Այս անգամ ձեզ ենք ներկայացնում իտալացի լուսանկարիչ Կլոդ Նորիի ամառային աշխատանքները, որոնք ստիպում են խորասուզվել դրանց մեջ, զգալ ամառվա շունչը և մի փոքր էլ թախծել չապրած ժամանակների մասին, կարոտել մարդկանց, որոնց, թեպետ չես հանդիպել, բայց որոնք այնքա՜ն, հարազատ, այնքա՜ն սիրելի…
Եկեք խոստովանենք՝ բոլորս էլ սպասում ենք ամառվան, քանի որ հույս ունենք, որ ամռանը նոր կյանք կսկսենք, նորից կսիրահարվենք, հրաշալի պահեր, նոր զգացողություններ կունենանք, կճանապարհորդենք, նոր վայրեր և նոր մարդկանց կբացահայտենք: Յուրաքանչյուր ամառ մենք նոր պատմություններ ենք կերտում, յուրաքանչյուր ամառ մենք ապրում ենք մեր ամենագեղեցիկ երազանքները:
Քլոդ Նորին ծնվել է 1949 թ. Թուլուզում, իտալացի գաղթականների ընտանիքում: Տղան 12 տարեկան էր, երբ բացահայտում է լուսանկարչության հանդեպ իր անսահման սերը: 1973 թ. Քլոդն ուղևորվում է Փարիզ, ընկերանում տարբեր լուսանկարիչների հետ, հիմնում “Contrejour” թերթը, հրատարակչություն և ցուցասրահ Մոնպառնասում: Մի որոշ ժամանակ Քլոդն աշխատում է Vogue և Daily Telegraph ամսագրերում և թողարկում է իր առաջին՝ “Lunettesen 1976” ֆոտոգիրքը: Լուսանկարչական ապարատի օգնությամբ Նորին ծանոթանում էր աղջիկների հետ և կոտրում անտարբերության պատը:
30 տարիների ընթացքում Նորին լուսանկարում է իտալական Ռիմինի, Կապրի, Ամալֆի, Ռապալլո և Պորտոֆինո հայտնի հանգստավայրերը և մարդկանց: Նորին հիշում է, որ ծնողների հետ 60-ականներին ամառները Իտալիայի գեղատեսիլ վայրերում էր անցկացնում:
«60-ականներին յուրաքանչյուր ամառ մենք նստում էինք հորս մեքենան և ուղևորվում Իտալիայի տարբեր հանգստավայրեր: Հիշում եմ՝ իտալացի կանայք ասես աստվածուհիներ լինեին, ասես կտավներից կամ ֆիլմերից դուրս եկած լինեին, և իրենց գեղեցկությամբ զարդարում էին այդ վայրերը»,- պատմում էր լուսանկարիչը:
70-ականների վերջում արդեն Կլոդը ճանապարհորդում էր և լուսանկարում իտալական լողափները:
«Բոլորն են սիրում Իտալիան՝ լողափ, ծով, խանդավառություն: Ես լուսանկարչության համար մի հիանալի ժամանակ էի ընտրել՝ 80-90-ականները պարզապես հրաշք էին: Համացանց չկար, բջջային հեռախոսներ չկային, իսկ լուսանկարն իր մեջ առասպել էր կրում: Այս լուսանկարների միջոցով ես պատմում եմ իմ մասին, պատմում եմ իտալական ծագում ունեցող ֆրանսիացու մասին, որը վերադարձել է այն վայրերը, որտեղ ժամանակին գալիս էր ծնողների հետ, և այսօր նա փնտրում է այն, ինչին նա սիրահարվել է այն տարիներին: Սա տուրիստական կամ թանգարանային Իտալիան չէ: Ես ուզում էի ցույց տալ Իտալիայի այն կողմը, որը դուք հաճախ չեք տեսնում»,-ասել է Կլոդը:
Հետևեք մեզ նաև Instagram-ում, Twitter-ում և YouTube-ում
աղբյուր՝ cameralabs