Բեռլինի կինոփառատոն. ինչպիսին է տարեսկզբի կարևորագույն եվրոպական կինոտոնը - VNews

Բեռլինի կինոփառատոն. ինչպիսին է տարեսկզբի կարևորագույն եվրոպական կինոտոնը

154114073 153924099897978 186874699709915467 n - Բեռլինի կինոփառատոն. ինչպիսին է տարեսկզբի կարևորագույն եվրոպական կինոտոնը

Մարտի 1-ից 5-ը կինոփառատոնի պատմության մեջ առաջին անգամ օնլայն ձևաչափով մեկնարկելու է Բեռլինի միջազգային կինոփառատոնը՝ Բեռլինալեն, որն անցած տարի տոնեց իր 70-ամյակը։ Այս տարվա յուրահատուկ՝ թվով 71-րդ կինոփառատոնը սովորական 10 օրվա ծրագիրը կրճատել է՝ սխմել-դարձնելով 5 օրվա, որտեղ ներկայացվելու են միայն գլխավոր՝ մրցութային ծրագրում 15 ֆիլմ։ Կինոքննադատ Դիանա Մարտիրոսյանը պատմում է գերմանական կինոֆեստի յուրահատկությունների մասին, ինչով է այն տարբերվում եղբայրական Կաննից կամ Վենետիկից՝ զբաղեցնելով համաշխարհային կինոշուկայի կարևորագույն երեք տիտան կինոփառատոներից մեկի աթոռը։

 

Բեռլինի կինոփառատոնը՝ Բեռլինալեն միշտ տարբերվել է և մինչ օրս տարբերվում է մյուս հսկա փառատոներից, որոնք անց են կացվում ֆրանսիական Կաննում, իտալական Վենետիկում, իսպանական Սան Սեբաստիանում կամ չեխական Կառլովի Վարիում։ Եվ  տարբերությունը միայն եղանակի մեջ չէ (Բեռլինն ի տարբերություն վերը նշվածների վերջին շրջանում սովորաբար անց էր կացվում փետրվարին). գերմանական մայրաքաղաքը պատմական պանթեոն է, արևելքի և արևմուտքի միաձուլում, քաղաքական օրակարգ թելադրող մեգապոլիս։ 71 տարի առաջ, լինելով մասնատված և կիսաշրջափակված, սառը պատերազմի, կոմունիստների և դեմոկրատների արանքում այն ստեղծվեց ոչ միայն միավորելով մինչ այդ երբեք չխաչվող զուգահեռները, այլ ավելի մոտենալով հոլիվուդյան կինո-կոնվեյերին, իր սառնաշունչ երկնքի տակ հավաքելով մեծանուն դերասաններին և ռեժիսորներին, ժամանակ առ ժամանակ համատեղելով համեստ արևելյանա-եվրոպականը և ճչացող ամերիկյանն ու արևմտյանը։ 20-րդ դարի կեսերին և մինչ Բեռլինյան պատի անկումը կինոփառատոնն անվանում էին ոսկե կամուրջ՝ Արևմտյան և Արևելյան Եվրոպաների միջև։ Սոցիալիստական ճամբար երկրների կինեմատոգրաֆիստները հավասար մրցում էին ֆրանսիացիների կամ իտալացիների հետ, որոնք արդեն իսկ ունեին սեփական ազգային փառատոները (Կանն ու Վենետիկը), և, ինչպես հայտնի է, վայելում էին համաշխարհային ճանաչում՝ անգամ Խորհրդային երկրներում։ Ռոման Պոլանսկին խնջույքի ժամանակ կարող էր պատահաբար բախվել Ժան Լյուկ Գոդարի հետ, իսկ Սոֆի Լորենն ու Կլաուդիա Կարդինալեն բացահայտ լուսանկարվում էին սոցռեալիստիկ մոնումենտների ֆոնին։

152B63D5 0781 4381 A3D4 0ED81B3774BF 960x670 - Բեռլինի կինոփառատոն. ինչպիսին է տարեսկզբի կարևորագույն եվրոպական կինոտոնը

 

Բացի սոցիալ-մշակութային և քաղաքական կոմպոնենտներից՝ Բեռլինալեն նաև դարձավ նոր տարածքների բացահայտման օրրան։ Լատինական Ամերիկայի՝ օրինակ՝ Արգենտինայի կինեմատոգրաֆը լայն ճանաչում ստացավ հենց այդտեղ Բեռլինում։ Փառատոնի ղեկավարությունը նաև առաջիններից էր, որը մեծանուն ամերիկյան և եվրոպական հեղինակների կողքին ներկայացրեց ասիացի ռեժիսորներին՝ ապահովելով աշխարհագրական բազմազանություն։ Բացի այդ հենց Բեռլինալեն դարձրեց սկանդինվայան երկրները այդքան գրավիչ կինոքննադատների և սինեֆիլների համար, լայն լսարանի համար հասանելի դարձնելով, օրինակ՝ ֆինն Ակի Կաուրիսմյակիին, շատ ավելի վաղ, քան ռեժիսորի վրա ուշադրություն դարձրեց Կաննի միջազգային կինոփառատոնը։

Բեռլինալեն չի վախեցել և մինչ օրս դեռ չի ցուցաբերել վախի դրսևորում որևէ սոցիալ-քաղաքական, գենդերային կամ էքսպերիմենտալ երևույթի հանդեպ։ Այստեղ կան «Panorama» և «Forum» զուգահեռ ծրագրերը, որոնք բազմաթիվ կինոգետների և կինոքննադատների կարծիքով ավելի յուրահատուկ են, հատկանշական և նորարարական, քան հիմնական մրցութային և արտամրցութային ծրագրերը։

31D5DC25 CF72 4EF7 A662 0DFDF22367B2 960x640 - Բեռլինի կինոփառատոն. ինչպիսին է տարեսկզբի կարևորագույն եվրոպական կինոտոնը

Բացի այդ Բեռլինալեն լոյալ է և զուրկ ձևական դիստանցիավորումից. մամուլի ասուլիսից հետո կինոքննադատները քիչ թե շատ կարող են շփվել հայտնի կինոգործիչների հետ, ինչը գրեթե անհնար է Կաննի կամ Վենետիկի պարագայում, որտեղ «talent»-ներին հափշտակում են հատուկ կցված մարդիկ։ Բացի այդ, եթե Կաննը «արգելափակում է» Լարս ֆոն Թրիերին իր քաղաքական հայացքների համար՝ Բեռլինը սիրով տրամադրում է իր հարթակը «Նիմֆոմանիակ»-ի համաշխարհային պրեմիերայի համար, որտեղ Շայա Լաբաֆը ակցիա է իրականացնում ուղիղ կարմիր գորգի վրա։

Բացի վառ ընդգծված սոցիալ-քաղաքական երանգներից Բեռլինալեն թույլ է տալիս ճանաչել քաղաքը՝ չկենտրոնացնելով մեծ պրեմիերաները միայն մի լոկացիայում՝ հիմնական Potsdamer Platz-ում։ Թիլդա Սուինթոնին, Ժուլյեթ Բինոշին կամ Թիմոթի Սփոլին հնարավոր է տեսնել առանց մեծաքանակ թիմի՝ մեքենայից դուրս, պարզապես զբոսնելիս, ինչն անհնար է միկրոսկոպիկ Կաննում կամ Վենետիկի Լիդո կղզում։ Բեռլինալեն պարզապես կինոփառատոն չէ, որի ընթացքում կինոքննադատներն ու կինոգործիչները ստանում են տարվա հեղինակային կինոյի առաջին ամենամեծ չափաբաժինը։ Ոսկե և արծաթե արջերի ֆեստը տոն է բաց, թեև սառնաշունչ երկնքի տակ, որի բոլոր կինոթատրոններն այցելելու ժամանակ ծանոթանում ես ինքնատիպ և նմանը չունեցող պատմական քաղաքի հակասական անցյալի հետ, որը կարված է սոցիալիստական և գոթիկական հյուսերի արանքում։ Շատ քիչ միջոցառումներ արժեն, որպեսզի խնամված և էլեգանտ կանայք սառչեն դեկոլտեների և բաց կոշիկների պատճառով. Բեռլինալեի կարմիր գորգը, անկասկած, դրանցից ամենաարդարացվածներից է։

 

 


Ինչ դիտել տանը. կարևոր ֆիլմեր կանանց հոգեբանական վիճակի մասին

[Berlinale-2021]. տարեսկզբի ամենամեծ կինոփառատոնի հուշագրավ ֆիլմերը

[Berlinale-2021]. «Անհաջող կենակցում կամ մոլեգին պոռնո»-ն արժանացել է Ոսկե արջի

[Berlinale-2021]. «Մավրիտանացին» և փառատոնի մյուս՝ պակաս աստղային ֆիլմերը

Բեռլինալեի հաղթողներն են…

[Berlinale-2021]. իրանա-ֆրանսիական դրաման և մրցութային կարճամետրաժները

[Berlinale-2021].վավերագրական Թինա Թյորների մասին, ֆրանսիական սոցդրամա և ռումինական սատիրա

[Berlinale-2021].վավերագրական Արցախի մասին, կորեական մինիմալիզմ և գերմանական մեյնսթրիմ

2019-2020-ի լավագույն ֆիլմերից 5-ը. Սոֆիա Կոպոլայի նոր dramedy-ից մինչև Կաննի ռումինական էքշն-թրիլեր

«Հարբեցություն». 2020-ի գլխավոր ալկո-դրաման՝ Մադս Միկելսենի գլխավորությամբ

Կինոքննադատները խորհուրդ են տալիս. [Ամստերդամից Կեյս Դրիսենը]

Լավ ֆիլմեր, որոնց մասին ոչ ոք չի խոսում. բրիտանական «Խնջույքը»

Instagram-յան կինոհավաքածուներ, որոնք Ձեզ են սպասում

Լավ ֆիլմեր, որոնց մասին ոչ ոք չի խոսում. «Վերջին դիմանկար»

Ինչ դիտել տանը. ինքնամեկուսացման ֆիլմացանկ 2

Ինչ դիտել տանը. ինքնամեկուսացման ֆիլմացանկ