Գարնանա-ամառային կինոզբոսանք կարանտինի օրերին - VNews

Գարնանա-ամառային կինոզբոսանք կարանտինի օրերին

Այս օրերին մարդկության եթե ոչ մեծամասնությունը, ապա զգալի մասը տանն է՝ կարանտինային ինքնամեկուսացման մեջ։ Շատերը սպառում են սթրիմինգ հարթակների նորաթուխ սերիալներն ու ֆիլմերը, մյուսները վերանայում են վարակների թեմայով ամերիկյան բլոքբասթերներն ու մարտաֆիլմերը։

Հոգու վերելքի ու դրական լիցքերի ապահովման համար առաջարկում ենք մտածել միայն բարենպաստ երևույթների մասին և դիտել տաք գարնանա-ամառային ֆիլմեր՝ նախապես պատրաստելով մեզ տարվա ամենագայթակղիչ ժամանակաշրջանին, որը, հուսանք, շուտով բոլորս միասին կվայելենք անվնաս և ապահով պայմաններում։

 

«Վիքի Քրիսթինա Բարսելոնա» / «Vicky Cristina Barcelona», 2008

Վուդի Ալենի ամենաջերմ, էսթետիկ ու գայթակղիչ ֆիլմերից մեկը, որը և՛ հոգու հանգստության փնտրտուքի, և՛ անձնական երջանկության որոնման, և՛ առհասարակ բալանսավորված կյանքի մասին է։ Մի փոքր խտացրած կարծրատիպային անտուրաժով պատկերված իսպանացի նկարիչների բոհեմը՝ ի դեմս Խավիեր Բարդեմի և Պենելոպե Քրուզի հերոսների, 90 րոպեով տեղափոխում է մեզ տաք ու դյութիչ Իսպանիա՝ համեղ, տեղական գինու, արևի և սպոնտան հաճույքների գիրկը։

«Քլերի ծունկը» / «Le Genou De Claire», 1970

Դասական կինոյի վարպետ Էրիկ Ռոմերի ֆիլմը ինտելեկտուալների համար է՝ ինտելեկտուալների մասին։ Տաք ֆրանսիական Ալպերում ծավալվող մելոդրաման ամառային արձակուրդի, անդադար ինքնավերլուծության և արևայրուքի ու երիտասարդ մաշկի շնորհիվ գլուխը կորցրած հասուն տղամարդու մասին է, ում խելքահան է անում իրենից շատ ավելի երիտասարդ աղջկա ծունկը։ Կիրքի և ցանկության խորհրդանիշ դառնալով՝ այն վերածվում է վիրտուալ սիրավեպի դրդապատճառի և փոխում արձակուրդի տրամադրված տղամարդու ուղեղի աշխատանքը։

«Լիալուսնի թագավորություն» / «Moonrise Kingdom», 2012

Ուես Անդերսոնի ամառային հեքիաթը՝ ըմբոստ երեխաների, առաջին սիրո և գիտակցված անհնազանդության մասին է։ Մեկը փախչում է ամառային ճամբարից, մյուսը՝ ծնողների հսկողությունից։ Ինչպես միշտ Անդերսոնի ֆիլմերի պարագայում կատարողականը հաղթում է բովանդակությանը, իսկ գերտաղանադավոր հայտնի ու սիրված դերասանների անսամբլը ստիպում է անդադար ժպտալ՝ շնչելով անտառների ու ծովափի թարմությունը։

«Սաղմոնաձկնորսությունը Յեմենում» /«Salmon Fishing in the Yemen», 2011

Շվեդ ռեժիսոր Լասե Հալսթրյոմի բրիտանական կատակերգությունը միջազգային հարաբերությունների ֆոնին ընթացող ձկնորսական գործունեության մասին է, որն անգլիական կենցաղից կտրում, տեղափոխում է Էվան ՄքԳրեգորին ու Էմիլի Բլանթի հերոսներին մեզ հետ միասին Յեմեն՝ լեռնային տեսարժան ձորեր ու լճակներ։ Հրաշք տեսարան, արկածային միջավայր ու բրիտանական հումոր՝ մերձարևելյան փաթեթավորմամբ։

«Բնական ընտրություն» / «Natural selection», 2011

Այս կատակերգական դրամայի մասին հայկական Facebook-ի լրահոսում դեռևս երբեք չեն խոսել և շատ իզուր։ Այն ինքնաճանաչելիության հիանալի բացատրագիր է։ Լինդան հավատացյալ թեխասցի է, ամուսնացած տնային տնտեսուհի, որը խիստ հանկարծակի իր մահամերձ վիճակում գտնվող ամուսնուց իմանում է, որ վերջինս չափահաս որդի ունի, որն ապրում է Ֆլորիդայում։ Ամուսնու վերջին ցանկությունը կատարելու համար՝ կինը ուղևորվում է ճամփորդության, որն ավելի օգտակար է դառնում ոչ թե ամուսնու և տղայի հարաբերությունների, այլ հենց Լինդայի ներաշխարհի ու սեփական Եսի համար։


Ինչպե՞ս է Բեթմենի թշնամին դառնում «հեղափոխական ինստրուկցիա» ու բազում սրտեր գրավում

Ինչ դիտել, երբ սիրտդ ուզում է ճամփորդել. «Ճամփեզրերին»

Ինչ դիտել տանը. Քեյթ Բլանշեթի սիրելի ֆիլմերից 5-ը

Լավ ֆիլմեր, որոնց մասին ոչ ոք չի խոսում. բրիտանական «Վերա Դրեյքը»

Պեդրո Ալմոդովարը կիսվում է ֆիլմերով, որոնք նայում է ինքնամեկուսացման մեջ

Ինչ դիտել մեկուսացման շրջանում, եթե սիրտդ ուզում է ճամփորդել. «Երկնքի քողի ներքո»

Ալմոդովարից բացի. իսպանական կինոյի կարևորագույն 5 ֆիլմ

Լավ ֆիլմեր, որոնց մասին ոչ ոք չի խոսում. ֆրանսիական «Խնամակալությունը»

Լավ ֆիլմեր, որոնց մասին ոչ ոք չի խոսում. բրիտանական «Խնջույքը»

Հին դրամապանակում մաշված թղթի կտորի վրա 20 տարի ապրած ֆիլմացանկ

Համացանցում հայտնվել է Թիմոթի Շալամեն «Դյունա» ֆիլմի առաջին պաշտոնական կադրում

Ինչ դիտել տանը. ֆրանսիական «Նոր ալիքի» դասական Անյես Վարդայի կարճամետրաժ ֆիլմը

Ինչ դիտել տանը. ամերիկյան կինեմատոգրաֆի 50 indie ֆիլմ

Ինչ դիտել տանն ինքնամեկուսացված. օնլայն կինոդասընթացների հավաքածու

Լավ ֆիլմեր, որոնց մասին ոչ ոք չի խոսում. «Լավ ժամանակ»

Ինչքան վիդեոկոնտենտ են սպառում ամերիկացիներն ու ռուսները կարանտինի օրերին