PicsArt-ը հայտարարում է APM մասնագիտացման ծրագրի ընդունելություն

PicsArt-ը մեկնարկում է Հայաստանում նախադեպը չունեցող APM (Associate Product Manager) մասնագիտացման վեցամսյա հատուկ ծրագիր: Ծրագրի նպատակն է ուսուցման հնարավորություն տալ նրանց, ովքեր ցանկանում են փոխել մասնագիտացումը, սովորել նոր հմտություններ և աշխատել PicsArt` աշխարհում թիվ մեկ ֆոտո և վիդեո խմբագրման հավելվածի ընկերությունում:

PicsArt-ի պրոդուկտի գլխավոր ղեկավար Միքայել Վարդանյանը նշում է.

«Այս ծրագիրը բացառիկ հնարավորություն է պրոդուկտի ղեկավարում մասնագիտացման համար։ Ծրագիրը չափազանց հագեցած է և բազմակողմանի։ Այն տևելու է վեց ամիս։ Այդ ընթացքում ծրագրի մասնակիցներն աշխատելու են հավելվածի վրա, սովորելով անմիջապես այն մարդկանցից, որոնք կանգնած են PicsArt-ի ստեղծման ակունքներում, և ում շնորհիվ հավելվածն ամբողջ աշխարհում ամսական 130 միլիոն ակտիվ օգտատեր ունի: Ծրագիրն ամբողջ դրույք աշխատանքի պես է: Մասնակիցները ընդգրկվելու են տարբեր թիմերում, մասնակցելու են դասախոսությունների, կապեր են հաստատելու և նոր հմտություններ են ձեռք բերելու։ Իսկ ծրագրի ավարտից հետո լավագույնները կընդունվեն նաև մեզ մոտ աշխատանքի»:

Ըստ Միքայել Վարդանյանի՝ APM ծրագիրը տարածված և հաջողված փորձ է միջազգային խոշոր ընկերություններում: «Պատահական չէ, որ այդ փորձը ներդնում ենք նաև PicsArt-ի հայաստանյան գրասենյակում: Պրոդուկտների ղեկավարումը պահանջում է բազմակողմանի, պրակտիկ գիտելիքների մեծ պաշար, ընկերության պրոֆիլի ամբողջական տիրապետում և, իհարկե, փորձառություն. այս ամենը հնարավոր է APM վեցամսյա ծավալուն այս նախագծի շնորհիվ»,- հավելեց նա։

Ծրագրի մեկնարկային երկու շաբաթվա ընթացքում կներկայացվի PicsArt-ի հավելվածը, ընկերության կորպորատիվ մշակույթը և արժեքները։ Մասնակիցները կծանոթանան ընկերության բոլոր թիմերի աշխատանքին և կուսումնասիրեն պրոդուկտները: Տիրապետելով ընկերության գործունեությանը և դառնալով PicsArt ընտանիքի անդամ, նրանք կընդգրկվեն չորս տարբեր թիմերում՝ զարգացնելով պրոդուկտների մշակման նորարարական մոտեցումներ և այլ հմտություններ: Մասնակիցները կունենան նաև անհատական մենթորներ, որոնք մշտապես կաջակցեն նրանց խորհրդատվությանբ և փորձի փոխանցմամբ:

Նրանք, ովքեր ցանկանում են հմտանալ այս ոլորտում և դառնալ աշխարհում թիվ մեկ ֆոտո և վիդեո խմբագրման PicsArt հավելվածի և ընտանիքի անդամ, կարող են ծանոթանալ APM ծրագրի մանրամասներին հետևյալ հղմամբ: Դիմումների ընդունման վերջնաժակետը մայիսի 5-ն է:

Ընթերցեք նաև՝ 

PicsArt-ը գրավում է չինական շուկան

PicsArt-ը Մոսկվայում Արհեստական Ինտելեկտի մշակման լաբորատորիա կբացի

PicsArt Gold. նոր բաժանորդագրության փաթեթ PicsArt-ից

PicsArt-ը ԵՊՀ-ի հետ իրականացրել է AI մասնագետների պատրաստման ծրագիր

PicsArt-ի մեծ ընտանիքն արդեն 100․000․000 անդամ ունի