21-րդ դարի լավագույն եվրոպական ֆիլմերը [մաս 1] - VNews
    • Մշակույթ Vnews

      Մշակութային նորություններ Հայաստանից և աշխարհից

21-րդ դարի լավագույն եվրոպական ֆիլմերը [մաս 1]

Այս ցանկում ընդգրկվել են 21-րդ դարի լավագույն եվրոպական ֆիլմերից մի քանիսը: Տարբեր տարիներ դրանք ցուցադրվել են եվրոպական հեղինակավոր կինոփառատոնների շրջանակներում:
Հարմար տեղավորվեք և խորասուզվեք եվրոպացի վարպետների խենթ ու գունեղ աշխարհ:

Վատ դաստիարակություն/Дурное воспитание/La mala educación, 2004

ռեժ.՝Պեդրո Ալմադովար
դերերում՝Գայել Գարսիա Բերնալ, Ֆելե Մարտինես ևն 

Շատ վառ կինոնկար, որի կողքով անտարբեր չեն անցնի ոչ միայն վարպետ Ալմադովարի երկրպագուներն, այլև էսթետիկ կինոյի բոլոր սիրահարները: Ֆիլմի սցենարի վրա Ալմադովարն աշխատել է ավելի քան 10 տարի: Կինոնկարի իրադարձությունները ծավալվում են 27-ամյա արվեստագետ Էնրիկեի շուրջ: Հերոսի կյանքում ճգնաժամերն անպակաս են, ինչպես յուրաքանչյուր արվեստագետ, նա էլ միշտ փնտրտուքի մեջ է: Օրերից մի օր նրա կյանք է անսպասելիորեն ներխուժում Իգնասիո անունով մի տղա, որը ներկայանում է որպես Էնրիկեի մանկության ընկեր և նրանից օգնություն է խնդրում: Իգնասիոյին հաջողվում է համոզել Էնրիկեին էկրանավորել նրանց մանկական հիշողությունները, որոնք Իգնասիոն հմտորեն թղթին էր հանձնել: Գործընթացի ժամանակ Էնրիկեն նոր բացահայտումներ է անում, որոնք զարմացնում և անգամ ցնցում են նրան:

Կաննի 57-րդ կինոփառատոնը մեկնարկել է այս ֆիլմով. սա պատմության մեջ առաջին իսպանալեզու ֆիլմն է, որը նման պատվի է արժանացել:

Ֆիլմը կարող եք դիտել այստեղ:

Ուրիշների կյանքը/Жизнь других/Das Leben der Anderen, 2006

ռեժ.՝Ֆլորիան Հենկել ֆոն Դոներսմարկ 
դերերում՝ Ուլրիխ Մյուե, Սեբաստյան Կոքս, Մարտինա Գեդեկ ևն

2008 թ. «Լավագույն օտարալեզու ֆիլմ» անվանակարգում Օսկարի արժանացած այս ֆիլմն անդրադառնում է 1980-ականների Արևելյան Բեռլինում տիրող իրադարձություններին: Պետական վերահսկողությունը զրկում է մարդկանց անձնական կյանքից. պետությունը միջամտում է մարդկանց գործերին, և իր հետախույզների միջոցով ներխուժում է ուրիշների կյանք, տեղեկություն հավաքում և այդ նույն տեղեկությունը մարդկանց դեմ օգտագործում: Գրող Գեորգ Դրեյմանը հայտնի է և սիրված, բայց նրա մասին այդքան չէր խոսվի և նրան այդքան չէին քննարկի, եթե չլիներ հայտնի դերասանուհու հետ նրա սիրավեպը: Իրադարձությունների զարգացման արդյունքում Գերդ Ոայսլերին հանձնարարում են հետևել գրողին և բացահայտել նրա գաղտնիքները: Ինչեր ասես, որ չես անի հանուն կարիերայի. Գերգը գործի է անցնում, բայց շատ շուտով հասկանում է, որ ուրիշների կյանքը քանդելով, չես կառուցի սեփականդ:

Ֆիլմը կարող եք դիտել այստեղ:

Սուբմարինո/Субмарино/Submarino, 2010

ռեժ.՝Թոմաս Վինթերբերգ
դերերում՝ Գուստավ Ֆիշեր Քերուլֆ, Սեբաստիան Բուլ Սարնինգ ևն

Ֆիլմ հուսալքության, ցավի և միայնության մասին: Սյուժեն զարգանում է երկու եղբայրների շուրջ, որոնք շատ տխուր մանկություն են ունեցել և այսօր էլ անցյալի ուրվականները նրանց հանգիստ չեն տալիս: Նրանցից մեկը 30-ամյա Նիկն է, որը նոր է բանտից դուրս եկել և չի շտապում կյանքը նոր ու մաքուր էջից սկսել, հակառակը՝ Նիկն իր ցավն ալկոհոլի մեջ է խեղդում: Մյուս եղբայրը թմրամոլ է, մեծացնում է իր 6-ամյա որդուն՝ Մարտինին, և չի հավակնում «Տարվա լավագույն հայր» տիտղոսին:
Եղբայրների փոխհարաբերությունները լարված են, իսկ անցյալը, անցյալը շարունակում է հետապնդել նրանց:

Ֆիլմի հիմքում Յոնաս Բենգթսոնի 2007 թ. համանուն գիրքն է:

Ֆիլմը կարող եք դիտել այստեղ:

Հավր/Гавр/Le Havre, 2011

ռեժ.՝ Ակի Կաուրիսմյակի
դերերում՝Անդրե Վիլմ, Կատի Օուտինեն, Ժան-Պիեր Դարուսեն ևն

Բարի, գեղեցիկ և ջերմ ֆիլմ սևամորթ փախստական տղայի և ֆրանսիացի ծերուկ Մարսելի փոխհարաբերությունների մասին: Տղայի մայրը Լոնդոնում է, և նա պետք է նավով ուղևորվի Մեծ Բրիտանիա: Պատանին, ցավոք, բռնվում է և նրան պատրաստվում են վտարել, սակայն նա այդքան հեշտ չի հանձնվի: Երեխան թաքնվում է ծերուկ Մարսելի տանը. Մարսելն ամեն գնով օգնում է նրան:

2011 թ. Կաննի կինոփառատոնում ֆիլմն արժանանում է ՖԻՊՐԵՍԻ-ի մրցանակի:

Ֆիլմը կարող եք դիտել այստեղ:

տես նաև՝ 5 ֆիլմ Ակի Կաուրիսմյակիից

 

Թուրինյան ձին/Туринская лошадь/A torinói ló, 2011

ռեժ.՝Բելա Տարր, Ագնես Խրանիցկի
օպերատոր՝ Ֆրեդ Քելեմեն

դերերում՝Յանոշ Դերժի, Էրիկա Բոկ ևն

Ամուսիններ Բելա Տարրի և Ագնես Խրանիցկու այս սև ու սպիտակ ժապավենի իրադարձությունները տեղի են ունենում 1889 թ., Թուրինում: Կառապանը հարվածում է ձիուն, որը չէր ցանկանում տեղից շարժվել, և հենց այդ պահին հայտնվում է հանճարեղ փիլիսոփա Ֆրիդրիխ Նիցշեն և փաթաթվելով ձիուն՝ հոնգուր-հոնգուր լաց է լինում: Մարդիկ ապշում են՝ տեսնելով փիլիսոփային այդ վիճակում. Նիցշեն խելագարվել էր: Նրան տեղափոխում են հոգեբուժարան, որտեղ նա անց է կացնում իր կյանքի մնացած տարիները…

2011 թ. ֆիլմը Բեռլինի փառատոնում արժանացել է Գրան պրի և ՖԻՊՐԵՍԻ մրցանակների:

Ֆիլմը կարող եք դիտել այստեղ:

Շարունակելի…

տես նաև՝ Զրույց օպերատոր և ռեժիսոր Ֆրեդ Քելեմենի հետ


#BlackLivesMatter. 5 ֆիլմ ռասիզմի մասին

Հպարտանալու առիթ. հայ ռեժիսորի ֆիլմն՝ Կաննի կինոփառատոնում

Ալմոդովարից բացի. իսպանական կինոյի ևս 5 կարևորագույն ֆիլմ

Ինչ դիտել, երբ սիրտդ ուզում է ճամփորդել. «Ճամփեզրերին»

Լավ ֆիլմեր, որոնց մասին ոչ ոք չի խոսում. բրիտանական «Վերա Դրեյքը»

Կինոքննադատները խորհուրդ են տալիս. [Ամստերդամից Կեյս Դրիսենը]

Ալմոդովարից բացի. իսպանական կինոյի կարևորագույն 5 ֆիլմ

Լավ ֆիլմեր, որոնց մասին ոչ ոք չի խոսում. ֆրանսիական «Խնամակալությունը»

Կինոքննադատները խորհուրդ են տալիս. [Ցյուրիխից բրազիլացի Ումբերտո Մուրեյրան]

Հին դրամապանակում մաշված թղթի կտորի վրա 20 տարի ապրած ֆիլմացանկ

Իլյա Խրժանովսկու «Դաու» մեգամասշտաբային նախագիծը ապրիլին հասանելի կլինի համացանցում

Ինչ դիտել տանը. Հայաո Միյաձակիի մասին պատմող նոր վավերագրական ֆիլմը

Կարանտինային նորաձևություն. ռետրո պենյուարներից մինչև պինգվիններով պիժամա

Քվենտին Տարանտինոն սկսել է ակտիվ զբաղվել ֆիլմերի գրախոսականներ գրելով

Լավ ֆիլմեր, որոնց մասին ոչ ոք չի խոսում. «Վերջին դիմանկար»

Ռեժիսոր Թիմուր Բեքմամբեթովը կստեղծի ֆիլմ՝ կարանտինի մեջ գտնվող մարդկանց մասին