Արամ Հակոբյանն ու Սիրանուշ Ղուկասյանը բարելավել են ցուցանիշները ՖԻԴԵ-ի վարկանիշային աղյուսակում

ՖԻԴԵ-ն հրապարակել է հոկտեմբերի վարկանիշային աղյուսակը, որի մեջ հաշվի առնված չեն օլիմպիադայում անցկացված մրցախաղերի արդյունքները: Լևոն Արոնյանը պահպանել է վարկանիշը (2780) և մեկ տեղով բարձրանալով, եզրափակում է լավագույն հնգյակը:

Վարկանիշային ցուցակը նախկինի պես գլխավորում է աշխարհի գործող չեմպիոն Մագնուս Կառլսենը (2839), ով ևս պահպանել է վարկանիշը: Լավագույն հնգյակում են նաև Ֆաբիանո Կարուանան (2827), Շահրիյար Մամեդյարովը (2820) և Դին Լիժենը (2804):

ՖԻԴԵ-ի հոկտեմբերի վարկանիշային աղյուսակի 100 ուժեղագույնների շարքում տեղ են զբաղեցրել Հայաստանի ևս երկու ներկայացուցիչներ՝  Գաբրիել Սարգսյանը և Հրանտ Մելքումյանը:

Գաբրիել Սարգսյանը ևս պահպանել է վարկանիշը (2691), սակայն 2 հորիզոնականով նահանջել է ու զբաղեցնում է 52-րդ տեղը:  Իսկ ահա Հրանտ Մելքումյանը պահպանելով վարկանիշը (2660), մեկ տեղով բարձրացել է՝ զբաղեցնելով 85-րդ հորիզոնականը:

Կանանց վարկանիշային աղյուսակում Էլինա Դանիելյանը պահպանել է թե վարկանիշը (2409), թե զբաղեցրած 54-րդ հորիզոնականը: Լիլիթ Մկրտչյանը թեև պահպանել է վարկանիշը (2384), սակայն 2 հորիզոնականով առաջադիմել է ու զբաղեցնում է 74-րդ հորիզոնականը:

Մինչև 20 տարեկան 100 ուժեղագույն շախմատիստների վարկանիշային աղյուսակում ամերիկահայ Սամուել Սևյանը 2634 վարկանիշով 7-րդ տեղում է, իսկ ռուսաստանցի Դավիթ Պառավյանը 2629 վարկանիշով 8-րդն է:

Հայաստանը ներկայացնող 3 շախմատիստներից լավագույն արդյունքն ունեցող  հանրապետության մեծահասակների չեմպիոն Հայկ Մարտիրոսյանը 4-ով նվազեցրել է վարկանիշը (2593) և 14-րդ տեղից նահանջել է 17-րդ հորիզոնական:

Մինչև 20 տարեկանների աշխարհի փոխչեմպիոն, արագ շախմատի Հայաստանի չեմպիոն Մանուել Պետրոսյանը 7-ով նվազեցրել է վարկանիշը (2574) ու 3 հորիզոնականով նահանջելով, զբաղեցնում է 22-րդ տեղը: Իսկ ահա Արամ Հակոբյանը 11-ով ավելացնելով վարկանիշը (2565) 34-րդ տեղից բարձրացել է 27-րդ հորիզոնական:

Մինչև 20 տարեկան աղջիկների վարկանիշային աղյուսակում Հայաստանը ներկայացնում են երկու շախմատիստուհիներ: Աննա Սարգսյանը պահպանել է թե վարկանիշը (2331), թե զբաղեցրած 15-րդ հորիզոնականը:

Իսկ Սիրանուշ Ղուկասյանը 15-ով ավելացրել է վարկանիշը (2220) և 76-րդ տեղից բարձրացել է 61-րդ հորիզոնական:

Միացի՛ր հայկական ամենասպորտային Instagram-ին: