Կորեական 5 նոր սերիալ, որ կարող եք դիտել այս ամռանը

Կորական դրամաների աշխարհը շարունակում է համալրվել յուրահատուկ սցենար, տաղանդավոր դերասանական կազմ ու հիանալի նկարահանման որակ ունեցող սերիալներով, իսկ VNews-ն էլ շարունակում է անդրադառնալ ընթացիկ, գալիք ու ավարտված լավագույն դրամաներից մի քանիսին: Այս անգամ ներկայացնում ենք 5 հետաքրքիր, թեթև ու գունաշատ կորեական դրամա, որ կարող եք վայելել այս ամռանը: Իսկ դուք ի՞նչ եք պատրաստվում դիտել ամռան տոթ օրերին…

1. Հրեշտակի վերջին առաջադրանքը՝ սեր | Angel’s last mission:Love

Թողարկվել է՝ մայիսի 22-ից

Սերիաների քանակը՝ 32 = 1 ժամ տևողություն ունեցող 16 սերիայի

Դերերում՝ Քիմ Մյոն Սու, Շին Հե Սուն, Լի Դոն Գուն

Նկարագրությունը՝ Լի Յոն Սուն բալետի ցինիկ ու գոռոզ պարուհի է, որը բարի սիրտ ունի: Ծնողների մահից հետո նա ընտանիքի մեծ կարողության ժառանգորդն է դառնում, ինչպես նաև բալետի ամենալավ պարուհիներից մեկը: Սակայն պատահարի արդյունքում նա կորցնում է տեսողությունն ու չի կարողանում այլև պարել: Քիմ Դենը հրեշտակ է՝ բառի բուն իմաստով: Երբ երկրի վրա գտնվելու վերջին օրը Դենը փրկում է Լի Յոն Սունի կյանքը, որպես պատիժ ստիպված է լինում ևս 90 օր մնալ երկրի վրա: Դենը կարող է միայն երկինք վերադառնալ, եթե օգնի Լի Յոն Սուին սեր գտնել:

2. Իմ բացարձակ ընկերը | My Absolute Boyfriend

Թողարկվել է՝ մայիսի 15-ից

Սերիաների քանակը՝ 40 = 1 ժամ տևողություն ունեցող 20 սերիա

Դերերում՝ Յո Ջին Գու, Բանգ Մին Ահ, Հոնգ Չոնգ Հյոն

Նկարագրությունը՝ Դադան ֆիլմերի ու սերիալների նկահարանման հրապարակում աշխատող հատուկ էֆեկտների դիմահարդար է: Հայտնի աստղ դարձած ընկերոջից բաժանվելու արդյունքում նա չի վստահում ոչ ոքի և հենց այդ ժամանակ էլ հանդիպում է մարդու տեսք ունեցող մի ռոբոտի՝ Յոն Գուին: Վերջինս ծրագրավորված է որպես անթերի զուգընկեր ու «սիրահարված է» Դադային: Դադան սիրային եռանկյունում է հայտնվում Յոն Գուի և հայտնի դերասան դարձած իր ընկերոջ Մա Ուանգ Ջունի հետ:

3. Աբիս | Abyss

Թողարկվել է՝ մայիսի 6-ից

Սերիաների քանակը՝ 16

Դերերում՝ Փակ Բո Յոնգ, Ահն Հյո Սոփ

Նկարագրությունը՝ Չա Մինը կոսմետիկ խնամքի պարագաների մեծ ընկերության ղեկավարն է: Նա բարի է, խելացի, համեստ, սակայն տգեղ է: Երբ պատահաբար մահանում է, Չա Մինն արթնանում է միանգամայն այլ տեսքով՝ այպիսին, ինչպիսին իր հոգին է: Չա Մինը հիմա ապշեցուցիչ գեղեցիկ է, իսկ նրա վերակենդանացման պատճառը անհատակ գունդն է՝ Աբիսը: Դրա օգնությամբ Չա Մինը վերակենդանացնում է նաև իր դասընկերուհի Քո Սե Յոնին՝ միանգամայն գեղեցիկ, գոռոզ ու հիանալի դատախազ, որը մի մութ գործ հետաքննելու արդյունքում սպանվել է և որին Չա Մինը միշտ սիրել է: Քո Սե Յոնի տեսքը հիմա նույնպես համապատասխանում է իր ներքին գեղեցկությանը, ինչն այդքան էլ դուր չի գալիս հենց իրեն՝ դատախազին: Երկուսով նրանք պետք է պարզեն թե ով ու ինչու է սպանել Քո Սե Յոնին:

4. Արթդալի քրոնիկոնները | Arthdal Chronicles

Թողարկվել է՝ հունիսի 1-ից

Սերիաների քանակը՝ 18

Դերերում՝ Սոնգ Ջուն Կի, Քիմ Ջի Վոն, Չան Դոնգ Գուն

Նկարագրությունը՝ Սերիալի դեպքերը տեղի են ունենում Արթդալ հորինված աշխարհում՝ անհիշելի ժամանակներում: Ըն Սամը ծնվել է Արթդալին դժբախտություն բերելու ճակատագրով: Նրա մայրը միշտ ստիպված է եղել պայքարել բոլորի դեմ, որպեսզի պաշտպանի որդուն և այսպես միայնակ նա մեծացել է: Թա Գոնը Արթդալի պատերազմների հերոսն է: Նրա շնորհիվ Արթդալն ավելի է ծաղկել, իսկ ինքն էլ դարձել է տեղի ամենահզոր մարդը: Նա երազում է դառնալ Արթդալի առաջին արքան: Թան Յան ծնվել է Ըն Սամի նույն ճակատագրով, սակայն ի տարբերություն Ըն Սամի, նա Ուահան ցեղի հաջորդ առաջնորդն է: Այս երեքի ճակատագրերը կապված են:

5. ԴելԼունա հյուրանոց | Hotel DelLuna

Թողարկվել է՝ հուլիսին

Սերիաների քանակը՝ դեռ հայտնի չէ

Դերերում՝ Այյու, Յո Ջին Գու

Նկարագրությունը՝ Սեուլում գտնվող ԴելԼունա հոթելը նման չէ աշխարհի որևէ այլ հոթելի. այստեղ բոլոր հաճախորդներն ուրվականներ են: Հոթելի գործադիր տնօրենն է Չան Ման Ուոլը, որն անիծված լինելու պատճառով արդեն 1000 տարի է, ինչ այդտեղ է բնակվում: Նա կարող է միայն փախչել այդտեղից, եթե գտնի մեկին, որն իրենից ավելի սարսափելի մեղք է գործել: Սակայն նա չի հիշում, թե ինչ մեղք է գործել նման պատժի արժանանալու համար: Գու Չան Սոնը հաջողակ մենեջեր է մի հոթելների ընկերությունում և տառապում է օբսեսիվ-կոմպուլսիվ խանգարումով. վերջինս հոգեկան հիվանդություն է, որի պատճառով մարդն անընդհատ կարող է նույն գործողությունն անել, ինչ-որ բան շարունակ ստուգել ու կրկնվող մտքեր ունենալ՝ օբսեսիաներ: Նա սկսում է աշխատել ԴելԼունայում իր հոր՝ տարիներ առաջ կնքած պայմանագրի պատճառով: Այստեղ նա հանդիպում է մի հին ընկերոջ, որը մահացել էր, ինչպես նաև ծանոթանում Չան Ման Ուոլի հետ ու փորձում իր բարությամբ հաղթահարել աղջկա բացասական էությունը:

Հետևեք մեզ նաև Instagram-ում, Twitter-ում և YouTube-ում