Սերգեյ Սմբատյանը կղեկավարի արհեստական բանականությամբ համերգ…

Հայաստանում տեղի ունեցող Տեղեկատվական տեխնոլոգիաների համաշխարհային կոնգրեսի WCIT-2019  (World Congress on Information Technology) համաժողովի շրջանակներում հոկտեմբերի 6-ին  տեղի կունենա արտասովոր համերգ՝ 15 երկրներից ժամանած 110 երաժիշտների  նվագախումբը՝ Սերգեյ Սմբատյանի ղեկավարությամբ դուրս կգա բեմ՝ նախապես չիմանալով, թե ինչ է նվագելու… Այս նորարարական համերգի համար կստեղծվի արհեստական բանականություն, որը օնլայն ռեժիմով  կստեղծագործի երաժշտություն՝ հիմնված շարականների վրա: Հետաքրքրիր է, չէ՞:

Համերգի  գաղափարը պատկանում է Հայաստանի Պետական սիմֆոնիկ նվագախմբի դիրիժոր Սերգեյ Սմբատյանին: Իսկ այն իրականացնելու միջոցները կտրամադրեն ՏՏ համաժողովի կազմակերպիչները: Երաժիշտները, որոնց երկրներում անցյալում տեղի են ունեցել WCIT  համաժողովներ, արդեն Հայաստան կժամանեն սեպտեմբերի 29-ին, իսկ «ՏՏ համերգի» փորձը  կսկսվի սեպտեմբերի 30-ին: Սա ՏՏ համաժողովի պատմության մեջ առաջին փորձն է, երբ  ստեղծվում է նվագախումբ, որը բառիս բուն իմաստով չի իմանալու, թե ինչ է նվագելու:  Ավելին՝  համերգի դիրիժորն ու 110 հոգուց բաղկացած նվագախումբը ենթադրաբար այնքան լավ են իրար զգալու՝ լինելու են  ստեղծագործական մի ալիքի վրա, որ  որոշել են բարդացնել առանց այն էլ  բարդ-էքսպերիմենտալ համերգը՝  ստեղծվելով երաժշտություն  օնլայն ռեժիմով՝ իրական ժամանակում:  Սմբատյանի խոսքերով երաժշտությունը լինելու է հայկական, իսկ ալգորիթմը,  որը մշակվել  է այս համերգի համար,  կարողանում է ստեղծել հայկական մոտիվներով երաժշտություն: Արհեստական բանականության կողմից գրված երաժշտության հիմքում ընկած են հայկական հոգևոր երգերը՝ շարականները:

Սմբատյանը կարծում է, որ նման փորձերին պետք է  մոտենալ զգուշությամբ, բայց պետք չէ վախենալ: Այն ոչ  մի կերպ չի փոխարինում կոմպոզիտորի տաղանդը արհեստական  բանականությամբ կամ ինտելեկտով, այլ, ընդհակառակը, բարձրացնում է դասական և հայկական երաժշտության որակավորումը և հասկացողությունը: Ավելին՝ արհեստականորեն ստեղծված միայն մեկ մեղեդի է  ընդգրկված համերգի  երգացանկում, իսկ երեկոյի մնացած մյուս  համարները լինելու են հայտնի կոմպոզիտորների ստեղծագործություններից:  Ի դեպ, համաժողովի համար տեղծվել է  հատուկ օրհներգ, որն  իր մեջ է ներառել  15 երկրի, որտեղից ժամանել են երաժիշտները, օրհներգերը: Այլ կերպ ասած՝ օրհներգային  սիմբիոզ:

Այսքանով անակնկալները չեն ավարտվում. հոկտեմբերի 6-ին համերգով հանդես կգա նաև միջազգային ճանաչում ունեցող հոլանդացի դիջեյ Արմին վան Բյուրենը:

Այսպիսով՝  Հայաստանի պատմության մեջ առաջին անգամ համաժողովի  ծրագրի շրջանակներում  գիտությունն ու արվեստը կքայլեն կողք կողքի՝ կապված լինելով մեկ ընդհանուր տարրով:  Սա ուղերձ է բոլորին առ այն, թե ինչպես է մեր երկիրը ներկայանում աշխարհին  21-րդ դարում և ինչպես է տեսնում իր ապագան տեխնոլոգիական դարաշրջանում:

Հիշեցնենք, որ Հայաստանում Տեղեկատվական տեխնոլոգիաների համաշխարհային կոնգրեսի WCIT-2019 ֆորումը տեղի կունենա առաջին անգամ: Երևան  կժամանեն  60 երկրի  ավելի քան 2000 պատվիրակ: Համաժողովի  հյուրերի թվում կլինեն նաև  Քիմ Քարդաշյանը և ամերիկացի գործարար և «Reddit»  կայքի և «Initialized Capital» վենչուրային ընկերության համահիմնադիր Ալեքսիս Օհանյանը: