Գարունը ժամանել է և պահն է հետևել գարնանային սննդակարգին: Vnews-ն առանձնացրել է  պարզ ու համեղ գարնանային աղցաններ, որոնք կզարդարեն ձեր ընթրիքի սեղանն ու քիչ ժամանակ կխլեն ձեզնից:

5 գարնանային աղցան

Կաղամբի սիրահարների համար

Մեզ անհրաժեշտ է՝

• Կես կաղամբ
• 1 սոխ
• 1 լոլիկ
• 1 վարունգ
• Մաղադանոս
• Կանաչ սոխ
• Ձեթ
• Աղ/սև պղպեղ

Ի՞նչ անել այս բաղադրիչների հետ

Կաղամբը բարակ-բարակ կտրատել: Սոխը կիսել, բարակ շերտատել: Վարունգն ու լոլիկը ոչ շատ մանր կտրատել: Կանաչ սոխն ու մաղադանոսը մանրացնել: Այս ամենը խառնել, կիտրոնի հյութով ցողել, ավելացնել բուսայուղ: Աղ, պղպեղ ցանել, խառնել և մատուցել մսի կամ ձկան հետ:

Թաբուլե

Մեզ անհրաժեշտ է՝

• Մաղադանոս
• Կանաչ սոխ
• Հազար
• 1 բաժակ բլղուր
• 200 գ. տոմատի մածուկ
• 1 կիտրոն
• 3-4 լոլիկ
• Աղ/կարմիր պղպեղ

Ի՞նչ անել այս բաղադրիչների հետ

Բլղուրը թրջել գոլ ջրով, աղ և պղպեղ ցանել: Լոլիկը կեղևազրկել, տրորել, լցնել բլղուրի վրա, ավելացնել կիտրոնի քամած հյութը: Լոլիկի փոխարեն կարող եք տոմատի մածուկը ջրով բացել: Մաղադանոսը, կանաչ սոխը լվանալ, շատ մանր կտրատել: Լցնել բլղուրի վրա, բուսական յուղ ավելացնել, խառնել ստացված զանգվածը: Մատուցել հազարի տերևների հետ:

Վարունգով և թթվասերով

Մեզ անհրաժեշտ է՝

• 3 վարունգ
• 1/4 բաժակ թթվասեր
• 1/2 ճաշի գդալ քացախ
• Կանաչի
• Աղ/սև պղպեղ

Ի՞նչ անել այս բաղադրիչների հետ

Լվանալ և ցանկության դեպքում կեղևազրկել վարունգները, այնուհետև կտրատել բարակ շերտերի: Վարունգների վրա մի փոքր աղ ցանել, ավելացնել սև պղպեղ և լցնել թթվասեր, խառնել աղի և քացախի հետ: Կանաչին ավելացնել՝ ըստ ցանկության:

Սնկով աղցան

Մեզ անհրաժեշտ է՝

• 350 գրամ շամպինիոն
• 350 գրամ լոլիկ
• 1 վարունգ
• Հազարի տերևներ
• Ձեթ
• Մանանեխ
• Սխտոր
• Աղ/սև պղպեղ

Ի՞նչ անել այս բաղադրիչների հետ

1 ճաշի գդալ ձիթայուղի մեջ տապակել շամպինիոնները: Մեկ այլ տարաում 1 ճաշի գդալ ձիթայուղը, քացախը, մանանեխը, սխտորը և պղպեղը խառնել: Մնացած բանջարեղենը լվանալ, կտրտել, լցնել ափսեի մեջ, ավելացնել տապակած սունկն ու պատրաստված սոուսը: Աղն ու պղպեղը՝ ըստ ճաշակի:

Գունեղ աղցան

Մեզ անհրաժեշտ է՝

• Հազարի տերևներ
• 1-2 գազար
• 2-3  չերրի լոլիկ
• 5 բողկ
• 2-3 ճաշի գդալ ձիթապտղի յուղ
• 1 թեյի գդալ կիտրոնի հյութ
• Աղ/սև պղպեղ

Ի՞նչ անել այս բաղադրիչների հետ

Հազարի տերևները կտրատել, չերրի լոլիկները կիսել, շարել, ավելացնել մանր կտրատած գազարը, բողկը, ձիթապտղի յուղը, կիտրոնի հյութը և համեմունքները, խառնել ստացված զանգվածը: Աղցանին ավելացնել քերած պանիրը, ըստ ցանկության՝  նաև չորացրած հացի կտորներ:

 

 

---