Արմավը բնական շաքարի աղբյուր է: Այն շատ օգտակար է, քանի որ իր մեջ պարունակում է կալիումի մեծ քանակություն: Օգնում է կանխել խոլեստերինի մակարդակը արյան մեջ, կարգավորում է արյան ճնշումը: Բայց այս բոլոր օգտակար հատկություններից բացի՝ արմավն ուղղակի շատ համեղ է: Այն հիմնականում շատ սազեկան է ցուրտ եղանակներին՝ մեկ բաժակ բուրումնավետ թեյով: Երբ խանութներում սկսում են արդեն արմավ վաճառել, ուրեմն Winter is comming…
Եվ քանի որ այսօր երկուշաբթի է, և մենք էլ, հավատարիմ մնալով խահանոցային մեր երկուշաբթիական ավանդույթին, այս անգամ ձեզ ենք ներկայացնում արմավով մի քանի համեղ աղանդեր՝ աշնանային ուշ երեկոների համար:
Արմավով կեքս
Անհրաժեշտ բաղադրիչներ
Արմավ՝ 400 գրամ
Շաքարավազ՝ 1 բաժակ
Ձու՝ 4 հատ
Կարագ՝ 200 գրամ
Ալյուր՝ 350 գրամ
Դարչին
Թեյ
Սոդա
Պատրաստման եղանակը
Արմավը նախօրոք թրջել մեկ բաժակ սև թեյի մեջ: Մինչ կպատրաստեք խմորը, արմավը թեյի հետ կդամվեն: Կարագն ու շաքարավազը դարչնի հետ հարել, մեկ-մեկ ավելացնել ձվերը, սոդան, ալյուրն ու լավ հարել: Արմավը խոհանոցային կոմբայնով հարել թեյի հետ և լցնել խմորի վրա: Ստացված զանգվածը կրկին խառնել և եփել ջեռոցում 45-50 րոպե 180 աստիճանի տակ: Ի դեպ, ցանկության դեպքում արդեն պատրաստ կեքսի վրա կարող եք կարամել ավելացնել, որի համար ձեզ անհրաժեշտ կլինեն կարագ և շաքարավազ: Թավայի մեջ իրար խառնելով կարամելի հասցնել երկու բաղադրիչներն ու տաք-տաք լցնել կեքսի վրա:
Արմավով գնդիկներ
Անհրաժեշտ բաղադրիչներ
Արմավ՝ 300 գրամ
Կոկոսի փոշի
Կակաոի փոշի
Պատրաստամն եղանակը
Արմավից կորիզները հեռացնել: Լցնել խոհանոցային կոմբայնի մեջ, ավելացնել մեկ քանի թեյի գդալ եռացրած ջուր և լավ հարել: Ստացված զանգվածից թեյի գդալի օգնությամբ գնդիկներ ձևավորել: Գնդիկները պատել կոկոսի փաթիլներով կամ կակաոի փոշով: Մի գաղտնիք բացեմ, եթե ուզում եք մի քիչ սրություն հաղորդել համին, կարող եք արմավի մեջ ջրի փոխարեն լցնել մի քիչ կոնյակ: Հավատեցեք հրաշալի բույր կհաղորդի և սուրճին շատ տեղին կընկերակցի:
Դարչինով ու արմավով թխվածք
Անհրաժեշտ բաղադրիչներ
Արմավ՝ 500 գրամ
Շերտավոր խմոր
Դարչին
Պատրաստամն եղանակը
Շերտավոր խմոր բացել, վրան ավելացնել կորիզը հանած արմավը, մի փոքր դարչին ավելացնել: Եթե քաղցրությունը բավարար չի, կարող եք մի փոքր շաքարավազ էլ ավելացնել: Այնուհետև խմորի ծայրերը փակել: Կարող եք ժամանակ չծախսել սիմետրիայի կանոններին հետևելու համար: Ազատ եղեք: Այս գործին թեթև անփությունն ընդհանրապես չի խանգարում: Այնուհետև խմորի վրա ձու քսել և դնել փուռը: Եփել 200 աստիճանի տակ 30-40 րոպե:
Արմավով և վարսակով մյուսլի
Այս բաղադրատոմսը նախաճաշի լավ տարբերակ է, մանավանդ եթե առողջ ապրելակերպի հետևորդ եք:
Անհրաժեշտ բաղադրիչներ
Արմավ՝ 200 գրամ
Վարսակ՝ մեկ բաժակ
Քունջութ՝ մեկ ճաշի գդալ
Ցանկացած տեսակի ընդեղեն
Դարչին
Մեղր
Նարինջի կամ կիտրոնի ցեդրա
Աղ
Պատրաստաման եղանակը
Վարսակի վրա լցնել մանրացված արմավը, քունջութն ու ընդեղենը: Լավ խառնել, ավելացնել 1 կամ 2 ճաշի գդալ մեղր և ստացված զանգվածը լցնել թավայի մեջ՝ մի լավ սեղմելով, որպեսզի տափակ թխվածքաբլիթի տեսք ստանա: Այնուհետև դնել փուռը և եփել 180 աստիճանի տակ 20 րոպե՝ մինչև վարսակը դառնա վարդագույն: Հյուրասիրել սուրճի կամ թեյի հետ: Ի դեպ պատրաստ թխվածքաբլիթը կարող եք նաև փշրել և օգտագործել կաթի կամ կեֆիրի մեջ լցնելով:
Դե ինչ , բարի ախորժակ, և չմոռանաք այս աղանդերները վայելել սուրճի կամ թեյի հետ՝ դիտելով մի հրաշալի աշնանային տաքուկ ֆիլմ…
Կարդացեք նաև՝