Հոկտեմբերի 23-ին Երևանի Կամերային թատրոնում տեղի ունեցավ գրող, թարգմանիչ, գրականգետ Դիանա Համբարձումյանի «Փեակների տարաբախտություն» գրքի շնորհանդեսը: «Հոմերոսի «Ոդիսականից» ու մեզ նաև Եղիշե Չարենցի չքնաղ պոեմից հայտնի` երջանիկ, ապա աստվածների կողմից իրենց մարդասիրության համար պատժվող փեակների ու նրանց արքայադուստր Նավզիկեի առասպելն իր խորհրդավոր հմայքով ինչպես հեռավոր էպիկական ժամանակներում, այնպես էլ այսօր շարունակում է հուզել ու հարցեր առաջադրել. ինչո՞ւ են երանելի և աստվածային համարվող փեակները պատժվում նավաբեկյալներին օգնելու համար, ինչո՞ւ աստվածները չեն հանդուրժում մարդկանց երջանկությունը, ո՞րն է ընդհանրապես երջանկության գինը», – կարող ենք կարդալ գրքի առաջաբանում, որը գրել է վեպի խմբագիր, գրականագետ Հայկ Համբարձումյանը:
Վեպը պատմում է Շվեդիա արտագաղթած հայ ընտանիքի մասին, օտարության մեջ ապրող մարդու խնդիրների, հոգու ցավերի, կարոտների և երջանկության որոնումների մասին: 20-ամյա աղջկա անունից շարադրվող պատումն ընդմիջվում է նրա մոր օրագրային գրառումներով, որտեղ Սկալդինա-Նարեն անցյալի վերականգնմամբ փորձում է գտնել ներկա դժբախտության արմատները և խելագարվում սեփական մեղքի գիտակցումից, մտքից, որ զգում էր, բայց չկանխեց կործանումը:
Վեպի շնորհանդեսին ներկա էին նաև մենք: