Անմոռանալի օր Գեղամ Հարությունյանի և Վբեյմարի համար, «Արարատ-Արմենիայի» ռեկորդային ցուցանիշը - VNews
Բաժիններ

Անմոռանալի օր Գեղամ Հարությունյանի և Վբեյմարի համար, «Արարատ-Արմենիայի» ռեկորդային ցուցանիշը

Բարձրագույն խմբի 27-րդ տուրը՝ 10 փաստով

27-րդ տուրի հանդիպումներով ավարտվեց առաջնության 3-րդ շրջանը: Առաջատարների մրցավեճում գրանցված ոչ-ոքին պահպանեց ոսկե մեդալների համար պայքարում հաստատված լարված մթնոլորտը: «Լոռին» էլ «Ալաշկերտի» նկատմամբ տոնած անչափ կարևոր հաղթանակով ոչ միայն նպաստեց Արամ Ոսկանյանի պաշտոնանկությանը, այլև ընդհուպ մոտեցավ առաջատար քառյակին:

Տուրի ամենաուշագրավ իրադարձությունները ներկայացնում ենք 10 փաստի տեսքով:

1․ Դաշտի տերերն ու հյուրերը մեկական հաղթանակ տոնեցին, 2 խաղ ավարտվեց ոչ-ոքի: Առաջնությունում անցկացված 108 հանդիպումներում դաշտի տերերին հաջողությունն ուղեկցել է 38 անգամ, հյուրերը 39 հաղթանակ են տոնել, 31 խաղ ավարտվել է ոչ-ոքի:

4 խաղում ընդամենը 4 գոլ խփվեց: Կրկնվեց առաջնության 1-ին, 14-րդ և 22-րդ տուրերի ամենացածր արդյունավետության տխուր ռեկորդը: Առաջնության մեկնարկից անցկացված 108 հանդիպումներում 234 գոլ է խփվել: Միջին արդյունավետությունը կազմում է 2,16 գոլ մեկ խաղում:

2․ «Արարատ-Արմենիան» 10-րդ անընդմեջ խաղում անպարտելի մնաց՝ գերազանցելով «Բանանցի» և «Ալաշկերտի» ռեկորդային ցուցանիշը, որոնց 9-ական անպարտելի խաղերի շարք էր հաջողվել: Այդ հանդիպումներում Վարդան Մինասյանի սաները 8 հաղթանակ են տոնել՝ միայն 2 խաղ ավարտելով ոչ-ոքի: Վերջին անգամ «Արարատ-Արմենիան» խաղադաշտից պարտված է հեռացել անցյալ տարվա նոյեմբերի 11-ին՝ Գյումրիում 0-1 հաշվով զիջելով «Շիրակին»:

3․ «Շիրակը» 4-րդ անընդմեջ խաղն ավարտեց ոչ-ոքի: Առաջնության 24 հանդիպումներից ուղիղ կեսում «Շիրակի» օգտին ոչ-ոքի է գրանցվել, որից 7-ը՝ գոլազուրկ: Շիրակցիներն «Արցախի» հետ առաջնության 3-րդ խաղում էլ սեփական դարպասն անառիկ պահեցին:

4․ «Գանձասար-Կապանն» ընթացիկ առաջնությունում 3-րդ անգամ պարտության մատնեց «Արարատին»՝ տոնելով գարնանային հատվածում իր առաջին հաղթանակը: Հետաքրքիր է, որ առաջնությունում էլ կապանցիներն իրենց անդրանիկ հաղթանակը տարել էին հենց «Արարատի» նկատմամբ մեկնարկային 7-րդ խաղում:

Մրցակիցների միջև կայացած առաջնության վերջին 5 հանդիպումներն էլ ավարտվել են «Գանձասար-Կապանի» հաղթանակով: Այդ հանդիպումներում կապանցիները 16 գոլ են խփել, սեփական դարպասը բաց են թողել ընդամենը 2 գնդակ: Վերջին հաղթանակը գանձասարցիների նկատմամբ «Արարատը» տոնել է անցյալ տարվա մարտի 1-ին Դավիթ Մինասյանի խփած միակ գոլի շնորհիվ, որը ներկայումս խաղում է «Գանձասար-Կապանում» և Բարձրագույն խմբում հոբելյանական՝ 100-րդ հանդիպումն անցկացրեց:

5․ «Արարատն» առաջնության գարնանային հատվածում արդեն 5-րդ պարտությունը կրեց, որը 250-րդն էր Բարձրագույն խմբում: Արդեն 7 խաղ արարատցիները հաղթանակ չեն տոնել՝ վաստակելով ընդամենը 2 միավոր: Վերջին անգամ «Արարատը» հաղթանակի բերկրանքը վայելել է անցյալ տարվա դեկտեմբերի 2-ին՝ նվազագույն հաշվով առավելության հասնելով «Ալաշկերտի» նկատմամբ:

6․ Գեղամ Հարությունյանը գոլով նշեց Բարձրագույն խմբում 150-րդ խաղի հոբելյանը: Այդ գոլը «Գանձասար-Կապանի» կազմում պաշտոնական մրցումներում Հարությունյանի խփած 38-րդ գնդակն էր: Նա դարձավ պաշտոնական մրցումներում թիմի լավագույն ռմբարկուն՝ գերազանցելով Արթուր Քոչարյանի ցուցանիշը: Նախորդ մրցաշրջանում Գեղամ Հարությունյանը դարձել էր Բարձրագույն խմբում կապանցիների բոլոր տարիների լավագույն ռմբարկուն՝ կրկին գերազանցելով Քոչարյանի ռեկորդը:

7․ «Բանանցի» պաշտպան Ալբերտ Գաջիբեկովը բացեց գոլերի հաշիվը Հայաստանի առաջնությունում: Նա ընդգրկվեց թիմի կազմում գոլ խփած ամենատարեց լեգեոնականների տասնյակում՝ «Արարատ-Արմենիայի» դարպասը գրավելով 31 տարեկան 57 օրականում: Ռեկորդակիրը Յուրի Դուդնիկն է, որը 2005թ. «Բանանցում» գոլի հեղինակ է դարձել 36 տարեկան 313 օրականում:

8․ Վբեյմար Անգուլոն Բարձրագույն խմբում 99-րդ խաղն անցկացրեց և դարձավ «Գանձասար-Կապանի» կազմում ՀՀ առաջնություններում առավել շատ հանդիպումների մասնակցած լեգեոնականը: Նա գերազանցեց Լուբամբո Մուսոնդայի ցուցանիշը, որը գանձասարցիների մարզաշապիկով 98 անգամ էր խաղադաշտ դուրս եկել: «Արարատի» հետ հանդիպումը կապանցիների կազմում Վբեյմար Անգուլոյի պաշտոնական 116-րդ խաղն էր: Այդ ցուցանիշով էլ նա գերազանցեց Մուսոնդային:

9․ «Բանանցի» նիգերիացի կիսապաշտպան Սոլոմոն Իմե Ուդոն Բարձրագույն խմբում հոբելյանական՝ 100-րդ խաղն անցկացրեց: Նրա ցուցանիշը ռեկորդային է ընթացիկ առաջնության մասնակից լեգեոնականների մեջ: Ուդոն դարձավ ՀՀ առաջնություններում 100 խաղի սահմանագիծը հատած ընդամենը 10-րդ լեգեոնականը: Ռեկորդակիրը «Միկայի» նախկին պաշտպան, բրազիլացի Ալեքս Էնրիկե դա Սիլվան է, որը ՀՀ առաջնություններում 230 խաղի է մասնակցել:

10․ Շիրակցի Վսևոլոդ Երմակովն ընթացիկ առաջնությունում 13-րդ անգամ դարպասն անառիկ պահեց, ինչը լավագույն արդյունքն է դարպասապահների մեջ: Երմակովն ընդգրկվեց մեկ մրցաշրջանում դարպասն անառիկ պահած խաղերի քանակով լեգեոնական դարպասապահների լավագույն տասնյակում: Ցանկը գլխավորում է «Գանձասար-Կապանի» նախկին դարպասապահ Լևան Բուբուտեիշվիլին, որը 2011թ. առաջնության 28 հանդիպումներից 17-ում դարպասն անառիկ է պահել:

Աշոտ Հայրապետյան

Միացի՛ր հայկական ամենասպորտային Instagram-ին:


«Ուրարտուի» գլխավոր մարզիչ Ալեքսանդր Գրիգորյանը կորոնավիրուսի ստուգման թեստ է հանձնել

«Շիրակը» համակարգիչներով է ապահովել տեղի դպրոցներին

Երևանի ազգային հավաքական. Ինչու Հայաստանի մարզերում ֆուտբոլիստներ չեն ծնվում

Տիտո Ռամալյո. «Կապառոսը կարող է օգուտ տալ Հայաստանի հավաքականին»

«Լոռիի» հիմնադիրը առաջարկում է քննարկման դնել ՀՖՖ արտասահմանցի աշխատակիցների վճարման հարցը

Հայկական ակումբները ստացել են ՈւԵՖԱ-ի «համերաշխության վճարները»

Թվեք Ֆուտբոլի Հայաստանի առաջնության մասնակից բոլոր թիմերը՝ 1992 թվականից սկսած. VNews-ի Quiz-ը

«Նոան» տարբերվող ֆուտբոլ է խաղում, ափսոս, առանց հայ ֆուտբոլիստների․ Թիմի տակտիկական գաղտնիքները

«Շիրակի» բժիշկը օգնում է պայքարել կորոնավիրուսի դեմ

Օգանան ընդամենը 9 ամսական էր, երբ Կասպարովը նորամուտը նշեց ՀՀ գավաթի մրցաշարում

Ալեքսանդր Գրիգորյան․ «Նոան» ամբողջապես արժանի հաղթանակ տոնեց» (տեսանյութ)

Վադիմ Բորեց․ «Հանգստություն չպետք է լինի․ երկրորդ խաղն ավելի ծանր է լինելու» (տեսանյութ)

Արմեն Պետրոսյան․ «Լավ կպատրաստվենք երկրորդ խաղին․ պայքարելու ենք մինչև վերջ» (տեսանյութ)

Վարդան Մինասյան․ «Այսօր ստեղծած գոլային պահերի քանակը կբավականացներ մի քանի հանդիպման համար» (տեսանյութ)

Նվազագույն հաշիվ գրանցվեց նաև VBet Հայաստանի գավաթի կիսաեզրափակիչ մյուս խաղում (տեսանյութ)

VBet Հայաստանի գավաթ. «Ուրարտու» – «Նոա». Ուղիղ հեռարձակում, մեկնարկային կազմեր