Մեկնարկել է Globbing Charity Program-ը, որով երեխաները կարող են կրթություն ստանալ ՏՏ ոլորտում

Հունիսի 1-ին մեկնարկել է Globbing Charity Program-ը, որի ընթացքում 13 անապահով ընտանիքների երեխաներ հնարավորություն կունենան ստանալ կրթություն ՏՏ ոլորտում։

Երեխաները դասընթացներին կմասնակցեն Ձեռնարկությունների ինկուբատոր հիմնադրամի Հայ-հնդկական ՏՀՏ գերազանցության կենտրոնում։ ՁԻՀ-ի տարածած հաղորդագրությունում ասվում է, որ ծրագրի շրջանակում Globbing-ը ոչ միայն կֆինանսավորի մասնակիցների կրթությունն, այլև կիրականացնի մի շարք միջոցառումներ՝ ուղղված նրանց անձնային և մասնագիտական որակների աճին։ Ընկերությունը նաև լավագույն շրջանավարտներին կփորձի ապահովել աշխատանքով։

Ծրագրի նպատակն անապահով ընտանիքների երեխաներին մրցունակ մասնագետներ դարձնելն է, ինչը ոչ միայն կօգնի ծրագրի մասնակիցներին, այլև նրանց ընտանիքներին։