Աշխարհի պատանեկան առաջնություն. Աստղիկ Հակոբյանը կես միավոր է զիջում առաջատարներին

Հնդկաստանի Մումբայ քաղաքում ընթացող մինչև 14, 16 և 18 տարեկանների շախմատի աշխարհի պատանեկան առաջնության 7-րդ տուրից հետո հայ շախմատիստներից լավագույն արդյունքն ունի Աստղիկ Հակոբյանը:

Մինչև 14 տարեկան աղջիկների մրցաշարում հանդես եկող Աստղիկը 3-րդ անընդմեջ հաղթանակը տոնեց՝ առավելության հասնելով ռումինացի Էմմա Օբադայի նկատմամբ: Աստղիկ Հակոբյանը վաստակել է 5,5 միավոր և ընդամենը կես միավորով է հետ մնում 3 առաջատարներից:

Մինչև 18 տարեկան պատանիների մրցաշարում Շանթ Սարգսյանն ու Արթուր Դավթյանը հաշտություն կնքեցին մրցակիցների հետ: Հայ շախմատիստները 5 միավոր են վաստակել և մեկ միավորով են հետ մնում աղյուսակը գլխավորող Արյան Ղոլամիից:

Հաջող է խաղում նաև Մամիկոն Ղարիբյանը, որը հաղթելով Խոսե Կարդոսոյին, վաստակեց 5 միավոր: Նա էլ մեկ միավորով է հետ մնում առաջատարից:

Տուրը հաղթական էր նաև մեր մյուս շախմատիստների՝ Աննա Խաչատրյանի, Արսեն Դավթյանի, Սրբուհի Սարգսյանի և Ալեքս Սահակյանի համար: Այս քառյակից լավագույն արդյունքն ունի Աննա Խաչատրյանը, որը վաստակել է 4,5 միավոր:

Միացի՛ր հայկական ամենասպորտային Instagram-ին: