Logo

Ռուսական ևս 9 բանկերի հավելվածներ հեռացվել են Google Play-ից

Հեղինակ
Նաիրա Պողոսյան
13:27 / 20.03.2023LifeTech
null

Google Play հարթակը հերթական անգամ հեռացրել է ռուսական բանկերի հավելվածներ. ըստ «Известия»-ի՝ «Уралсиб»-ի, «Приморье»-ի, «Левобережный»-ի, «Зенит»-ի, СДМ բանկի, Վերակառուցման և զարգացման Ուրալյան բանկի (УБРиР), Ланта բանկի, Металлинвест և «Санкт-Петербург» բանկերի ծրագրային լուծումները:

Խոսքը ֆինանսական հաստատությունների մասին է, որոնք հայտնվել են ԱՄՆ արդարադատության նախարարության պատժամիջոցների տակ։ Բացի նշված բանկերից, դրանց տակ են հայտնվել և՛ MKB-ն, և՛ MTS-բանկը, որոնց ծրագրային ապահովումը նույնպես հասանելի չէ Google Play-ում։ Ավելի վաղ՝ 2022թ., Google Play-ից և App Store-ից հանվել էին СберБанк-ի և այլ բանկերի հավելվածները։

Սահմանափակումների արդյունքում ԱՄՆ-ում այդ ֆինանսական հաստատությունների ակտիվները սառեցվում են, դոլարով գործարքները կասեցվում են, իսկ նրանց հետ բիզնեսով զբաղվող ընկերությունները երկրորդական պատժամիջոցների տակ են ընկնում։ Այնուամենայնիվ, այն օգտատերերը, ովքեր արդեն ներբեռնել են այդ հավելվածները, կարող են շարունակել օգտագործել դրանք:

«Սա սպասելի իրադարձություն էր։ Մենք նախապես պատրաստվել էինք դրան։ Բանկն առաջիններից էր, ով իր բոլոր պաշտոնական հավելվածները տեղադրեց RuStore ծառայության վրա: Սա Android-ում հավելվածներ ներբեռնելու ամենահարմար և ամենաարագ միջոցն է ինչպես անհատ հաճախորդների, այնպես էլ իրավաբանական անձանց ու ձեռնարկատերերի համար»,- մեջբերում է ТАСС-ը УБРиР-ի մանրածախ բիզնեսի բաժնի ղեկավար Սերգեյ Միլովսկուն։

Ավելի վաղ ֆինանսական հաստատությունները բազմիցս զգուշացրել են շուկաներում իրենց ծառայությունները նմանակող խարդախ ծրագրերի ի հայտ գալու մասին: Հաճախ ասում են, որ Android-ի համար առավել անվտանգ տարբերակներից մեկը հավելվածի APK ֆայլեր ներբեռնելն է հենց բանկերի կայքերից: Այնուամենայնիվ, այստեղ նույնպես ամեն ինչ հարթ չէ. վերջին տվյալների համաձայն, միայն 2022թ. Рунет-ում ֆիշինգային ռեսուրսների թիվը եռապատկվել է, այդ թվում՝ բանկային կայքերի կերպարանքով: