Հաշվի առնելով «La casa de papel»-ից հետո հայերի մեջ առաջացած հետաքրքրությունը կրիմինալ պատմությունների հանդեպ, մենք հավաքագրել ենք հինգ սերիալ, որոնք անհավանական լարված սյուժե ունեն, պատմում են կրիմինալի ու օրինապահների հավերժական պայքարի մասին, և տեղ-տեղ լցոնված են սիրային ու դրամատիկ տեսարաններով։

Breaking Bad

Հեռուստասերիալը պատմում է քիմիայի ուսուցիչ Ուոլթեր Ուայթի մասին, վերջինս 50 տարին բոլորելուն պես տեղեկանում է, որ տառապում է թոքերի քաղցկեղով, և գիտակցելով, որ ապրելու քիչ ժամանակ ունի, որոշում է ընտանիքին իր մահվանից հետո նյութապես ապահովելու համար զբաղվել մեթամֆետամինի արտադրությամբ։ Օգտագործելով քիմիայի ոլորտում ունեցած գիտելիքները՝ Ուայթը սկսում է համագործակցել իր նախկին աշակերտ Ջեսսի Փինքմանի հետ և ձեռնամուխ է լինում բյուրեղացված մեթամֆետամինի արտադրությանն ու վաճառքին։ Ուայթի՝ անօրինական աշխարհ մուտք գործելու որոշումը պայմանավորված նաև որդու հաշմանդամությամբ և կնոջ՝ չպլանավորված հղիությամբ։ Անօրինական գործունեության ընթացքում նա ստպված է լինում պայքարել թե’ ոլորտի հսկաների, թե’ օրինապահ մարմինների դեմ, բախվում է ընտանեկան ու միջանձնային բազմաթիվ խնդիրների։

Սերիալը համարվում է բոլոր ժամանակների լավագույններից մեկը, այն ստացել է կուլտային ֆիլմի որակավորում։ Վերջին էպիզոդի հեռարձակման ժամանակ հեռուստասերիալը տեղ է գտել ամերիկյան հեռուստատեսության ամենադիտված կաբելային հեռուստաշոուների շարքում։ Արժանացել է բազմաթիվ մրցանակների, մասնավորապես՝ 16 «Պրայմթայմ Էմմի» մրցանակի, 8 «Սեթլայթ» մրցանակի, 2 «Ոսկե գլոբուս»-ի և այլն։

2013 թվականին հեռուստասերիալը տեղ է գտել Գինեսի ռեկորդների գրքում՝ որպես բոլոր ժամանակների ամենաբարձր գնահատականի արժանացած շոու։

Sherlock

Հեռուստանովելը Արթուր Կոնան Դոյլի՝ խուզարկու Շերլոկ Հոլմսի և նրա գործընկեր Ջոն Վաթսոնի մասին պատմող ստեղծագործության մոտիվներով է նկարահանվել։ Հեղինակը դեմքերն ու դեպքերը տեղափոխել է մեր ժամանակներ ու ստացել անհավանական լարված սերիալ իդեալական խուզարկուի մասին։

Խուզարկու Շերլոկ Հոլմսը ընկերոջ միջոցով ծանոթանում է Ջոն Վաթսոնի հետ, որը Աֆղանստանից վերադարձած ռազմական բժիշկ է։ Շերլոկն ու Վաթսոնը կիսում են նույն բնակարանը։ Շերլոկն անմիջապես տպավորում է Վաթսոնին՝ պատմում է վերջինիս այն մասին, որ ծառայել է Աֆղանստանում, և որ ոտքի ցավը փսիխոմատիկ բնույթ ունի։ Նրանք բնակություն են հաստատում Բեյքեր սթրիթ համար 221 տանը՝ մի տարեց կնոջ՝ Հադսոնի մոտ։ Շերլոկը և Ջոնը միասին օգնում են Սքոթլանդ-Յարդին բարդ գործերը բացահայտելու գործում՝ օգտագործելով դիտման, վերլուծության, բացառման մեթոդները։

Հեռուստանովելի հեղինակներն են Մարկ Գեթիսը և Սթիվեն Մոֆֆատը, վերջիններս հայտնի են «Դոկտոր Ով» և «Ջեքիլ» հեռուստանովելներով, իսկ Շերլոք Հոլմսի և դոկտոր Ջոն Վաթսոնի դերերը կատարում են Բենեդիկտ Քամբերբեչը և Մարտին Ֆրիմենը։ Սերիալի գործողությունները զարգանում են հիմնականում Լոնդոնում և Քարդիֆում։ Երեք եթերաշրջանների արդյունքներով հեռուստանովելը ստացել է դրական արձագանքներ, և ներկայացվել է մի քանի մրցանակների։ 2011 թվականին «Շերլոկը» դարձավ հեռուստատեսային «BAFTA »մրցանակակիր՝ «Լավագույն դրամատիկական հեռուստանովել» անվանակարգում։

Boardwalk Empire

Սերիալի հեղինակը, պրոդյուսերն ու գլխավոր սցենարիստը «Սոպրանոների» սցենարի համար Emmy մրցանակի արժանացած Թերենս Վինթերն է, իսկ առաջին մասի ռեժիսորը՝ լեգենդար Մարտին Սկորսեզեն: 1920-ականներ, «Չոր օրենքի» ժամանակաշրջան, Ատլանտիկ Սիթի՝ հաճույքների և անբարոյականության քաղաք: Ենոքսը շատ կարևոր մարդ է քաղաքում , վերջինս փորձելով օգտվել հեղափոխական վիճակներից՝ ուզում է ավելի հարստանալ: Սակայն Ենոքսը միակը չէ, ով զգում է ժամանակի զարկերակն ու օգտվում «Չոր օրենքից» և խառը քաղաքական վիճակներից: Քրեական պատմություններ, հետաքննություններ, սեր, կանայք. մի խոսքով լարված սերիալ, որը կրիմինալի սիրահարներին անտարբեր չի թողնի։

Fargo

2006 թվականի հունվարին Լորնի Մալվո անունով մի  սոցիոպատ ժամանում է Մինեսոտայի Բեմիդջի քաղաք: Հիվանդանոցում նա հանդիպում է Լեսթեր Նիգարդին: Այս հանդիպումը սկիզբ է դրվում այն բոլոր անհավանական իրադարձություններին, որոնք հետագայում տեղի են ունենում։ Քաղաքում թափ է առնում սպանությունների մեծ ալիք, դե իսկ տեղի ոստիկաններն ու դետեկտիվները փորձում են գլուխ հանել դրանցից։

Սերիալը էկրաններին է հայտնվել 2014 թվականին: Հետաքրքիր է, որ յուրաքանչյուր սերիայի սկզբում խոսվում է այն մասին, որ բոլոր իրադարձությունների հիմքում իրական պատմություններ են և դրանք տեղի են ունեցել Մինեսոտա նահանգում: Սակայն ֆիլմի պրոդյուսերներ և սցենարիստներ Կոեն Եղբայրները խոստովանել են, որ իրականում բոլոր դեպքերը հորինված են: 1995 թ. «Ֆարգո» ֆիլմը հաղթել է Օսկարի երկու անվանակարգերում. «Լավագույն դերասանուհի»  անվանակարգում հաղթել է դերասանուհի Ֆրենսիս ՄաքԴորմանդը,  իսկ մյուս Օսկարին ֆիլմն արժանացել է «Լավագույն սցենարի» համար:

Evil Genius

2003 թվականի օգոստոսի 28-ին անհայտ տղամարդը մտնում է  Փենսիլվանիա Էրի քաղաքի բանկը: Նրա պարանոցի վրա նկատվում է  ինչ-որ  սարք: «Նրանք ինձ կպայթեցնեն,  եթե դուք ինձ փող չտաք», – հանգիստ ասում է  տղամարդը: Գանձապահները նրան տալիս են առկա 8000 ԱՄՆ դոլարը (նա պահանջում էր 250,000), և պատանդ-գողը դուրս է գալիս շենքից: Ոստիկաններն ձեռբակալում  են նրան ավելի ուշ և պարզում են, որ նրա անունը Բրայան Ուելս է, աշխատում է պիցայի առաքիչ, իսկ  պարանոցի վրայից կախված սարքը իսկական ռումբ է, որն էլ  պայթում է հենց ոստիկանության դիմաց: Պատմության շարունակությունը խոստանում է հետաքրքիր ու լարված լինել։

 

---