Աշխարհի առաջնություն. Վահանյանը մրցանակակիր դառնալու լավ հնարավորություն ունի

Բուխարեստում ընթացող վետերանների շախմատի աշխարհի առաջնության 9-րդ տուրում Ռաֆայել Վահանյանը կրկին վստահ խաղաց և հերթական հաղթանակը տոնեց՝ առավելության հասնելով Եվգենի Մոչալովի նկատմամբ:

65-ից բարձր տարիքային խմբում հանդես եկող Ռաֆայել Վահանյանը 7 միավորով 4–րդ հորիզոնականում է: Առաջնության ավարտից երկու տուր առաջ Վահանյանը լավ հնարավորություններ է պահպանում պայքարելու մրցանակային տեղերի համար: Հայ գրոսմայստերն ընդամենը մեկ միավորով է զիջում աղյուսակը գլխավորող Կառլոս Գարսիա Պալերմոյին:

50-ից բարձր տարիքային խմբում հանդես եկող մեր 3 շախմատիստներից տուրը հաղթական էր միայն Կարեն Մովսիսյանի համար, որի մրցակիցը Ֆրանսուա Վարելյեն էր: Մովսիսյանը վաստակած 6,5 միավորով 10-րդ տեղում է:

Արտաշես Մինասյանը հաշտություն կնքեց Դարսի Լիմայի հետ: Նա ևս 6,5 միավոր ունի և ընթանում է 11-րդ հորիզոնականում: Իսկ ահա Վլադիմիր Պողոսյանը պարտվեց Միխայել Էռնստին: Պողոսյանի օգտին 4 միավոր է գրանցված: 8 միավորով առաջատարն ուկրաինացի Վադիմ Շիշկինն է:

Միացի՛ր հայկական ամենասպորտային Instagram-ին: