Թոմաս Էլիոթի «Մոխրոց չորեքշաբթի» - VNews
    • Մշակույթ Vnews

      Մշակութային նորություններ Հայաստանից և աշխարհից

Թոմաս Էլիոթի «Մոխրոց չորեքշաբթի»

Այսօր լրանում է անգլո-ամերիկացի բանաստեղծ, Նոբելյան մրցանակի դափնեկիր  Թոմաս Էլիոթի 131 ամյակը:

Լինելով նման բարձր մակարդակի պոետ, Էլիոթը համեմատաբար փոքրաթիվ բանաստեղծություններ է գրել։ Տարեկան ընդամենը երկու-երեք բանաստեղծություն էր հրատարակում: Իր նամակներից մեկում խոստովանում է. «Լոնդոնում իմ համբավն ստեղծվել է բանաստեղծությունների մի փոքրիկ հատորյակի հիման վրա,»: Որպես կանոն՝ Էլիոթն իր բանաստեղծությունները սկզբում տպագրում էր պարբերականներում կամ գրքույկներում, այնուհետև բոլորը ներառում էր մեկ գրքում։ Նրա առաջին ժողովածուն վերնագրված է «Պրաֆրոկ և այլ դիտարկումներ»։ 1925 թվականին նա ժողովում է “Ամայի երկիր” ժողովածուի և “Պրաֆրոկի” բանաստեղծությունները մեկ հատորում և ավելացնելով «Դատարկ մարդը» ՝ կազմում է «Բանաստեղծություններ»։

Ձեր ուշադրությանն ենք ներկայացնում Թոմաս Էլիոթի «Մոխրոց չորեքշաբթի» բանաստեղծությունը՝ Սամվել Մկրտչյանի թարգմանությամբ:

Որովհետև ես հույս չունեմ կրկին վերադառնալ
Որովհետև ես հույս չունեմ
Որովհետև ես հույս չունեմ դառնալ
Երանի տալով մեկի հմտությանն ու մյուսի խելքին
Չեմ ձգտում ձգտելու դեպի այս ձևերը
(Ինչո՞ւ ծեր արծիվը տարածի թևերը)
Եվ ինչո՞ւ ողբալ
Հասարակ իշխանության ուժը կորուսյալ

Որովհետև ես հույս չունեմ ճանաչել կրկին
Հաջողակ ժամի փառքը անհաստատ
Որովհետև գիտեմ որ չեմ ճանաչի
Միակ զորությունը անցողիկ և հաստատ
Որովհետև ես չեմ կարծում
Թե կխմեմ այնտեղ, որտեղ ծառեր են ծաղկում,
աղբյուրներ հոսում, քանզի չկա ոչինչ

Որովհետև գիտեմ որ ժամանակը ժամանակ է միշտ
Իսկ վայրը` միշտ և միմիայն վայր
Եվ այն ինչ ընթացիկ է, ընթացիկ է մի ժամանակի և ճիշտ
Մեկ վայրի համար
Հրճվում եմ որ իրերն այնպիսին են, ինչպիսին կան
Եվ ուրանում եմ օրհնված դեմքը
Եվ ձայնն եմ ուրանում
Որովհետև ես հույս չունեմ վերադառնալ կրկին
Ուստի հրճվում եմ, կառուցելով միշտ ինչ-որ բան
Եվ հրճվում վրան
Եվ աղոթում Աստծուն որ գթա մեզ
Հարցերը որոնք բազմիցս քննարկում եմ ես

Եվ բացատրում, ինքս ինձ հետ
Որովհետև ես հույս չունեմ կրկին դառնալ ետ
Թող այս բառերը տան պատասխանը
Եղածի համար, որ չկրկնվի եղածն այսուհետ
Թող թեթև լինի ահեղ դատաստանը
Որովհետև ճախրելու թևեր չեն այս թևերը տոչոր
Այլ հովհարներ որոնք գիտեն ծեծել օդն ու տոկալ
Օդը որ հիմա ամբողջովին փոքր է ու չոր
Ավելի փոքր ու չոր քան կամքը նանիր
Ուսուցանիր մեզ հոգալ և չհոգալ
Մեզ հանգիստ նստել ուսուցանիր:

Մեղապարտներիս համար աղոթիր հիմա և մեր մահվան ժամին
Աղոթիր հիմա և մեր մահվան ժամին


Արմեն Տիգրանյան

Չարենցի և Իսահակյանի ընկերությունն ու Չարենցի վերջին բանաստեղծությունը

Պետրոս Դուրյանն ասել է…

Սիփան Շիրազ [բանաստեղծի բանաստեղծ որդին]

Ֆրանսիական պոեզիան հայերեն. Ժակ Պրևեր

Արթուր Մեսրոպյան. Թռչող տունը [բանաստեղծություններ]

Ես Հենրիկ Էդոյանն եմ…

Խուլիո Կորտասար. բանաստեղծություններ ու սեր

Սիլվա Կապուտիկյան. կանացի հույզերի, հույսերի, սիրո ու ցավերի պոետը

5 երգ հայ պոետների երգեցիկ բանաստեղծություններով

Նիկոլ Փաշինյանը բանաստեղծություն էլ է գրում

Մարո Երկնափեշյան. Մի քիչ էլ բեր ոտքս կախ գցեմ ու գնամ

Ես Կարեն Անտաշյանն եմ…