Վանաձորում տոն է…

Հոկտեմբերի 26-ին հանրապետության մեծությամբ երրորդ քաղաքի՝ Վանաձորի տոնն է. լավ առիթ ծառաշատ քաղաքի աշունը վայելելու, մաքուր օդ շնչելու, տեղի յուրահատուկ կոլորիտի, բարբառի ու ոչ պակաս յուրահատուկ մարդկանց հետ ծանոթանալու համար:

Իսկ եթե չգիտեք՝ տոնակատարությունից զատ էլ ինչով լցնել ձեր օրը, մենք կհոգանք այդ մասին:

1.ՎՏԿ

Այցելե՛ք Վանաձորի Տեխնոլոգիական Կենտրոն՝ խելացի ու կրեատիվ մարդկանց ու ժամանակակից ճարտարապետություն տեսնելու:

2.«Լաչինի միջանցք»

Հարակից գյուղերից՝ էլ միրգ-բանջարեղեն, էլ թարմ միս, էլ կաթ ու մածուն: Մի պահ թեքվեք դեպի շուկա համով ու կոլորիտային գնումների:

3. «Թթու ջուր»

Մի՞թե դուք կարող եք բաց թողնել անմիջապես աղբյուրից հոսող  հանքային ջուր խմելու հնարավորությունը: Վանաձորի «Թթու ջուր»-ը չի շշալցվում, չի վաճառվում, այնպես որ՝ գնացեք ու վայելեք:

4. «Վանաձոր-Արմենիա»-ի այգի

Դեռևս Խորհրդային տարիներից հայտնի առողջարանի այգին տարվա այս եղանակին յուրահատուկ գեղեցիկ է, այստեղ աշունն՝ իր ողջ գունապնակով ձեզ է սպասում:

5.Հին եկեղեցի

Նարնջագույն ու սև տուֆից կառուցված Սուրբ Աստվածածին եկեղեցին վանաձորցիների հպարատանլու ևս մի առիթ է:

6.ԶԱԳՍ-ի շենք

Հին ու անբերակարգ, բայց անսահման սիրուն ու տեսարժան այս շենքն այժմ լքված է և անգամ չի հսկվում: Եթե ժամանակ ունենաք և ներս գնանք կարող եք գտնել հին փաստաթղթեր ու հարսանեկան լուսանկարներ:

7.«Թայիրովի դաչա»

1850-ականների շինություն է, կառուցվել է հայ մեծահարուստներ Թայիրովների կողմից, այսօր այստեղ Գուգարաց թեմի առաջնորդարանն է:

8.Կերպարվեստի թանգարան

Շուրջ 2000 թանգարանային նմուշներ` գեղանկար, գրաֆիկա, քանդակ, դեկորատիվ-կիրառական արվեստի նմուշներ: Առանձնահատուկ է քանդակի բաժինը, որտեղ քանդակագործական արվեստի աշխատանքները ներկայացվում են գրաֆիկայի հետ համատեղ:

9.Հայքի Հրապարակ

Հայքի Հրապարակում են գտնվում քաղաքապետարանի և մարզպետարանի շենքերը, քաղաքի խորհրդանիշներից մեկը դարձած «Գուգարք» հյուրանոցը: Երեկոյան կարող եք մասնակցել գլխավոր տոնական միջոցառմանը: Ինչպես նաև հնարավորություն կունենաք տեսնելու տարածաշրջանում նախադեպը չունեցող նոր լուսաձայնային շատրվանները:

10.«Թեյնիկ»

«Թեյնիկ» հակասրճարանը վանաձորյան երեկոն տեղացիների հետ անցկացնելու՝ շփվելու, խաղալու, թեյելու լավագույն տարբերակներից է:

11.«Solenoid»

Դե իսկ եթե ավելի ակտիվ հանգստի սիրահար եք երեկոն անցկացրեք Հայքի հրապարակի հարևանությամբ գտնվող փաբում: