Ցեղասպանություն ապրած ժողովուրդների երախտագիտությունն ազգերի փրկության գործի նվիրյալների հիշատակին․ այդ մասին է «Երախտագիտության քարտեզ» ֆիլմաշարը, որի երկրորդ՝ մեր հայրենակիցների նկարահանած «Ամերիկացի բարի սամարացիները» ֆիլմը հայ հանդիսատեսի դատին կներկայացվի մի քանի օրից։
«Ամերիկացի բարի սամարացիները»` «Երախտագիտության քարտեզ» ֆիլմաշարի երկրորդ ֆիլմն է: Առաջինը «Փրկության քարտեզն» էր, որը պատմում է եվրոպացի հինգ հումանիստ կանանց կյանքի և Հայոց ցեղասպանության տարիներին նրանց մարդասիրական առաքելության մասին: Ֆիլմը մեծ էկրան է բարձրացել 2015թ. ապրիլին, թարգմանվել 13 լեզվով և առ այսօր ցուցադրվել է արդեն 20 երկրի բազմաթիվ քաղաքներում, հայաստանյան հեռուստաալիքներով, տարածվել համացանցում:
Ֆիլմաշարի մտահղացման հեղինակն ու պրոդյուսերը Մանվել Սարիբեկյանն է, իսկ «Փրկության քարտեզ» ֆիլմի ռեժիսորը Արամ Շահբազյանն է:
«Ամերիկացի բարի սամարացիները» վավերագրական դրաման նկարահանել է ռեժիսոր Արա Մնացականյանը: Ֆիլմը պատմում է փրկվածների ու նաև այն արտասովոր մարդկանց մասին, որոնց շնորհիվ իսպառ ոչնչացումից փրկվեցին հայ, հույն և ասորի ժողովուրդների բեկորները․ նրանց առաքելությունը մարդկային կյանքի փրկությունն էր:
Ֆիլմի ընթացքում ցեղասպանության մասին պատմում է ամերիկացի ցեղասպանագետ Փոլ Լևինը: Նա անկախ հետազոտողների հետ ուսումնասիրելով 20-րդ դարասկզբին Օսմանյան Թուքիայում ծրագրված և իրագործված ցեղասպանությունները` ներկայացնում է ԱՄՆ-ի հետաքրքիր տեղեկություններ հումանիտար օգնության մասին:
Ֆիլմում օգտագործվել են ԱՄՆ-ի, Հունաստանի, Լիբանանի և Հայաստանի տարբեր արխիվների, գրադարանների և թանգարանների փաստագրական նյութերը: Որպես խորհրդատուներ` պատմական փաստերի հավաքագրմանն աջակցել են ԱՄՆ-ի, Հունաստանի, Լիբանանի, Շվեդիայի և Հայաստանի ցեղասպանագետներ, պատմաբաններ, գիտական կենտրոնների պատասխանատուներ ու աշխատակիցներ:
Վավերագրական դրաման նկարահանվել է ԱՄՆ-ում, Գերմանիայում, Իրանում, Թուրքիայում, Հունաստանում, Լիբանանում և Հայաստանում:
68 րոպե տևողությամբ ֆիլմի բնօրինակ լեզուն անգլերեն է` հայերեն թարգմանությամբ:
Ֆիլմը 2021-ին նկարահանել է «Ման Փիքչերս Փրոդաքշենը»: Ստեղծմանն աջակցել են միջազգային բազմաթիվ ընկերություններ, ֆինանսական աջակցություն է ցուցաբերել նաև Հայաստանի կառավարությունը՝ Հայաստանի Ազգային Կինոկենտրոնի միջոցով:
«Ամերիկացի բարի սամարացիները» ֆիլմի համաշխարհային պրեմիերան տեղի է ունեցել 2021-ի նոյեմբերի 20-ին՝ Լոս Անջելեսում: Երևանյան պրեմիերան տեղի կունենա մարտի 18-ին`«Մոսկվա» կինոթատրոնում: