սերը եկավ… [Տաթև Հովակիմյան]

Ես Տաթևն եմ, ասում են «երևի» թևեր եմ տալիս: Մասնագիտական ընտրությունս ՝դերասանուհի:

Ես կին եմ, որը սիրում է շեշտել իր կին լինելը, որովհետև կինը ուժի և իմաստության մարմնացում է ինձ համար։

Բայց վերջիվերջո մենք բոլորս պարզապես մարդ ենք։

սերը եկավ…

…ու Ռոմեոն և Ջուլլետը հասկացան, որ իրենց վերջը եկել է։ Իսկ եթե լուրջ, սերը եկավ ու ես ողջ աշխարհը սիրեցի։ Ինքս ինձ ասացի՝ գնա փորձության հետևից։

իսկ հետո այն դարձավ…

…անհրաժեշտություն ու ստեղծագործություն։

կենցաղն ու հոգսերը, գործերն ու վազքը…

…փորձում են պոկել ինձ սիրուց, բայց ես կառչում եմ ատամներով, քարշ տալիս հետս սերը։

բայց ամեն դեպքում…

…լավ է, որ սերը երբեմն հարվածում է դեմքիդ ու ասում՝ գնում եմ։

իմ սերը նման է…

…մորս։

Ու իրականում սերը երբեմն բարձր նոտաներ է վերցնում, ցածր շշունջներով խոսում…

…բայց ես ուզում եմ ինքը միշտ գոռա ու հակառակվի իմ էգոյի ու հպարտության հետ։

երբեմն էլ այն լռում է…

…ու ես հասկանում եմ, որ մեռնում եմ մի փոքր։

իրականում ամեն բան ավելի հեշտ է, քան մենք ենք պատկերացնում…

…բայց մենք սիրում ենք դրամաններ։

սիրո մասին էնքան է խոսվել ու խոսվում…

…որ լռություն եմ սկսում սիրել։

սերը մեր հոգու սնունդն է, այն սնունդը, որին էլ է սնունդ պետք…

…բայց երբեմն սոված մնալուց հետո ավելի հաճելի է դառնում սնվելը։