 14 տարեկան 239 օրականում՝ 2001թ. հուլիսի 1-ին մասնակցելով «Դինամոյի» հետ հանդիպմանը:

Իսկ ամենատարեց ֆուտբոլիստն Ազատ Մանգասարյանն է, ով իր վերջին հանդիպումը ՀՀ առաջնություններում անցկացրել է 46 տարեկան 119 օրականում՝ 1994թ. մայիսի 5-ին Գորիսի «Զանգեզուրի» կազմում մասնակցելով «Լոռիի» հետ մրցավեճին:

Ամենաերիտասարդ դարպասապահը կամերունցի Ապուլա Բետեն է, ով 2002թ. հուլիսի 10-ին Կապանի «Լեռնագործի» հետ խաղում 16 տարեկան 23 օրականում նորամուտն է նշել «Փյունիկում»:

Ամենատարեց դարպասապահը Ռոբերտ Պալյանն է, ով իր վերջին հանդիպումը ՀՀ առաջնություններում անցկացրել է 40 տարեկան 94 օրականում՝ 1992թ. նոյեմբերի 4-ին ՀՄՄ-ՖԻՄԱ-ի հետ կայացած խաղում պաշտպանելով «Կանազի» դարպասը:

Ամենաերիտասարդ լեգեոնականը կամերունցի Բալեպ Բա Նդումբուկն է, ով 2003թ. մայիսի 31-ին Կապանի «Լեռնագործի» հետ կայացած խաղում «Փյունիկի» կազմում նորամուտը նշել է 15 տարեկան 219 օրականում:

Ամենատարեց լեգեոնականը «Միկայի» ռուս պաշտպան Սերգեյ Գոռլուկովիչն է, ով 2002թ. մայիսի 5-ին «Շիրակի» հետ կայացած խաղում 40 տարեկան 168 օրական էր:

Ամենատարեց այլազգի դարպասապահը վրացի Սոսո Գրիշիկաշվիլին է, ով 2010թ. հունիսի 19-ին «Գանձասարի» հետ խաղում «Միկայի» դարպասը պաշտպանել է 36 տարեկան 176 օրականում:

Հայկական ֆուտբոլի ամենատիտղոսակիր ֆուտբոլիստը Հովհաննես Թահմազյանն է, ով «Շիրակի» և «Միկայի» կազմերում ընդհանուր առմամբ արժանացել է 19 տիտղոսի: Թահմազյանը 3 անգամ հռչակվել է Հայաստանի չեմպիոն, 7 անգամ դարձել է արծաթե, 3 անգամ՝ բրոնզե մրցանակակիր, 2 անգամ պատվո շրջան է կատարել ՀՀ գավաթով, 4 անգամ՝ Սուպերգավաթով: Նա նաև ՀՀ առաջնությունների ամենատիտղոսակիր ֆուտբոլիստն է՝ 13 անգամ դառնալով մրցանակակիր:

Առավել հաճախակի՝ 10 անգամ չեմպիոնի տիտղոսին է արժանացել «Փյունիկի» նախկին ավագ Սարգիս Հովսեփյանը: Նա 7 տարի շարունակ (2004-2010թթ.) դարձել է Հայաստանի չեմպիոն, ինչը ևս ռեկորդային արդյունք է: Հովսեփյանը չեմպիոնի տիտղոսին արժանացած ամենատարեց ֆուտբոլիստն է: 2010թ. նա ոսկե մեդալի է արժանացել 38 տարեկանում:

Հայաստանի ամենաերիտասարդ չեմպիոնը 15-ամյա Էդգար Մանուչարյանն է, ով 2002թ. «Փյունիկում» իր առաջին պարգևն է ստացել:

Հայկական ակումբները գլխավորած մարզիչներից ամենատիտղոսակիրն Անդրանիկ Ադամյանն է: 1992-2004թթ. անփոփոխ գլխավորելով «Շիրակը»՝ Ադամյանն իր սաների հետ 13 տիտղոս է նվաճել: Նրա գլխավորությամբ «Շիրակը» 3 անգամ հռչակվել է երկրի չեմպիոն, 5 անգամ դարձել է արծաթե, 2 անգամ՝ բրոնզե մրցանակակիր, 3 անգամ էլ պատվո շրջան է կատարել Հակոբ Տոնոյանի անվան Սուպերգավաթով: Անդրանիկ Ադամյանը նաև ՀՀ առաջնությունների ամենատիտղոսակիր մարզիչն է՝ «Շիրակին» 10 անգամ դարձնելով մրցանակակիր:

Առավել հաճախ՝ 4 անգամ (2004, 2008-2010թթ.) իր գլխավորած թիմին՝ «Փյունիկին» չեմպիոնական բարձունքի է հասցրել Վարդան Մինասյանը:

Բոլորից հաճախ՝ 8 անգամ Հայաստանի լավագույն ֆուտբոլիստի կոչմանն է արժանացել Հենրիխ Մխիթարյանը: Նա միակն է, ով դափնեկիր է դարձել 7 տարի շարունակ (2011-2017թթ.):

Հայաստանի լավագույն ֆուտբոլիստի կոչմանն արժանացած ամենատարեց ֆուտբոլիստը Սարգիս Հովսեփյանն է, ով 2008թ. մրցանակը ստացել է 36 տարեկանում:

Լավագույնի տիտղոսին արժանացած ամենաերիտասարդ ֆուտբոլիստն Էդգար Մանուչարյանն է, ով 2004թ. 17 տարեկանում է դափնեկիր դարձել:

Թիմից թիմ տեղափոխությունների քանակով յուրօրինակ ռեկորդակիրը Հայկ Նարիմանյանն է: ՀՀ Բարձրագույն խմբի առաջնություններում Նարիմանյանը հասցրել է 1995-2006թթ. կրել 13 թիմերի («Կոտայք-2», «Երևան», «Կոտայք», «Էրեբունի-ՀՄՄ», «Ղարաբաղ», «Զվարթնոց», «Սպարտակ», «Բանանց», «Արաքս», «Միկա», «Արարատ», «Լեռնագործ» Երևան, «Ուլիս») մարզաշապիկները՝ ընդհանուր առմամբ անցկացնելով ընդամենը 192 խաղ: Առավել երկար՝ երկու մրցաշրջան (1999-2000թթ.) նա հանդես է եկել «Զվարթնոցում»՝ մասնակցելով առաջնության 40 խաղի:

ՀՀ առաջնություններում դարպասն անառիկ պահած խաղերի քանակով ռեկորդակիրը Գևորգ Կասպարովն է, ով անցկացրած 327 հանդիպումներից 117-ում գոլ բաց չի թողել:

Մեկ մրցաշրջանում դարպասն առավել հաճախ անառիկ է պահել շիրակցի Արթուր Հովհաննիսյանը, ով 1992թ. առաջնության 30 խաղերից 21-ում գոլ բաց չի թողել: Նրան է պատկանում նաև առաջնության մեկնարկից դարպասն անընդմեջ անառիկ պահած րոպեների քանակով (681) ռեկորդային ցուցանիշը, որ գրանցվել է 1992թ.:

2002թ. «Շիրակի» դարպասապահ Ռայմոնդ Զադուրյանը 755 րոպե շարունակ դարպասն անառիկ է պահել:

Մեկ մրցաշրջանում բոլորից հուսալի է գործել «Փյունիկի» դարպասապահ Արմեն Ավագյանը, ով 1996/97թթ. առաջնությունում միջինը մեկ խաղում բաց է թողել ընդամենը 0,29 գոլ (5 գոլ 17 խաղում):

ՀՀ առաջնություններում միջինը մեկ խաղում բաց թողած գոլերի քանակով լավագույն արդյունքն ունի Ապուլա Բետեն: Նա 2002-2005թթ. «Փյունիկի» կազմում անցկացրած 58 խաղում բաց է թողել 31 գոլ կամ միջինը մեկ խաղում՝ 0,53 գնդակ:

Յուրօրինակ ռեկորդակիր է «Արարատի» նախկին դարպասապահ Արմեն Պետրոսյանը, ով 12 խաղում հանդես է եկել որպես դաշտային ֆուտբոլիստ ու դարձել է 4 գոլի հեղինակ:

Մեկ մրցաշրջանում դարպասն անառիկ պահած խաղերի քանակով առավել հաճախ՝ 6 անգամ (1993, 1994, 1995, 1998, 1999, 2001թթ.) առաջնության ամենահուսալի դարպասապահ է ճանաչվել Հարություն Աբրահամյանը:

Մեկ մրցաշրջանում անխոցելիության գործակցով (միջինը մեկ խաղում բաց թողած գոլերի քանակով) առավել հաճախ՝ 3-ական անգամ առաջնության ամենահուսալի դարպասապահ են ճանաչվել «Միկայի» դարպասի նախկին պահապան Ֆելիքս Հակոբյանը (2001, 2006, 2007թթ.) և փյունիկցի Գոռ Մանուկյանը (2012/13, 2015/16, 2016/17թթ.):

«Շիրակի» նախկին հարձակվող Անդրանիկ Բարիկյանը հայկական ֆուտբոլում յուրօրինակ ռեկորդակիր է ստացած դեղին և կարմիր քարտերի ընդհանուր քանակով: Պաշտոնական 356 հանդիպումներում նա 10 անգամ հեռացվել է խաղադաշտից, 99 անգամ էլ արժանացել է դեղին քարտի: Ընդ որում 85 անգամ (6 կարմիր, 79 դեղին քարտ) Բարիկյանը մրցավարների կողմից պատժվել է ՀՀ առաջնություններում անցկացրած 291 հանդիպումներում, ինչը ևս տխուր ռեկորդ է: Միայն իր կարիերայի սկզբում՝ 1998թ. «Շիրակ-2»-ում խաղալիս Բարիկյանը ոչ մի անգամ մրցավարների ուշադրությանը չի արժանացել:

Դարպասապահներից ՀՀ առաջնությունների յուրօրինակ ռեկորդակիրը «Ցեմենտում», «Լեռնագործում», «Սպարտակում», «Միկայում» և «Արարատում» ընդհանուր առմամբ 177 խաղ անցկացրած Գառնիկ Հովհաննիսյանն է, ով 3 անգամ հեռացվել է խաղադաշտից, 17 անգամ էլ զգուշացվել է:

Մեկ մրցաշրջանում ստացած քարտերի քանակով յուրատեսակ ռեկորդ է սահմանել սերբ պաշտպան Գորան Օբրադովիչը, ով 2012/13թթ. առաջնությունում «Գանձասարում» անցկացրած 39 հանդիպումներում 2 անգամ հեռացվել է խաղադաշտից, 11 անգամ՝ զգուշացվել:

Դարպասապահներից մեկ մրցաշրջանում առավել շատ՝ 5-ական քարտեր են ստացել Դմիտրի Վորոբյովը («Բանանց», 2003թ.), Գառնիկ Հովհաննիսյանը («Արարատ», 2007թ.), Մարտիկ Մկրտումյանը («Կիլիկիա», 2008թ.), Նորայր Աբրահամյանը («Շիրակ», 2009թ.) և Գևորգ Կասպարովը («Միկա», 2012/13թթ.):

Աշոտ Հայրապետյան

Հետևե՛ք VNews.am-ին նաև Youtube-ում և Instagram-ում:


The Sun․ «Արսենալը» չի ընդդիմանա, եթե Մխիթարյանը որոշի հեռանալ ակումբից

#Գոլային_օրացույց_19. Ո՞վ է մայիսի 24-ի լավագույնը գոլի հեղինակը (լուսանկար, տեսանյութ)

Արտերկրում հանդես եկող 11 ֆուտբոլիստ հրավիրվել է ազգային հավաքական

«Արսենալի» ֆուտբոլիստները ցանկանում են ի աջակցություն Մխիթարյանի ակցիա իրականացնել, սակայն ռիսկը մեծ է

Վենգեր. «Մխիթարյանի հետ տեղի ունեցածը չպետք է լինի ֆուտբոլում»

«Արսենալի» գործադիր տնօրեն․ «Հենրիխից խլեցին եզրափակիչը»

Մուստաֆին՝ Եվրոպա լիգայի եզրափակիչի մասին․ «Մենք ցանկանում ենք հաղթել այն Մխիթարյանի համար»

Մեծ Բրիտանիայի խորհրդարանում անդրադարձել են Հենրիխ Մխիթարյանի՝ Բաքու չմեկնելու հարցին (տեսանյութ)

CNN-ի սենսացիոն անդրադարձը. «Սա խայտառակում է ՈւԵՖԱ-ն, «Արսենալն» ու «Չելսին» պետք է բոյկոտեն եզրափակիչը»

Մոնրեալ. «Ինձ Մխիթարյանի բացակայությունն ավելի է մտահոգում, քան տոմսերի թեման»

Բռնցքամարտ․ Հայաստանի հավաքականը Եվրոպական խաղերին կմասնակցի 9 բռնցքամարտիկով

Պետր Չեխ․ «Կարող ենք ուրախացնել Մխիթարյանին, եթե հաղթենք եզրափակիչում»

Օբամեյանգը խոստացել է հաղթել Եվրոպա լիգան Մխիթարյանի համար

Բերեզովսկին նույնպես մեկնաբանել է Մխիթարյանի որոշումը չմեկնել Բաքու

Բաքուն մեղադրում է Հայաստանին՝ Մխիթարյանին քաղաքական նպատակներով օգտագործելու համար

Տուրի լավագույն ֆուտբոլիստը և խորհրդանշական հավաքականը․ VNews-ն ամփոփում է ԲԽ-ի 34-րդ տուրը