Այսօր անկրկնելի Շերիլին Սարգիսյանը՝ Շերը դառնում է 76 տարեկան։ Այս կինը դարձել է իր տեսակի մեջ միակը, բացառիկ երգչուհի, ում ձայնը ճանաչում են առաջին իսկ նոտաներից։ Նրա երգերը դարձել են մշտական ​​հիթեր։

Ներկայացնում ենք հետաքրքիր փաստեր անզուգական Շերի կենսագրությունից․

Նրա ամբողջական անունը Շերիլին Սարգիսյան ԼաՊիեր Բոնո Ալմեն է:

Շերն ազգությամբ հայ է:

Մայրը՝ Ջորջիա Հոլթը (Պելամ), բնիկ ամերիկյան, անգլիական և ֆրանսիական ծագում ուներ և գավառական դերասանուհի էր, իսկ հայրը՝ ծնունդով հայ Ջոն Սարգիսյանը, աշխատում էր որպես բեռնատարի վարորդ։

Շերիլինը ծնվել է Կալիֆոռնիայի խոշորագույն քաղաքներից մեկում՝ Էլ Սենտրոյում, աղքատ ընտանիքում: Երբ աղջիկը ծնվել է, նրա ծնողներն արդեն ամուսնալուծված էին։ Նա առաջին անգամ հորը տեսել է 11 տարեկանում։

Վաղ մանկությունից նրան գրավել է բեմը։ Նա երազում էր դերասանուհի դառնալ և նույնիսկ ինքնագրերի համար աշխատում էր իր ստորագրության վրա։

Չնայած իր բաց և էպատաժային կերպարին, պատանեկության տարիներին Շերը շատ ամաչկոտ երեխա էր և լավ չէր սովորում դպրոցում:

Հենց Շերը դարձավ 16 տարեկան՝ թողեց դպրոցը և ընկերուհու հետ գնաց Լոս Անջելես՝ դերասանի վարպետություն սովորելու։

Շերի կյանքի առաջին տղամարդը հոլիվուդյան սրտակեր Ուորեն Բիթին էր, սակայն նրանց սիրավեպը երկար չտևեց։ Հարցազրույցներից մեկում Շերը, հիշելով իր առաջին սիրային փորձը, ասել է. «Ուորենը վարվում էր ջենթլմենի պես: Ես շոյված էի, որ հոլիվուդյան մի դերասան, որն ինը տարով մեծ էր ինձանից, ուշադրություն դարձրեց ինձ վրա: Բայց սիրավեպն արագ ավարտվեց։ Ինչ է պատահե՞լ. նա պարզապես զրկեց ինձ կուսությունից: Համաձա՞յն էի։ Ո՛չ, դա զզվելի էր և նվաստացուցիչ…»:

Վատ փորձից հետո, ինչպես ասել է երգչուհին, տղամարդիկ երկար ժամանակ հակակրանքն էին առաջացնում։ Այնուամենայնիվ, 1962 թվականին Շերը սրճարանում հանդիպում է երաժշտական ​​պրոդյուսեր Սոնի Բոնոյին, որն իրենից մեծ էր 11 տարով։ «Մեր հայացքները պատահաբար հանդիպեցին. դա էլեկտրական շոկ էր»,- ասել է Շերը:

Սոնի Բոնոն թույլ է տվել աղջկան ապրել իր հետ, քանի որ այն ժամանակ նա նույնիսկ գիշերելու տեղ չուներ։ Փոխարենը նա պետք է մաքրեր տունը և ճաշ պատրաստեր։ Սակայն նրանց հարաբերություններն ընկերականից վերածվեցին ռոմանտիկի, և 1963 թվականին զույգն օրինականացրեց հարաբերությունները։

1965 թվականին Սոնին և Շերը սկսեցին համատեղ կարիերան. նույն թվականին նա փոխեց իր անունը Շերիլինից Շերի, և նրանք միասին ստեղծեցին «Սոնի և Շեր» հայտնի դուետը։ Նրանց առաջին հիթը եղել է «I Got You Baby» երգը, որը միանգամից սիրվել է։

1969 թվականին Շերը մայր է դառնում։ Առաջին երեխան աղջիկ էր՝ Չեսթիթին, որն այժմ ավելի հայտնի է որպես Չազ Բոնո: 2010 թվականին նա սեռափոխության վիրահատության է ենթարկվել և դարձել տղամարդ։

1974 թվականի հունիսին Շերն ու Բոնոն ամուսնալուծվում են, որից հետո նրանց ստեղծագործական ուղիները նույնպես բաժանվում են։ 1998 թվականին Սոնի Բոնոն մահանում է դահուկ քշելիս ծառին բախվելու հետևանքով։ Նա 62 տարեկան էր։

Շերի երկրորդ ամուսինը նույնպես երաժիշտ և երգիչ էր՝ Գրեգ Ալմանը, «The Allman Brothers» բլյուզ խմբի անդամ, որից երգչուհին որդի ունեցավ՝ Էլայջա Բլյու Ալմանը: Այս ամուսնությունը տևեց ընդամենը երկու տարի։

Դեյվիդ Լեթերմանին տված հարցազրույցում Շերը խոստովանել է, որ անցողիկ հարաբերություններ է ունեցել Թոմ Քրուզի, Ջին Սիմոնսի և Էրիկ Կլեպտոնի հետ։ Երգչուհին ասել է նաև, որ երբեք չի թաքցրել, որ իր կյանքում տղամարդիկ շատ են եղել։

Իր հաջողակ կարիերայի ընթացքում Շերը ստացել է ամենակարևոր մրցանակները՝ «Օսկար», «Գրեմմի», «Էմմի» և երեք «Ոսկե գլոբուս»։

Շերը միակ երգչուհին է, ում երգերը հինգ տասնամյակ անընդմեջ (1960-ականներից մինչև 2010-ականները) հասել են Billboard Hot 100-ի լավագույն տասնյակին։