Ալիկ Առաքելյանը տարիքային 4-րդ ռեկորդը սահմանեց

Առաջնության աշնանային հատվածի ավարտական խաղում՝ «Շիրակի» հետ մրցավեճում «Փյունիկի» 24-ամյա կիսապաշտպան Ալիկ Առաքելյանը Բարձրագույն խմբում անցկացրած խաղերի քանակով տարիքային նոր ռեկորդ սահմանեց: Նա 177-րդ անգամ խաղադաշտ դուրս եկավ ու գերազանցեց «Միկայի» նախկին ֆուտբոլիստ Սարգիս Կարապետյանի տարիքային ռեկորդը: Վերջինս ՀՀ առաջնություններում հանդես եկած ֆուտբոլիստներից 24 տարեկանում բոլորից շատ՝ 176 խաղ էր անցկացրել Բարձրագույն խմբում:

Ալիկ Առաքելյանն արդեն տարիքային 4-րդ ռեկորդը սահմանեց: Նրան են պատկանում 19-20 և 22 տարեկանների (Դավիթ Հակոբյանի հետ միասին) ռեկորդային ցուցանիշները: Եվ եթե Առաքելյանը վնասվածքների պատճառով մի շարք հանդիպումներ բաց թողած չլիներ, ապա ժամանակին կգերազանցեր նաև նախկին շիրակցի Դավիթ Հակոբյանին պատկանող 21 և 23 տարեկանների տարիքային ռեկորդներն ու հատած կլիներ 200 խաղի սահմանագիծը:

Եթե Ալիկ Առաքելյանը շարունակի իր կայուն ելույթները Հայաստանում և զերծ մնա վնասվածքներից, ապա առաջիկա տարիներին տարիքային նոր ռեկորդների հեղինակ կդառնա:

Գևորգ Կասպարովի պատմական նվաճումը. Նա Հայաստանի առաջնությունների ամենատարեց դարպասապահն է

Հարկ է նշել, որ Առաքելյանն իր ներկայիս տեմպերով զգալիորեն գերազանցում է ՀՀ առաջնություններում անցկացրած խաղերի քանակով (461) բացարձակ ռեկորդակիր Հովհաննես Թահմազյանի ցուցանիշը: Վերջինս 24 տարեկանում Բարձրագույն խմբում ընդամենը 83 խաղի էր մասնակցել: Սակայն Թահմազյանը ֆուտբոլային իր երկարակեցության շնորհիվ դարձավ բացարձակ ռեկորդակիր՝ ելույթներն ավարտելով 41 տարեկանում:

Պարզ հաշվարկները ցույց են տալիս, որ Թահմազյանի ռեկորդը գերազանցելու համար Ալիկ Առաքելյանին հարկ կլինի խաղալ առնվազն մինչև 35 տարեկանը:

Ալիկ Առաքելյանը Բարձրագույն խմբում ֆուտբոլային կարիերան սկսել է 2012թ.: Նրա նորամուտը կայացել է հոկտեմբերի 7-ին «Ուլիսի» հետ մրցավեճում: «Միկան» խաղը շահում էր 1-0 հաշվով և ավելացված ժամանակում Ժոլտ Հոռնյակն Արեգ Ազատյանի փոխարեն խաղադաշտ դուրս բերեց պատանի Առաքելյանին, որը 16 տարեկան 139 օրական էր: Այդ ցուցանիշով նա եզրափակում է «Միկայում» հանդես եկած ամենաերիտասարդ ֆուտբոլիստների հնգյակը:

Ուրոշ Նենադովիչը՝ Հայաստանի առաջնությունների ամենաարդյունավետ սերբ ֆուտբոլիստ

2012/13թթ. մրցաշրջանում պատանի ֆուտբոլիստը ևս 11 խաղում փոխարինման մտավ: Իսկ արդեն հաջորդ մրցաշրջանում Ալիկ Առաքելյանը «Միկայի» հիմնական կազմի խաղացող էր:

2014/15թթ. մրցաշրջանից հետո Ալիկ Առաքելյանը տեղափոխվեց «Փյունիկ», որի կազմում ներկայումս ամենափորձառու ֆուտբոլիստն է ՀՀ առաջնություններում անցկացրած խաղերի քանակով:

Արտակ Գրիգորյանը դարձավ 12-րդ ֆուտբոլիստը, որ հատեց անցկացրած 400 պաշտոնական խաղի սահմանագիծը

Ինչ վերաբերում է տարիքային մյուս ռեկորդներին, ապա առաջնության աշնանային հատվածում ալաշկերտցի Գագիկ Դաղբաշյանը հնարավորություն ուներ գերազանցելու Արամ Բարեղամյանի 30 տարեկան ֆուտբոլիստների մեջ սահմանած տարիքային ռեկորդը (276 խաղ): Դրա համար նրան անհրաժեշտ էր մասնակցել 11 խաղի: Սակայն որոշ հանդիպումների հետաձգման պատճառով «Ալաշկերտը» 10 խաղ անցկացրեց, որից ընդամենը 5-ին մասնակցեց Դաղբաշյանը:

Իսկ ինչպիսի՞ն են տարիքային ռեկորդները գերազանցելու հեռանկարները 2021թ.: Միանգամից նշենք, որ պատկերը կրկին շատ տխուր է: Միանշանակ կարելի է փաստել, որ Ալիկ Առաքելյանը հերթական տարիքային ռեկորդը կսահմանի: Ընդամենը 3 խաղի մասնակցելու դեպքում նա կդառնա 25 տարեկանների ռեկորդակիր:

Գևորգ Ղազարյանն ընդգրկվեց 100 գոլի սահմանագիծը հատած ռմբարկուների ցանկում

Մյուս հավակնորդը կրկին Գագիկ Դաղբաշյանն է, որը պետք է փորձի գերազանցել Արամ Բարեղամյանի արդեն 31 տարեկանի տարիքային ռեկորդը (300 խաղ), ինչն առավել դժվար կլինի, քանի որ դրա համար անհրաժեշտ է 2021թ. մասնակցել 30 խաղի:

VNews.am-ը ներկայացնում է ՀՀ առաջնություններում անցկացրած խաղերի քանակով տարիքային ռեկորդների ցանկը՝ նշելով գրանցման տարեթիվը:

Միացի՛ր հայկական ամենասպորտային Instagram-ին: