Ինչու է փակուղում Մեսիի ապագան «Բարսելոնայում»

«Բարսելոնայի» երկրպագուները սրտատրոփ սպասում են ընդամենը մի հարցի պատասխանի՝ Լիոնել Մեսին կմնա՞ թիմում և կկնքի նոր պայմանագիր, թե՞ ոչ: Հաշվի առնելով ակումբի վերջին ելույթները, ինքնաբերաբար, առաջանում է երկրորդ հարցը. «Ի՞նչու խաղալ մի ակումբում, որը 2012 թվականից ի վեր Չեմպիոնների լիգայում ավելի շատ ջախջախվում է, քան հաղթում»:

Լեգենդար հարձակվող Խրիստո Ստոիչկովը 2020 թվականի օգոստոսին պնդում էր, որ «Բարսելոնան» պետք է ամեն գնով պահի Լիոնել Մեսիին: Նա վերջերս կրկին սատարեց արգենտինացուն, երբ հրապարակվեցին նրա պայմանագրի աղմկահարույց մանրամասները:

«Որևէ մեկը չի ստիպել «Բարսելոնայի» այս կամ այն նախագահին պայմանագիր թարմացնել Մեսիի հետ: Նման վիճակում ես սատարում եմ Լեոյին: «Բարսելոնան» նորից թույլ տվեց կոպիտ քայլ իր լեգենդար խաղացողի նկատմամբ: Արժե՞ շարունակել ելույթներն այսպիսի թիմի կազմում: Պետք է որոշի Մեսին»:

Լեոյի հեռանալու մասին խոսակցություններն ու դրա մանրամասները գիտեն բոլորը: Գրեթե ամեն անգամ Լեոյի գնալու մասին շշուկներից հետո «Բարսայի» ղեկավարությունը հասկանում էր՝ Մեսին ցանկանում է վարձատրվել ավելի շատ, քան Ռոնալդուն, ու կրկին վերանայում էր պայմանագիրը: Հետո, գումարի հարցը դարձավ երկրորդական: Լեոն նախ զրկվեց Նեյմարից՝ նրան զիջելով ՊՍԺ-ին, թեպետ այլ ելք որպես այդպիսին չուներ էլ Բարսան, իսկ նախորդ տարվա ամռանը «Բարսայի» լեգենդար եռյակը քանդվեց վերջնականապես. Սուարեսին փաթեթավորեցին ու սկուտեղի վրա մատուցեցին ուղիղ մրցակից «Ատլետիկոյին»:

Սեպտեմբերին Լեոն ուղարկեց իր հանրահայտ ֆաքսը, որտեղ նշված էր. «Վաճառեք իմ տրանսֆերը. Ես ցանկանում եմ հեռանալ»: Ամբողջ աշխարհը սկսեց հավատալ, որ այն, ինչը հնարավոր չէր պատկերացնել սովորական պայմաններում, հենց 2020-ին պետք է իրականանար: Մի քանի օր եվրոպական մամուլը գրում-ջնջում էր, թե որ ակումբն ավելի շատ կհամապատասխանի Լեոյին: Սակայն բոլորի համար անսպասելիորեն Մեսին հանձնվեց: Նախ նա վերջ դրեց «գործադուլին» ու սկսեց մարզվել: Հետո նրան համոզեցին խաղալ: Նրա փոքրիկ հաղթանակը դարձավ Բարտոմեուի հրաժարականը: Մեսին հաղթեց քաղաքական առճակատումը, սակայն սպորտային տեսանկյունից տապալվեց:

Փաստացի Լեոն երջանկացրեց երկրպագուներին իր հավատարմությամբ, սակայն հիմա ոչ բոլորն են ուրախ այդ առիթով: Մեսին իրեն փակեց սիրելի ակումբում, որը չկատարեց նրա ցանկություններից և ոչ մեկը.

•  Այս պահին «Բարսելոնայի» պարտքերն ավելի խորն են, քան ձեր բակի հինավուրց բարդու ծառի արմատները: Այս մասին ավելի մանրամասն այստեղ: Հատուկ նրանց համար, ովքեր չեն հիշում՝ Կոուտինյոյի Դեմբելեի ու Գրիզմանի համար «Բարսելոնան» վճարել է 305 մլն եվրո: Ու վստահ ասում ենք՝ այս 3 տրանսֆերները ոչ այլ ինչ են, քան մեծ ֆեյլ:
•  Ակնահայտորեն ուշացրեց սերնդափոխությունը՝ ժամանակին չթարմացնելով կազմն ու մոռանալով Լա Մասիայի մասին: Տևական ժամանակ «Բարսելոնայի» մանկապատանեկան դպրոցի մասին խոսում էին հիացմունքով (Մեսին էլ կես ոտքով այնտեղի «շրջանավարտ է»): Սակայն տարիների հետ տարբեր պատճառներով «Բարսան» սկսեց միլիոններ ծախսել տրանսֆերային շուկայում ու բաց թողնել իր սաներին. Վերջին տարիներին ակումբը դուրս է շպրտել Մարտին Մոնտոյային, Բոյան Կրկիչին, Իսաակ Կուենկային, Քրիստիան Տելիոյին, Սանդրոյին, Մունիրին: Կամ այլ օրինակ. «Բարսելոնան» «Ռոմային» տվել է Կառլես Պերեսին ու 30 միլիոն եվրոյով ձեռք է բերել «Բրագայի» երիտասարդ կիսապաշտպան Ֆրանսիշկու Տրինկաոյին: Աբսուրդ: Եվ ըստ իսպանական մամուլի՝ պատճառը Մեսին է: Արգենտինացի հանճարը լեզու չի գտել սույն երիտասարդների հետ. ելքը մեկն էր:
• Չեմպիոնների լիգայում «Բարսան» վերջին 5 տարիներին վերածվել է persona non grata-ի, որին ով հասնում՝ «ծեծում է»: Ու սրանք հենց այնպես խոսքեր չեն. կատալոնական ակումբի եվրոպական արկածները գնալով նմանվում են մղձավանջի: 14/15-ի տրիումֆից հետո «Բարսելոնային» մեկական անգամ ջախջախել են «Յուվեն» ու «Ռոման»՝ հաղթելով 3-0 հաշվով: «Գոլային ապտակները» երկրաչափական պրոգրեսիայի սկզբունքով շարունակել են «Լիվերպուլը» (4-0) և «Բավարիան» (8-2): Լավագույն ավանդույթներն ընդամենը մի քանի օր առաջ ամրագրեց ՊՍԺ-ն (4-1): Իսկ թե այդ խաղերում (5 խաղ, 1 գոլ, այն էլ 11 մետրանոցից) ուր էր կորչում Մեսիի հանճարեղությունը (որը որևէ մեկը կասկածի տակ չի դնում), մնում է անբացատրելի:

Այն լեգենդար «Բարսայից», որն ահ ու սարսափ էր առաջացնում մրցակիցների մոտ, գրեթե ոչինչ չի մնացել: Այլևս թիմի հետ չեն Չավին, Պույոլը, Ինյեստան, ծերացել են Բուսկետսն ու Պիկեն։ Իսկ սարսափելին այն է, որ Լեոն ՊՍԺ-ի հետ վերջին «պերֆոմանսից» հետո, որտեղ նա, ի դեպ, վատ չխաղաց, իր հետագա ճակատագիրը դարձրեց ավելի մշուշոտ:

Որևէ մեկը չի ասում, որ Լեոն հանճար չէ: Նա շարունակում է մնալ համաշխարհային ֆուտբոլի 2 գլխավոր գործող անձանցից մեկը, որը կարող է ցանկացած իրավիճակում միայնակ վճռել հանդիպման ելքը: Բայց նման դեպքերը ավելի են նվազում: Որո՞նք են այս մրցաշրջանում Մեսիի տպավորիչ ցուցանիշները:

• Լա Լիգայի լավագույն ռմբարկուների մրցապայքարում նա շարունակում է մնալ թոփում՝ իր հաշվին գրանցելով 16 գնդակ: Սակայն ասիստները զգալիորեն պակասել են՝ ընդամենը 3:
• Իսկ ո՞ւմ դարպասն է գրավել այս մրցաշրջանում Լեոն: «Էլչե՞», «Գրանադա՞», «Բետի՞ս»: Չեմպիոնների լիգայում ավելի զարմանալի է. Մեսին 4 գոլ է խփել, 4-ն էլ 11 մետրանոցից:
• Եվ, իհարկե, ամենից շատ հարվածներն է կատարել Եվրոպայում: Կրիշը, Զլատանն ու Լևանդովսկին չգիտեն՝ խնդան, թե լան:

Մեր հիշողության մեջ գուցե դաջված է, որ Լեոն «Բարսելոնայի» ավագն է անհիշելի ժամանակներից, սակայն պաշտոնապես նրա համար այդ «չարաբաստիկ» թևկապը Մեսին կրում է միայն 2018 թվականից: Այդ օրվանից ի վեր թիմին «ջարդել են» «Լիվերպուլը» (0-4), «Բավարիան» (2-8) և ՊՍԺ-ն (1-4): Երբ թիմը ֆիասկոյի ենթարկվեց Հռոմում, ավագն Ինյեստան էր, բայց թիմի առաջատարը Մեսին էր, որն անջատվել էր ինչպես նախորդ բոլոր, այնպես էլ հաջորդ բոլոր ծանր պարտությունների ժամանակ: «Բարսային» հիմա պետք է խարիզմատիկ (Հենդերսոն) և/կամ ջղային ավագ (Ռամոս), որը թափ կտա հանդերձարանը: Այդպիսի մարդ այսօր «Բարսայում» չկա:

Մեր ընտրանին

• 10 ֆուտբոլիստ, որ մերժել է «Բարսելոնային» ու տեղափոխվել «Ռեալ»

• #Ոսկե_Թիմ_1. «Բարսելոնայի» չեմպիոնական կազմը 1998/99 մրցաշրջանում

• Ոչ՝ «ոսկե սարերին». Ֆուտբոլիստներ, որոնք մերժել են թոփ ակումբներին (մաս 1)

• «Ես կխաղամ «Ռեալում». Նեյմարին բաց թողնելը «խելագարության» հասցրեց Պերեսին

Իրականում Մեսին լրջագույն դեսպոտ է հանդերձարանում: ԱԱ-2018-ի խմբային փուլի՝ Խորվաթիայից կրած 0-3 հաշվով պարտությունից հետո արգենտինացիները հանդերձարանից դուրս չէին գալիս ավելի քան 40 րոպե: Երբ դռները բացվեցին, ֆուտբոլիստները բանակի լավագույն ավանդույթներով՝ դիմացինի ծոծրակին նայելով «ձախ, ձախ, ձախ-աջ-ձախ» անելով մեռյալ լռությամբ դուրս եկան ու առանց հարցազրույց տալու հեռացան: Ճանապարհին կանգ առավ միայն Մասկերանոն, որը չկարողացավ անարգել հեռավոր Արգենտինայից Ռուսաստան ժամանած լրագրողների աշխատանքը ու փորձեց որոշ մեկնաբանություն տալ: Բայց մի քանի վայրկյան անց 6-րդ զգայարանով իր վրա զգաց Մեսիի սառեցնող հայացքը, տեսավ, որ ամբողջ թիմը կանգնել է ու չի շարժվում, իրեն է սպասում: Սա ցույց է տալիս ևս մեկ անգամ, որ կարելի է լինել խիստ, բայց պահանջկոտ, և ոչ թե դեսպոտ դիկտատոր, ինչպիսին Մեսին է:

Արգենտինացին ամեն հարմար առիթով վատաբանում է «Բարսելոնայի» ղեկավարությանը: Այն որ կապտանռնագույն գրասենյակում նստած և մենեջմենթով զբաղվող փողկապով պարոնայք դրան ավելի քան արժանի են, դրանում կասկած չկա: Դեռ մի բան էլ քիչ է անում Լեոն: Սակայն ինչպես ժողովորդական խոսքն է ասում՝ «պետք է ոչ թե լավ անել, այլ ճիշտ անել»: Ցանակացած այլ ակումբ ցանկացած ավագի կամ առաջատարի նման պահվածքի համար տուգանում է, պատժում է՝ հասկացնելու համար, որ ֆուտբոլիստը ակումբից կարևոր չէ: Ջեկոյի օրինակն ամենավառն է:

Նաև Մեսիի պատճառով ակումբի մե՜ծ դրամանապանակը գրեթե դատարկ է: Այո, 120+ մլն քամուն տալը (իսկ Գրիզմանի ու Կոուտինյոյի տրանսֆերները նման են քամուն տալու) ևս էական էր, բայց 560+ միլիոն մի ֆուտբոլիստի (նույնիսկ աշխարհի և պատմության լավագույնի) համար չափից շատ է: Հիմնականում հենց այդ ագահության պատճառով «Բարսան» նույնիսկ մեծ ցանկության դեպքում նրա հետ նոր պայմանագիր չի կարող կնքել: Իսկ Լեոն չի համաձայնի աշխատավարձի կտրուկ նվազեցման: Հարց է առաջանում՝ ով կցանականա նման Մեսիին գնել կամ երկարաձգել պայմանագիրը։

Միացի՛ր հայկական ամենասպորտային Instagram-ին: