Եվրոպայի առաջնություն. Հայաստանի հավաքականների հաղթական մեկնարկը

Շախմատի Հայաստանի տղամարդկանց և կանանց հավաքականները համոզիչ հաղթանակներով մեկնարկեցին Բաթումում սկսված Եվրոպայի թիմային առաջնությունում:

Տղամարդկանց հավաքականը 3,5-0,5 հաշվով պարտության մատնեց Նորվեգիայի ընտրանուն: Այս մրցախաղում մեր հավաքականի առաջատար Լևոն Արոնյանին հանգստանալու հնարավորություն էր տրվել: Նրա փոխարեն առաջին խաղատախտակի վրա հանդես եկած Գաբրիել Սարգսյանը հաղթեց Արյան Տարիին:

Մեր թիմին հաղթական միավորներ պարգևեցին նաև Հայկ Մարտիրոսյանն ու Արման Փաշիկյանը, որոնք առավելության հասան համապատասխանաբար Բենջամին Նոտկևիչի և Բենջամին Հալդորսենի նկատմամբ:

Միակ կես միավորը մրցակցին զիջեց Հրանտ Մելքումյանը՝ հաշտություն կնքելով Յոհան Սալոմոնի հետ:

Հայաստանի կանանց հավաքականն էլ 3,5-0,5 հաշվով հաղթեց Ֆինլանդիայի ընտրանուն: Այս մրցախաղում էլ բացակայում էր մեր հավաքականի առաջատար Էլինա Դանիելյանը:  Առաջին խաղատախտակի վրա հանդես եկած Լիլիթ Մկրտչյանը ոչ-ոքի խաղաց Անաստասիա Նազարովայի հետ:

Մեր մյուս շախմատիստուհիները հաղթեցին մրցակցուհիներին: Սիրանուշ Ղուկասյանը խաղում էր Հեյնի Պուուսկայի հետ, Մարիա Գևորգյանի մրցակցուհին Ալիյա Դանենբերգն էր, իսկ Աննա Սարգսյանը պարտության մատնեց Սարաբելա Նորլամոյին:

Աշխարհի առաջնություն. Շանթ Սարգսյանն ու Արամ Հակոբյանը հավակնում են չեմպիոնի տիտղոսին

Միացի՛ր հայկական ամենասպորտային Instagram-ին: