fbpx
Բաժիններ

Տուրի լավագույն ֆուտբոլիստը և խորհրդանշական հավաքականը․ VNews-ն ամփոփում է ԲԽ-ի 36-րդ տուրը

Ձեր ուշադրությանն ենք ներկայացնում Հայաստանի Բարձրագույն խմբի առաջնության 36-րդ տուրի խորհրդանշական հավաքականը և լավագույն ֆուտբոլիստին ըստ VNews.am-ի։

Դարպասապահ՝ Դմիտրի Աբակումով («Արարատ-Արմենիա»)

«Արարատ-Արմենիայի» հաղթաթղթերից մեկը հավասարակշռված կազմն է: Դարպասապահի դիրքում անսասան է Աբակումովի տեղը, որը «Բանանցի» հետ չեմպիոնական խաղում «չոր» մնաց՝ առաջնությունում դարպասն անառիկ պահելով 16-րդ անգամ: «Արարատ-Արմենիան» 2-րդ տուրն անընդմեջ դարձել է միակ թիմը, որ ամուր փակի տակ է պահել իր դարպասը: Այդուհանդերձ, սա նաև ընդհանուր թիմի աշխատանքի արդյունքն է, որովհետև իրականում բոլորն են պաշտպանվում՝ սկսած Կոբյալկոյից, երբ մրցակիցը գրոհ է սկսում:

Պաշտպաններ՝ Ալբերտ Խաչումյան («Արարատ-Արմենիա»)

Չկար որակազրկված Խոզինը, և Մինասյանը ստիպված էր մեծ ռիսկի գնալ՝ բախտորոշ խաղում հիմնական կազմ ընդգրկելով 19-ամյա Խաչումյանին: Վերջինս, չնայած խաղի լարվածությանը, իրեն վստահ ու անկաշկանդ էր զգում: Անթերի չխաղաց, նույնիսկ եղավ դրվագ, երբ նրա բացթողման հետևանքով Գլիշիչը կարող էր գոլ խփել: Բայց սա նորամուտ էր, և բացթողումներ չէին կարող չլինել: Մինասյանը խաղից հետո ասաց՝ Խաչումյանը հայ ամենահեռանկարային կենտրոնական պաշտպանն է, ուստի վերջինս հիմա պետք է ավելի քրտնաջան աշխատի:

Ալեքս Կակուբա («Լոռի»)

«Լոռին» բոլոր առումներով գերազանցեց «Ալաշկերտին» և ռևանշի հասավ գավաթի եզրափակիչում կրած պարտության դիմաց: Կակուբան համարյա անթերի գործեց ձախ եզրում, վնասազերծեց դեռ առաջին խաղակեսում փոխարինման մտած Մարմենտինիին, որը սովորաբար «խաղում» է մրցակից պաշտպանների նյարդերի հետ: Կարելի կլիներ գերազանց գնահատել «Լոռիի» պաշտպանական քառյակի ընդհանուր ելույթը, եթե չլիներ կենտրոնական պաշտպանների անհամաձայնեցված խաղը վերջին վայրկյաններին, որը հանգեցրեց բաց թողած գոլի:

Պատմության մեջ երկրորդ անգամ է նորաստեղծ թիմը հռչակվում Հայաստանի չեմպիոն

Կիսապաշտպաններ՝ Նարեկ Ասլանյան («Գանձասար-Կապան»)

Հենակետային կիսապաշտպանը ոչ միանշանակ տպավորություն թողեց մրցաշրջանի ընթացքում: Բայց «Արարատի» հետ խաղում «Գանձասար-Կապանի» բոլոր ֆուտբոլիստները փայլեցին՝ «ապտակ» հասցնելով մրցակցին: Ասլանյանը դարձավ գոլային փոխանցման հեղինակ, երբ խաղադաշտի կենտրոնից հաշվենկատ փոխանցումով գնդակը հասցեագրեց Հարությունյանին: Գտնվելով կենտրոնում՝ շարունակություն էր հաղորդում թիմի գրոհներին: Թիմը որևէ խնդրի չբախվեց, որովհետև «Արարատը» «բացակայում» էր խաղադաշտից:

Գևորգ Օհանյան («Գանձասար-Կապան»)

Երբ այս ֆուտբոլիստի խաղը ստացվում է, նա պարզապես հրաշքներ է գործում խաղադաշտում: Օհանյանն անմիջական մասնակցություն ունեցավ կապանյան թիմի գոլային 7 գրոհներից 6-ին՝ դառնալով 2 արդյունավետ փոխանցման հեղինակ: Հիշատակման են արժանի Հարությունյանի գոլերից 2-ը, որոնցում Օհանյանը նույնիսկ առանց գնդակին հպվելու «բթացրեց» «Արարատի» պաշտպանների ուշադրությունը՝ տարածություն բացելով Գեղամի համար: Կարևոր պահերին այդպես գործելը ֆուտբոլային բարձր ինտելեկտի արդյունք է:

Յուրի Գարեգինյան («Արցախ»)

«Արցախի» կիսապաշտպանը «Շիրակի» հետ խաղում ռմբարկուական ախորժակ էր բացել և դուբլ ձևակերպեց: Նա նախ իրացրեց իր իսկ վաստակած 11-մետրանոցը, ապա ֆանտաստիկ անցման արդյունքում կրկին գրավեց մրցակցի դարպասը: Երիտասարդ կիսապաշտպանը դարձավ նաև գոլային փոխանցման հեղինակ՝ կազմակերպելով Ավետիսյանի դիպուկ հարվածով ավարտված գրոհը: «Արցախը», ընդհանուր առմամբ, զսպում էր «Շիրակի» գրոհները, չնայած խաղի 41-րդ րոպեից սկսած գործում էր 10 հոգով:

Արման Մկրտչյան («Լոռի»)

Մեր երիտասարդական հավաքականն այսօր նախանձելի վիճակում չէ, ուստի այդ ընտրանու անդամ, 19-ամյա Մկրտչյանի ցուցադրած խաղը «Լոռիում» միայն ուրախացնում է: Իհարկե, վայրիվերումները շատ են, բայց դա բնական երևույթ է այս տարիքի խաղացողի համար: Ունիվերսալիզմի հաշվին փակում է թե՛ պաշտպանության, թե՛ կիսապաշտպանության եզրերը: Նրան վերջերս ավելի հաճախ տեսնում ենք կիսապաշտպանության աջ թևում: Շատ լավ աշխատեց նաև «Ալաշկերտի» հետ խաղում, դարձավ գոլային փոխանցման հեղինակ:

Դավիթ Մինասյան («Գանձասար-Կապան»)

Այնպես ստացվեց, որ ամուր պահեստային համարվող Մինասյանն առաջնության վերջնամասում դարձավ «Գանձասար-Կապանի» գրոհային զենքերից մեկը: Իր նախկին թիմի՝ «Արարատի» հետ մրցավեճում աչքի ընկավ 1-ական գոլով և արդյունավետ փոխանցումով, մասնակցեց գոլային երկրորդ գրոհին: Ինչ վերաբերում է Մինասյանի խփած գոլին, ապա ամեն ինչ սկսվել էր հենց նրա շքեղ անցումից: Օգտվելով այս ֆուտբոլիստի արագությունից և եզրային սուր փոխանցումներ կատարելու ունակությունից՝ թիմը հաճախ է գրոհում հենց աջ եզրով:

Իսահ Ալիյու («Լոռի»)

Ալիյուի խաղն էլ երբ ստացվում է, նրան կանգնեցնելը պարզապես անհնար է: «Ալաշկերտի» կազմից բացակայում էր Արտակ Գրիգորյանը, և «դեղինների» հենակետային գոտում իսկական քաոս էր տիրում: Ալիյուին էլ հենց դա էր պետք, որպեսզի խաղն ավելի հաճախ իր վրա վերցներ, դիմեր դրիբլինգի, խաղ կազմակերպեր, հեռահար հարվածներ իրականացներ: Նա դարձավ 1-ական գոլի ու արդյունավետ փոխանցման հեղինակ: Մինչ «ասիստ» կատարելը հնարամտորեն ձեռնունայն թողեց մրցակիցներին և սուր աչքով նկատեց թիմակցի առաջխաղացումը:

Հարձակվողներ՝ Գեղամ Հարությունյան («Գանձասար-Կապան»)

Հարությունյանը ցուցադրած անհավանական ֆուտբոլով արժանի է տուրի լավագույնը ճանաչվելուն, բայց հաշվի ենք առել մրցակցի գործոնը: «Արարատն» իր դժգույն խաղով և կոպիտ սխալներով մեծապես նպաստեց «արջերի» հաղթանակին: Իսկ Հարությունյանի համար սա գարնանային հատվածի ամենաստացված խաղն էր: Ձևակերպեց պոկեր՝ գոլեր խփելով ամենատարբեր ոճերի հարվածներով: Փառահեղ երեկո էր Գեղամի համար, բայց նույնը կարելի է ասել նաև նրա թիմակիցների մասին, ովքեր շատ մեծ աջակցություն ցուցաբերեցին Հարությունյանին:

Անտոն Կոբյալկո («Արարատ-Արմենիա», տուրի լավագույն ֆուտբոլիստ)

Կոբյալկոն լավագույնն է, որովհետև առաջնության գարնանային հատվածի երևի թե ամենակայուն ֆուտբոլիստն է եղել: Նա բոլոր հանդիպումներում ասել է իր ծանրակշիռ խոսքը թե՛ գոլերի, թե՛ կատարած աշխատանքի տեսքով: Սպասելի էր, որ «Բանանցի» հետ խաղն էլ բացառություն չի լինելու: Նա առաջին կեսում բաց թողեց դիրքը շահելու արդյունքում ստեղծած փայլուն գոլային պահը, բայց ընդմիջումից հետո անվրեպ իրացրեց իր իսկ վաստակած 11-մետրանոցը: Կոբյալկոն արժանի էր կրելու չեմպիոնական գոլի հեղինակի պատվավոր կոչումը:

Խորհրդանշական հավաքականում որոշ ֆուտբոլիստների խաղային դիրքեր պայմանական են՝


Հետևե՛ք VNews.am-ին նաև Youtube-ում և Instagram-ում:


Վադիմ Բորեց․ «Կան հոգեբանության հետ կապված գործոններ, որ պետք է բարելավվենք» (տեսանյութ)

Կալդաս դե Օլիվեյրա․ «Փորձում ենք ֆուտբոլիստներին վստահություն հաղորդել» (տեսանյութ)

«Նոան» նույնպես «չնկատեց» առաջնության հետնապահին․ VNews-ի ֆոտոշարքը «Նոա» – «Երևան» հանդիպումից

«Երևանի» 11-րդ պարտությունը, «Նոայի» երկրորդ անընդմեջ հաղթանակը (տեսանյութ)

Գերկարևոր հանդիպում Գյումրիում․ Ամենաուշագրավ փաստերը՝ ԲԽ-ի 11-րդ տուրին ընդառաջ

France Football-ը ծավալուն հոդված է հրապարակել Հենրիխ Մխիթարյանի ու հայկական ֆուտբոլի մասին

Արման Մկրտչյան․ «Արեցինք առավելագույնը և լավ պայքարեցինք» (տեսանյութ)

«Գանձասար-Կապանը» ոչ-ոքի է խաղացել Հայաստանի պատանեկան հավաքականի հետ (տեսանյութ)

Գոռ Մալաքյանը նույնպես հրավիրվել է Հայաստանի հավաքական

Բարձրագույն խմբի 10-րդ տուրի խորհրդանշական հավաքականը և լավագույն ֆուտբոլիստը

«Արարատն» արդեն ունի այնքան միավոր, ինչքան վաստակել էր նախորդ ամբողջ առաջնությունում

Վադիմ Բորեց․ «Մենք էլ հույս ունենք, որ հնարավոր կլինի կայունության հասնել»

Աշոտ Բարսեղյան․ «Մենք այս ֆուտբոլիստներով չենք կարող շատ բարձր արդյունքներ գրանցել»

Հայկական ակումբների 8 լեգեոներներ հրավիրվել են իրենց երկրների ազգային հավաքականներ

«Նոան» 10 հոգով հաղթեց «Գանձասար-Կապանին» (տեսանյութ)

«Նոա» – «Գանձասար-Կապան». Մեկնարկային կազմեր, ուղիղ հեռարձակում (տեսանյութ)