Կինոյի և գեղանկարչության կապն այնքան ամուր և անխզելի է, որ այլևս անհնար է պատկերացնել մեկն առանց մյուսի, ինչպես Տարանտինոյի ֆիլմերն առանց երկար ու սլացիկ ոտքերի կամ Սալվադոր Դալին առանց իր մուսա Գալայի։ Նկարները կարևոր դեր են խաղում մեր տեսողական ճաշակը բարձրացնելու հարցում: 

Այսօր հավաքել ենք 5 նկար, որոնք հայտնվել են Հարի Փոթերի կախարդական աշխարհում:

«Իվան Ահեղի դիմանկարը», Վիկտոր Վասնեցով

Եթե ուշադիր դիտենք ֆիլմը, ապա կնկատենք, որ Դամբլդորի աշխատասենյակում ցար Իվան Ահեղի դիմանկարն է կախված՝ մորթյա գլխարկի փոխարեն կարմիր գլխարկով։ Գրքում Դամբլդորի գրասենյակում կախված են նախորդ տնօրենների դիմանկարները: Ստացվում է այնպես, որ Իվան Վասիլևիչը ժամանակին եղել է Հոգվարթսի ղեկավարը։

«Նեստոր Վասիլևիչ Կուկոլնիկի դիմանկարը», Կառլ Բրյուլով

Իվան Ահեղի դիմանկարի վերևում կախված է մեկ այլ ռուս նկարչի՝ Կառլ Բրյուլովի աշխատանքը։ Արձակագիր և դրամատուրգ Նեստոր Վասիլևիչ Կուկոլնիկի դիմանկարը ստեղծվել է 1836 թվականին և այժմ գտնվում է Տրետյակովյան պատկերասրահում։ 

«Հանգիստ». Վերա Ռեպինայի դիմանկարը, Իլյա Ռեպին

Հոգվարթսում մոգության դպրոցի միջանցքներից մեկում քնած կախարդուհու նկարն է, որը շատ նման է Իլյա Ռեպինի կնոջ դիմանկարին, որը նկարիչը նկարել է 1882 թվականին։

«Լեդի Էլիզաբեթ Փոուփի դիմանկարը», Ռոբերտ Փիք

Պուֆենդույ ֆակուլտետի հյուրասենյակի մուտքի մոտ կա բրիտանացի թագավորական նկարիչ Ռոբերտ Փիքի նկարը։ Դիմանկարը նկարվել է 17-րդ դարի սկզբին՝ լեդի Էլիզաբեթ Փոուփի հարսանիքի առթիվ։ Բնօրինակում աղջկա գլխին չալմա (գլխաշոր) կա, սակայն Հարի Փոթերի տիեզերքում լեդին սրածայր գլխարկով է։

«Բեսսը Հարդվիքից», անհայտ նկարիչ

Ձեր առջև Հոգվարթսի նախկին տնօրեն Էլիզաբեթ Բերկի դիմանկարն է, որը սկզբում կախված է եղել հիմնական սանդուղքից, այնուհետև տեղափոխվել է ներքևի հարկ, որտեղ գաղտնի անցումի դեր էր կատարում դեպի բանտ։

Էլիզաբեթ Քավենդիշը, ավելի ուշ՝ Էլիզաբեթ Թալբոտը, Շրուսբերիի կոմսուհին, առավել հայտնի որպես Բեսսը Հարդվիքից, Էլիզաբեթյան անգլիական հասարակության նշանավոր դեմքերից մեկն էր։