Նազարյանը ԲԿՄԱ-ն վերածել է մարտունակ թիմի․ Ինչպես դա հաջողվեց - VNews
Բաժիններ

Նազարյանը ԲԿՄԱ-ն վերածել է մարտունակ թիմի․ Ինչպես դա հաջողվեց

ԲԿՄԱ (Բանակի կենտրոնական մարզական ակումբ) թիմն Առաջին խմբի ընթացիկ առաջնության առաջատարներից մեկն է: Այս ակումբը շատ կարևոր առաքելություն է իրականացնում հայկական ֆուտբոլում: Համապատասխան տարիքում գտնվող ֆուտբոլիստներն իրենց զինծառայությունն իրականացնում են կանաչ խաղադաշտում՝ միաժամանակ հանդիսանալով Մ19 հավաքականի թեկնածուներ: Բայց ուրախալի է ոչ միայն զուտ մասնակցության փաստը, այլև այն, թե Ռաֆայել Նազարյանի գլխավորած թիմն ինչպիսի առաջընթաց է գրանցում: Այո՛, խոսքը թե՛ մարզական արդյունքների, թե՛ ցուցադրած խաղի որակի, և թե՛ ֆուտբոլիստների արձանագրած անհատական աճի մասին է:

ԲԿՄԱ-ն անցկացրած 20 խաղում վաստակել է 37 միավոր ու 17 թիմի պայքարում 4-5-րդ տեղերն է բաժանում «Արարատ-Արմենիայի» երկրորդ թիմի հետ: Բանակայինները տոնել են 12 հաղթանակ, միաժամանակ կրել 7 պարտություն, որից 5-ը գրանցվել է առաջին 8 տուրերի ընթացքում: Սա բացատրվում է շատ պարզ հանգամանքով․ կազմը ձևավորվել էր բավականին հապճեպորեն, և ֆուտբոլիստներին ու մարզիչներին ժամանակ էր հարկավոր միմյանց հասկանալու համար: Ամեն ինչ հետզհետե կարգավորվեց, խաղի որակի բարձրացման հետ միասին եկան նաև մարզական արդյունքները: ԲԿՄԱ-ն նախքան կորոնավիրուսային դադարն անցկացրած 8 մրցավեճից 7-ում հաղթել էր մրցակիցներին, զիջել ընդամենը 1-ում:

Ինչպես հաջողվեց մրցունակ թիմ կառուցել

Հասկանալի է, որ Առաջին խմբի ընթացիկ առաջնությունը, չնայած բազմաթիվ նոր թիմերի ներգրավմանը, չունի շատ բարձր մակարդակ: Չնայած դրան, հատկապես ոչ դուստր թիմերում մեծ է բավականին փորձառու լեգեոներների և հայ խաղացողների թիվը: Այդ ամենն արդեն իսկ նշանակում է, որ լավագույն քառյակում տեղ զբաղեցնելն այս պահի դրությամբ վատ ցուցանիշ չէ: Նշված փաստը ցույց է տալիս նաև, որ մարզչական շտաբն առավելագույնին հասնելու նպատակ է դրել ֆուտբոլիստների առջև, անկախ նրանից, որ ԲԿՄԱ-ում մարզական արդյունքներ գրանցելն առաջնային նախապայման չէ: Ռաֆայել Նազարյանին հաջողվել է կազմավորել շատ մոտիվացված կոլեկտիվ, որտեղ ներդրվել է թիմային ֆուտբոլի գաղափարը, և որտեղ դրա արդյունքում ձևավորվում են վառ անհատականություններ:

Ինչպես «Արցախում», որտեղ Նազարյանն աշխատում էր 2018/19թթ․ մրցաշրջանի առաջին հատվածում, այստեղ էլ գործածվում է 3 կենտրոնական պաշտպանով խաղային սխեմա, տվյալ դեպքում՝ 3-4-3-ը: ԲԿՄԱ-ն փորձում է հավասարակշռված ֆուտբոլ խաղալ թե՛ պաշտպանվելիս, թե՛ հարձակվելիս: Նրա «ամենասարսափելի» զենքը հակագրոհներն են, նման մարտավարություն կիրառվում է հատկապես աղյուսակի առաջատարների («Վեստ Արմենիա», «Վան», «Լոկոմոտիվ») դեմ հանդիպումներում, հաճախ նաև այն հատվածներում, երբ թիմն այլ մրցակիցների հետ խաղերում առաջ է անցել հաշվի մեջ ու կարող է իրեն թույլ տալ գործել ավելի խորքից: Տվյալ մրցակցին դիմավորելով սեփական կիսադաշտից՝ բանակայինները սպասում են իրենց շանսին և սպառնում նրան հակագրոհների օգնությամբ: ԲԿՄԱ-ն իր 48 գոլերի մի ահռելի մասը խփել է հենց նման եղանակով: Այդպիսի մարտավարությունը լիովին տրամաբանված է, քանի որ թիմն առջևի գծում ունի արագաշարժ ֆուտբոլիստների, որոնք պատրաստ են օգտվել ազատ տարածություններից:

Աղյուսակի առաջատարների դեմ խաղերում հատվածաբար, իսկ մյուս մրցակիցների հետ դիմակայություններում՝ մշտապես կիրառվում է բարձր պրեսինգ: Սա խաղային այն բաղադրիչներից է, որի ճիշտ օգտագործումը ԲԿՄԱ-ին առանձնացնում է Առաջին խմբի մյուս թիմերից: Ինտենսիվ բարձր պրեսինգի կիրառումը գրեթե մշտապես արդյունք է տալիս, թիմին հաջողվում է մրցակցից խլել գնդակը հենց նրա կիսադաշտում: Ֆուտբոլիստները նման դեպքում կիրառում են անհատական հսկողություն մրցակցի խաղացողների նկատմամբ՝ ստիպելով սխալ թույլ տալ: Պետք է նշել նաև, որ Նազարյանի թիմը գնդակի կորստից հետո ակտիվորեն հակապրեսինգի է դիմում՝ ջանալով արագորեն կրկին տիրել նախաձեռնությանը: Եվ այս ամենը՝ համարյա ամբողջ 90 րոպեի ընթացքում: Նմանօրինակ խաղաոճը հոգնեցուցիչ է և ֆիզիկական լավ տվյալներ է պահանջում ֆուտբոլիստներից: Մտահղացումը տվյալ պարագայում արդարացված է, քանի որ բացառապես երիտասարդներով համալրված թիմն ունի բավականաչափ եռանդ ու ագրեսիվություն:

ԲԿՄԱ-ի բարձր պրեսինգը՝

Հայաստանում գրեթե նույնքան, ինչքան «Ռեալում». Որտեղ են ավելի շատ խաղաժամանակ ստանում մինչև 21 տարեկան ֆուտբոլիստները

Հետաքրքիր կառուցվածք ունեն նաև դիրքային գրոհները, 3-4-3 սխեման յուրահատուկ հնարավորություններ է ընձեռում դրա համար: Եվ այսպես, 2 եզրայինները փակում են ամբողջ եզրը, պետք է հասցնեն թե՛ պաշտպանվել, թե՛ միանալ գրոհներին: Երբ նրանք եզրերով ընթանում են առաջ, նոմինալ եզրային հարձակվողները՝ սովորաբար Ժիրայր Շաղոյանը և Նարեկ Գրիգորյանը, հայտնվում են կիսաեզրերում՝ մրցակցի եզրային ու կենտրոնական պաշտպանների մեջտեղի հատվածից փոքր-ինչ բարձր: Նրանք, այդպիսով, հայտնվում են մրցակիցների թե՛ պաշտպանների, թե՛ կիսապաշտպանների համար անհարմար դիրքերում, ավելի հեշտ են ընդունում գնդակը: Նրանք, ստանալով գնդակը, ունենում են հնարավորություն կա՛մ այն տեղափոխել եզր, կա՛մ ինքնուրույն շարժվել կենտրոն ու հարվածել: Առավելապես երկրորդ տարբերակը ծայրահեղ տհաճ է մրցակիցների համար: Նշված 2 ֆուտբոլիստներն էլ գնդակով շատ արագ են շարժվում առաջ, ուժեղ են մեկը մեկի դեմ պայքարում ու նաև ուժգին հարվածների են տիրապետում (Ժիրայրը՝ աջով, Նարեկը՝ հատկապես ձախով):

Պատահական չէ, որ այդ երկուսը միասին խփել են առաջնությունում թիմի գրանցած գոլերի կեսից ավելին (Շաղոյան՝ 18 գոլ, 10 արդյունավետ փոխանցում, Գրիգորյան՝ 9+8): Բայց դիրքային գրոհների ժամանակ առանձնահատուկ պետք է ընդգծել այն ֆուտբոլիստների գործոնը, որոնք փակում են ամբողջ եզրը: Նրանց՝ լայն բացվելու հանգամանքը ձգում է մրցակցի պաշտպանությունը, առաջացնում բացեր: Նրանք օգնում են իրենց թիմին երբեմն նույնիսկ առանց գնդակին դիպչելու: Ստացվում է, որ բանակայինները գրոհի ավարտական փուլում ունենում են մեկ գծի վրա գտնվող 5 ֆուտբոլիստներ, ինչի շնորհիվ գնդակին այդ պահին տիրող խաղացողը փոխանցում կատարելու մի քանի տարբերակ է ունենում:

Ահա թե ինչպես է ԲԿՄԱ-ն նշված՝ 5 ֆուտբոլիստներով բացազատվելու եղանակի արդյունքում ճեղքեր առաջացնում մրցակցի պաշտպանությունում: Այստեղ պակաս կարևոր չէ մի փոքր հետ կանգնած 2 կենտրոնական կիսապաշտպանների գործոնը, որոնց կանդրադառնանք քիչ անց՝

Եվ հետո, 3-4-3 խաղային սխեման, ինչը պակաս կարևոր չէ, թույլ է տալիս եզրերում հաճախ ստեղծել 2-ն ընդդեմ 1-ի իրավիճակներ, ինչի շնորհիվ ԲԿՄԱ-ն մեծ առավելություն է ստանում այդ հատվածներում:

Իրավիճակներ, երբ ԲԿՄԱ-ն եզրերում քանակական առավելություն է առաջացնում, ինչի արդյունքում ի հայտ են գալիս գրոհը շարունակելու ավելի շատ տարբերակներ՝

Նազարյանի թիմը չի ձգտում շատ երկար վերահսկել գնդակը (միջինը մեկ խաղում՝ 53%): Կարևորը գնդակի արագ տեղաշարժն է, այն անընդհատ եզրից եզր տեղափոխելը, մինչև կստացվի գրոհը սրելու պահ գտնել: ԲԿՄԱ-ի սիրելի հնարքներից մեկը կոնկրետ եզրում ֆուտբոլիստների կուտակում առաջացնելն է, ինչից հետո գնդակն արագորեն ուղարկվում է հակառակ եզր, որտեղ թիմի ֆուտբոլիստը մեկը մեկի դիմաց է մնում մրցակցի խաղացողի հետ: Եվ քանի որ թիմը, ինչպես նշեցինք, ունի անհատապես լավ պատրաստված ֆուտբոլիստներ, կարելի է այդ մեկ անցումից հետո հայտնվել հարվածային դիրքում: Պետք է նշել, որ ԲԿՄԱ-ն դեռևս շատ է կաղում գոլային պահերի իրացման առումով, այլապես հիմա կարող էր ավելի լավ արդյունքներ ունենալ (ուժեղագույն 8 թիմերի շարքում ավելի քիչ գոլ է խփել միայն «Սևանը»՝ 33):

Ֆուտբոլիստները թիմային համակարգում անհատական աճ են գրանցում

Առանձնացրինք 2 խաղացողների, որոնք տպավորիչ անհատական վիճակագրություն ունեն: Բայց այդ ամենը հնարավոր չէր լինի առանց թիմակիցների աջակցության: Նախ անչափ կարևոր է կիսապաշտպանական դուետի դերը, որը սովորաբար կազմում են Սերգեյ Մկրտչյանը և Նարեկ Աղասարյանը: Երկուսն էլ շատ մեծ ծավալի աշխատանք են կատարում: Երկուսն էլ սահմանափակ կիսապաշտպաններ չեն: Ակտիվ մասնակցություն են ունենում թե՛ գրոհների կառուցմանը, թե՛ գնդակի խլմանը կամ վերադարձմանը: ԲԿՄԱ-ի սխեման, ինչպես ցուցադրեցինք վերևում, դիրքային գրոհի ժամանակ վերածվում է 3-2-5-ի, և երբ հարձակման գիծը մրցակցի կիսադաշտում կորցնում է գնդակը, սովորաբար հենց Մկրտչյանն ու Աղասարյանն են անմիջապես սկսում հակապրեսինգի դիմել՝ փորձելով վերադարձնել գնդակը: Նրանք առանց գնդակի գործելիս մեծ ագրեսիվություն են դրսևորում: Ընդ որում, հարձակմանը մասնակցելու առումով առանձնանում են տարբեր որակներով: Եթե Մկրտչյանը սուր փոխանցումների շնորհիվ թիմակիցներին դուրս է բերում հարվածային դիրքեր (8 գոլային փոխանցում այս առաջնությունում), ապա Աղասարյանը հաճախ է հայտնվում տուգանային հրապարակում ու փորձում անձամբ եզրափակել գրոհները (արդեն 6 գոլի հեղինակ է դարձել):

«Նոան» տարբերվող ֆուտբոլ է խաղում, ափսոս, առանց հայ ֆուտբոլիստների․ Թիմի տակտիկական գաղտնիքները

Երբ ԲԿՄԱ-ի մրցակիցը խաղում է բարձր պրեսինգով ու խնդիրներ առաջադրում, բանակայինները նախընտրում են գրոհները սկսել բարձրից երկար փոխանցումներով: Նախ հարկավոր է նշել, որ թիմին շատ են պետք գալիս հատկապես ձախ կենտրոնական պաշտպան Արման Ղազարյանի առաջին փոխանցումները, որոնցով սկսվում են գրոհները: Նա տիրապետում է հեռահար դիպուկ փոխանցումների: Եվ երբ մրցակցի պաշտպանությունը բարձր է տեղակայված, այդ փոխանցումները հնարավորություն են տալիս դեպի ազատ մնացած թիկունք ներթափանցել, օրինակ՝ Նարեկ Գրիգորյանին: Վերջինս առաջին խաղաշրջանում մի շարք դեպքերում գործեց ոչ թե կիսաեզրում, այլ հենց կենտրոնական հարձակվողի դիրքում: Իսկ երբ այդ հատվածում Արամ Քոլոզյանն է, հենց նրա ուղղությամբ են հետևում բարձրից փոխանցումներ, մինչդեռ թիմակիցները փորձում են տիրել «երկրորդ գնդակներին»: Այդ հարձակվողը գերազանց է դրսևորում իրեն օդային մենապայքարների ժամանակ: Այս առաջնությունում 11 խաղ է անցկացրել, հասցրել խփել 5 գոլ ու 2 «ասիստ» կատարել: Բայց նա, դրանից զատ, իր կատարած աշխատանքով շատ է օգնում թե՛ Շաղոյանին, թե՛ Գրիգորյանին:

ԲԿՄԱ-ի ներկայիս կազմն առաջադիմելու դեռ շատ տեղ ունի: Աղյուսակում դժվար կլինի հասնել բավականին առաջ պոկված լավագույն եռյակին, սակայն խաղային որակը բարելավելը լիովին իրատեսական է: Ռաֆայել Նազարյանն իր ֆուտբոլիստներին, բնականաբար, թույլ չի տա թուլանալ, քանի որ ամեն ինչ դեռ առջևում է: Խաղացողներն էլ պետք է հասկանան, որ 1-2 լավ խաղով բավարարվել չի կարելի ու այս ժամանակահատվածում պետք է հնարավորինս կատարելագործվել, որպեսզի հետագայում իրենց տեղերը գտնեն Բարձրագույն խմբի ակումբներում: Այս ֆուտբոլիստները ԲԿՄԱ-ում ելույթներն ավարտելուց հետո վերադառնալու են իրենց ակումբներ ու մեկնարկային կազմում հայտնվելու համար բախվելու լուրջ մրցակցության: Այդ փորձությանը պետք է պատրաստված մոտենալ, առաջին հերթին, հոգեբանորեն:

Միացի՛ր հայկական ամենասպորտային Instagram-ին:


«Նոայի» կարևոր ֆուտբոլիստը լուրջ վնասվածք է ստացել

Սիրելի Ձմեռ Պապ… Ի՞նչ սպասել հայկական ֆուտբոլից 2021 թվականին

Խոակին Կապառոսը՝ Հայաստանի 2020 թ. լավագույն մարզիչ

«Ալաշկերտ-2»-ը դադարեցնում է իր ելույթներն Առաջին խմբում

«Նորավանքի» ֆուտբոլիստները հանդիպել են արցախցի երեխաների հետ

Ռաֆայել Նազարյանը կգլխավորի Հայաստանի Մ21 տարեկանների հավաքականը

ԲԿՄԱ-ն արժանի դիմադրություն ցույց տվեց «Լոռիին»․ VNews-ի ֆոտոշարքը նրանց միջև գավաթային խաղից

VBET Հայաստանի գավաթ․ ԲԿՄԱ – «Լոռի»․ մեկնարկային կազմեր, ուղիղ եթեր

12 թիմեր պայքարի մեջ են մտնում VBET Հայաստանի գավաթի համար․ Ամենաուշագրավ փաստերը՝ 1/8 եզրափակիչ խաղերին ընդառաջ

Հայաստանի հավաքականի նորեկը երկու ֆանտաստիկ գոլ է խփել, մեկը՝ սեփական դարպասը, մյուսը՝ մրցակցի (տեսանյութ)

«Նորավանք». Նոր ակումբ Հայաստանում (տեսանյութ)

Կայացել է Հայաստանի Բարձրագույն և Առաջին խմբերի վիճակահանությունը

«Արագածը» պնդում է, որ ՀՖՖ-ից չի ստացել 100%-անոց փաստեր

«Լոկոմոտիվը», «Վանը» և «Արագածն» արձագանքել են ՀՖՖ-ի որոշմանը

«Այսքանով խնդիրը ամբողջությամբ լուծված չենք համարելու, գործընթացը շարունակվելու է». Արթուր Ազարյանը՝ պայմանավորված խաղերի խնդրի մասին

Մելիքբեկյան. «Ապացույցները, որոնք ստացել ենք միջազգային գործընկերներից, փոխանցվելու են իրավապահներին»