Մայիսի 14-ին մեկնարկում է Կաննի 72-րդ կինոփառատոնը և բոլորս անհամբեր սպասում ենք, թե երբ ենք պատիվ ունենալու վայելել մեր սիրելի վարպետների նոր գործերը, որոնք ցուցադրվելու են փառատոնի շրջանակներում:
Ձեզ ենք ներկայացնում այս տարվա Կաննի կինոփառատոնի ամենասպասված ֆիլմերից մի քանիսը:
Ցավ ու փառք/Боль и слава/Dolor y gloria
ռեժ.՝ Պեդրո Ալմադովար
դերերում՝Անտոնիո Բանդերաս, Պենելոպե Քրուզ ևն
Անկրկնելի Անտոնիո Բանդերասն այս անգամ մարմնավորում է կինոռեժիսորի, որի կյանքում խորը ճգնաժամային շրջան է, և որն անդադար հետ է նայում՝ մտովի տեղափոխվելով մանկություն և հիշելով իր անցած գնացած ուղին, որը նրան բերեց այնտեղ, որտեղ նա այսօր է: Մոր հանդեպ ջերմ զգացմունքները, բաժանումը, ցավը, հաջողության ձգտումները, որոնք ստիպեցին հերոսին բռնել պանդխտության ուղին, երջանկության որոնումները՝ այս հիշողությունները հանգիստ չեն տալիս գլխավոր հերոսին: Դրանք իհարկե հաճելի են, բայց միևնույն ժամանակ ցավալի, այնքա՜ն ցավալի…
Իսպանիայում ֆիլմի պրեմիերան արդեն տեղի է ունեցել, և հարկ է նշել, որ եթե պրեմիերան համաշխարհային չէ, Կաննի կինոփառատոնը չի արգելում դա:
Իսկ մեզ մնում է միայն սպասել և հուսալ, որ շատ շուտով մենք նույնպես հնարավորություն կունենանք գնահատել վարպետ Ալմադովարի նոր, վառ և զգացմունքային ֆիլմը:
տես նաև՝ Պեդրո Ալմոդովարն ասում է…
Սիբիլ/Сибил/Sibyl
ռեժ.՝Ժյուսթին Թրիե
դերերում՝Վիրժինի Էֆիրա, Ադել Էքզարկոպուլոս ևն
Գեղեցիկ և տաղանդավոր Վիրջինի Էֆիրան այս անգամ մարմնավորում է գրողի, որը երկար տարիներ է ինչ հոգեբան է աշխատում: Սիբիլի կյանքում նոր փուլ է մեկնարկում, և նա նորից ցանկանում է գրել: Հերոսուհին լուրջ որոշում է կայացնում և կրճատում է հիվանդների թիվը, սակայն նրանցից մեկը՝ Մարգոն շատ խնդրում Սիբիլին օգնել նրան և վերջինս չի կարողանում մերժել նրան: Մեկ «այո»-ն կարող է մեկընդմիշտ փոխել կյանքը, այնպես չէ՞:
Սիբիլին փոփոխություններն են սպասում…
Ֆրենկի/Семейный отдых/Frankie
ռեժ.՝Այրա Սաքս
դերերում՝Իզաբել Հյուպպեր, Բրենդան Գլիսոն ևն
Ամերիկացի ռեժիսոր, «Ոսկե արջի» դափնեկիր Այրա Սաքսն այս անգամ մեզ է ներկայացնում լրիվ նոր ձեռագրով շատ հետաքրքիր ֆիլմ, որը նկարահանվել է հարազատ ԱՄՆ-ի սահմաններից դուրս՝ Պորտուգալիայում:
Այս կինոնկարը պատմում է միևնույն ընտանիքի երեք սերունդների մասին: Ընտանիքի անդամներն ուղևորվում են Սինտրա քաղաք և այս ուղևորությունը շատ խոստումնալից է. միասին անցկացրած ժամանակը նրանք երբեք չեն մոռանա:
Մեռածները չեն մահանում/Мертвые живые мертвецы/The Dead Don’t Die
ռեժ.՝Ջիմ Ձարմուշ
դերերում՝ Բիլ Մյուրեյ, Ադամ Դրայվեր ևն
Զոմբիների մասին պատմող շատ զավեշտալի ֆիլմ «Ոսկե Արմավենու» դափնեկիր Ջիմ Ջարմուշից: Նշենք, որ ֆիլմը ցուցադրվելու է փառատոնի բացմանը:
Վամպիր սիրեկանների մասին պատմող Ջարմուշի համար անշուշտ այս գործը հեշտությամբ է տրվել ու բացի այդ իր սովորության համաձայն նա նորից համագործակցել է իր սիրելի դերասան-դերասանուհիների հետ:
Ֆիլմի իրադարձությունները տեղի են ունենում ԱՄՆ-ի մի փոքրիկ քաղաքում: Տեղացիներն ապրում են սարսափի մեջ: Զոմբիները նրանց հանգիստ չեն տալիս և ոստիկանները գործի են անցնում:
տես նաև՝Կաննի 72-րդ կինոփառատոն. լայն-ափ
Թաքնված կյանք/Радегунд/A Hidden Life
ռեժ.՝Թերենս Մալիք
դերերում՝Մատիաս Շոնարթս, Միկաել Նյուկվիսթ ևն
«Ոսկե Արմավենու» երկակի դափնեկիր ամերիկացի սիրված ռեժիսոր Թերենս Մալիքն այս անգամ պատմում է Ֆրանց անունով մի տղամարդու մասին, որը միշտ դեմ է արտահայտվել Երկրորդ Համաշխարհային պատերազմին և 1943 թ. նացիստները նրան կախաղան են հանում:
Եթե ծանոթ եք Մալիքի ոճին, ապա վստահաբար այս ֆիլմը ձեզ դուր կգա, թեպետ ինչպես ինքը ռեժիսորն է խոստովանել՝ այն մի փոքր կտարբերվի նրա նախորդ գործերից:
Վարպետ Մալիքն ունի «Ոսկե Արմավենին» իր հետ տուն տանելու բոլոր հնարավորությունները:
Երիտասարդ Ահմեդ/Молодой Ахмед/Le jeune Ahmed
ռեժ.՝Ժան-Պիեռ Դարդեն, Լյուկ Դարդեն
Ցանկում հաջորդը «Ոսկե Արմավենու» դափնեկիր Դարդեն եղբայրներն են իրենց «Երիտասարդ Ահմեդ» կինոնկարով:
Այս անգամ եղբայրները պատմում են Բելգիայում ապրող մի արաբ տղայի մասին, որը ոչ մի կերպ չի կարողանում հարմարվել այդ շատ խորթ միջավայրին: Ահմեդը որոշում է սպանել ուսուցչուհուն…
Պարազիտներ/Паразиты/Gisaengchung
ռեժ.՝Պոն Ջուն-խո
դերերում՝Սոն Կան-խո, Լի Սո-գյուն ևն
Սա կորեացի ռեժիսորի՝ վերջին 10 տարիների ընթացքում նկարահանված առաջին կորեերեն ֆիլմն է: Ֆիլմը սոցիալական խնդիրների և դրանց հետևանքների մասին է: Գլխավոր հերոսը մի աղքատ տղա է, որը ճակատագրի բերումով ընկնում է հարուստների աշխարհ և նրանց նիստուկացով շարժվելու համար գնում է անմտածված քայլերի: Ֆիլմում ռեժիսորը շեշտադրել է այնպիսի հարցեր, որոնք ակտուալ են բոլոր ազգերի համար:
տես նաև՝Կաննի կինոփառատոնի տարբեր տարիների 20 ամենագեղեցիկ պաստառները
Ցանկի աղբյուրը՝ GQ ամսագիր