Նոր Կորոնավիրուսից Նիդերլանդներում մինչ օրս զոհվել է 43 մարդ։ Այսօրվա դրությամբ վարակակիր մարդկանց թիվը հասնում է 1705-ի: Նրանց թվում՝ 389 մարդ, որ աշխատում է առողջապահության ոլորտում․․․ Հոլանդիայում այսօր փակ են ուսումնական հաստատությունները, զվարճանքի և ժամանցի վայրերը։ Ի՞նչ է կատարվում երկրի ներսում, ի՞նչ են անում մարդիկ մեկուսացման մեջ, արդյո՞ք խուճապ կա երկրում, որքանո՞վ է կառավարությունը հոգ տանում մարդկանց մասին․ խոսել ենք Նիդերլանդներում ապրող մեր հայրենակից մեկի հետ։

Ինքնամեկուսացված ենք․․․

Փակ են բոլոր ուսումնական հաստատությունները, ժամանցի վայրերը։ Բոլորը փակվել են տներում, սակայն խուճապ չկա։ Զբոսաշրջիկներ էլ գրեթե չկան, ինչն իհարկե թեթևացնում է տեղացիների կյանքը։

Դիմակով մարդկանց փողոցներում, խանութներում չեք հանդիպի։

Վերջերս խանութ մտա մեկանգամյա օգտագործման ձեռնոցներով, որպեսզի սայլակին դիպչելիս ապահով լինեմ։ Խանութի աշխատակիցներն ու գնորդները զարմացած ինձ նայեցին։ Որոշ խանութների մուտքերի մոտ աղտահանող հեղուկներ են դրված, որոնցից քիչ մարդ է օգտվում։ Խանութներում էլ հանգիստ վիճակ է, ոչ ոք մեծ առևտուր կարծես չի անում։ Հերթեր միայն մարիխուանայի խանութներում էին, որոնք արդեն փակ են։

ավելի մանրամասն տես՝

Հոլանդիայի մարիխուանայի խանութներում կատաղի հերթեր են․․․

Խոիճապ չկա, ավելորդ զգուշավորություն ևս, մարդիկ ապրում են գրեթե սովորականի պես՝ չնայած նրան, որ երկրում ամեն օր մարդ է մահանում այս անտանելի վիրուսից։

Զբոսաշրջիկներն են քչացել նաև․․․ Երկրում անսովոր լռություն է։

Ամեն մարդ ինքն է իր գլխի տերը․․․

Եթե հանկարծ ինչ-որ մեկն իրեն վատ զգա, ջերմի, հազա, թուլություն ունենա, կարող է զանգել հատուկ ծառայություն։ Այնտեղ կլսեն գանգատները, և եթե վիճակը վատ լինի ըստ իրենց, ապա նոր կգան, կստուգեն հիվանդին։ Եթե ըստ իրենց՝ այնքան էլ անհանգստացնող չէ զանգահարողի վիճակը, ապա մի քանի խորհուրդ են տալիս և անջատում հեռախոսը։

Ու եթե դուք դեռ դժգոհում եք Հայաստանի կառավարությունից․․․

Ապա ասեմ, որ դժգոհելու առիթ չունեք։ Այն հոգատարությունը, այն ուշադրությունը, որ տեսնում եմ Հայաստանում, այստեղ չկա։ Այստեղ հավանաբար պետական հոգածություն կա, որ խուճապ չստեղծվի, վատ ու վախեցնող տեղեկատվությունը շատ չտարածվի, չվնասի մարդկանց և երկրի ցուցանիշը տարբեր ոլորտներում չընկնի։

Այս թեմայով մի դեպք պատմեմ․ մի ծանոթ հոլանդացու 18-ամյա որդին վարակվել է կորոնավիրւսով։ Նրան պահում են տան նկուղում՝ մեկուսացած։ Խնամում են տանեցիները․․․ Կարծում եմ Հայաստանում նման բան չէր կարող պատահել։

---