Airthings Masters. Լևոն Արոնյանը գլխավոր մրցանակը կվիճարկի Թեյմուր Ռաջաբովի հետ սկզբունքային մրցախաղում

Լևոն Արոնյանը շարունակեց գերազանց ելույթները Airthings Masters արագ շախմատի առցանց մրցաշարում՝ հաղթող ճանաչվելով Մաքսիմ Վաշիե-Լագրավի հետ կիսաեզրափակիչ մրցախաղում:

Գլխավոր մրցանակի՝ 60 հազար դոլար պարգևավճարի համար եզրափակիչ մրցախաղում Լևոն Արոնյանը սկզբունքային մրցավեճում կմրցի ադրբեջանցի Թեյմուր Ռաջաբովի հետ: Այդ մրցախաղերը կկայանան հունվարի 2-ին և 3-ին: Եզրափակչում պարտված շախմատիստին բաժին կհասնի 40 հազար դոլար պարգևավճար:

Լևոն Արոնյանը շահեց նաև Մաքսիմ Վաշիե-Լագրավի հետ կիսաեզրափակիչ 2-րդ մրցախաղը:  Առաջին երկու պարտիաներում մրցակիցները խաղաղ դաշն կնքեցին: 3-րդ պարտիայում Արոնյանը սպիտակներով 113-րդ քայլին հաղթանակ տոնեց ու վճռեց մրցակցության ելքը:  Նախատեսված 4-րդ պարտիայի անցկացումն այլևս անիմաստ էր, քանի որ առաջին մրցախաղում Լևոնը հաղթել էր 3-1 հաշվով:

Թեյմուր Ռաջաբովն էլ, որ առաջին մրցախաղում 3-1 հաշվով հաղթել էր Դանիլ Դուբովին, երկրորդ մրցախաղի առաջին երկու պարտիաները շահելով, վճռեց մրցակցության ելքը:
Մաքսիմ Վաշիե-Լագրավն ու Դանիլ Դուբովը կվիճարկեն 3-րդ տեղը: Այդ մրցախաղում հաղթողը կստանա 25 հազար դոլար, պարտվողը՝ 15 հազար:

Լևոն Արոնյան. «Հրաշքներ լինում են»

Միացի՛ր հայկական ամենասպորտային Instagram-ին: