Logo

Բուլղարիայում հայտնաբերված Պոլլոքի անհայտ նկարը պատկանել է Չաուշեսկուին

Հեղինակ
Աննա Անտոնյան
14:36 / 23.03.2023Արվեստանոց
Ջեքսոն Պոլլոք

Բուլղարիայում մշակութային արժեքների մաքսանենգության դեմ միջազգային գործողության շրջանակում հայտնաբերված ամերիկացի աբստրակտ նկարիչ Ջեքսոն Պոլլոքի անհայտ կտավը պատկանել է Ռումինիայի նախկին առաջնորդ Նիկոլաե Չաուշեսկուին, հայտնում է ТАСС-ը՝ հղում անելով Բուլղարիայի ազգային հեռուստատեսությանը (BNT):

Չաուշեսկուի մասնավոր հավաքածուից Պոլլոքի ստորագրությամբ նկարի ծագումը հաստատվել է նկարի հետևի մասում եղած ռումիներեն գրության շնորհիվ։

Դատախազի տեղակալ Սոֆյա Դեսիսլավա Պետրովայի խոսքով՝ նկարը ստեղծվել է հոլիվուդյան դերասանուհի Լորեն Բեքոլի ծննդյան օրվա առթիվ։ 1958 թվականին Բեքոլը վաճառել է նկարը, որը սկզբում հասել է Ռումինիա, հետո՝ Հունաստան, այնուհետև՝ Բուլղարիա։

Նկարի տերն այն պահել է պահարանի հետևում, քանի որ վստահ չի եղել դրա իսկության հարցում։ Փորձագետները նկարը գնահատում են 50 միլիոն եվրո:

Փոլ Ջեքսոն Փոլլոքը աբստրակտ էքսպրեսիոնիզմի հիմնադիրն է, «ցողելու» մեթոդի գյուտարարը։

Չաուշեսկուն ղեկավարել է Ռումինիան ավելի քան 20 տարի, սակայն տապալվել է ժողովրդական հեղափոխության ժամանակ և գնդակահարվել 1989 թվականի դեկտեմբերի 25-ին՝ կնոջ հետ միասին։