fbpx
    • Մշակույթ Vnews

      Մշակութային նորություններ Հայաստանից և աշխարհից

Զրուցեցինք ուկրաինական Harper’s Bazaar-ի խմբագիր Անտոն Երեմենկոյի հետ

Օրերս Հայաստանում մեկնարկեց “Fashion Forum 2018”-ը, որի շրջանակներում արտասահմանցի և հայ դիզայներները, լրագրողները և նորաձևության ոլորտի ներկայացուցիչները կիսվեցին մեզ հետ իրենց գիտելիքներով ու փորձով:
Զրուցեցինք ուկրաինական Harper’s Bazaar ամսագրի խմբագիր Անտոն Երեմենկոյի հետ:

Անտոն, Դուք աշխատել Եք  “FW-daily”-ում և “Nowfashion.com”-ում: Այժմ Դուք հեղինակավոր Harper’s Bazaar Ukraine-ի խմբագիրն Եք: Ինչպե՞ս հայտնվեցիք ամսագրի խմբագրի կարգավիճակում:

Անկեղծ ասած, ամեն ինչ սկսվեց 9 տարի առաջ: Այն ժամանակ նորաձևության մասին բլոգ էի վարում և բախտի բերմամբ, թե պատահմամբ “Fashion Week Daily”-ից պրակտիկայի առաջարկ ստացա: Մեծ հաճույքով համաձայնվեցի: Ի սկզբանե նախատեսվել էր, որ 2 շաբաթ տևողությամբ պրակտիկա եմ անցնելու, սակայն արդյունքում 5 տարի աշխատեցի այնտեղ: Սկզբում հասարակ պրակտիկանտ էի, այնուհետև լրագրող, խմբագիր և գլխավոր խմբագիր: Այսինքն, այդ 5 տարիների ընթացքում մի քանի հաստիք եմ փոխել:

Հիմա էլ պատմեմ Bazaar-ից (ժպտում է): Իրականում, նորաձևության ոլորտում երկար տարիներիս փորձը տվեց իր պտուղները: Ես շատ լայն շրջապատ ունեի և տեղյակ էի, թե ով է թելադրում խաղի կանոնները: Այն ժամանակ Bazaar-ի խմբագիրը Աննա Զեմսկովան էր, և մեր ընդհանուր ընկերներից մեկի կողմից կազմակերպված երեկույթի ժամանակ նա մոտեցավ ինձ և հարցրեց. «Անտոն, գիտե՞ս որևէ մեկին, ով կցանկանա և ունակ կլինի ամսագրի խմբագրի պաշտոնը զբաղեցնել»: Ես պատկերացում էլ չունեի, թե ում առաջարկեմ, սակայն մի քանի օր հետո սոցիալական ցանցով գրեցի Աննային և առաջարկեցի իմ թեկնածությունը: Եկա խմբագրություն, ստացա թեստային առաջադրանք, հաջողությամբ գլուխ հանեցի դրանից և ընդունվեցի աշխատանքի: Այսքանը:

Հայկական նորաձևության ոլորտի վիճակն այդքան էլ վատը չէ, սակայն ինչպես ուկրաինականն, այնպես էլ հայկականը պետք է անընդհատ ձգտի կատարելության:

Անտոն, դժվարություններ կայի՞ն:

Իհարկե, կային, քանի որ նախկինում ես օնլայն մեդիայում էի աշխատում, իսկ ամսագիրը տպագիր մամուլ է և աշխատանքի կառուցվածքն այստեղ ամբողջովին այլ էր: Ոչ մի գլոբալ խնդրի հետ չեմ բախվել այսքան ժամանակ, սակայն դժվար էր այն տեսանկյունից, որ ի տարբերություն օնլայն մեդիայի, որտեղ տեքստերի վերաբերյալ ոչ մի սահմանափակում չկա, տպագիր մամուլում այն որոշակի սահմանափակումների առաջ է կանգնում: Օրինակ, եթե գեղարվեստական ղեկավարն ասում է, որ նյութդ պետք է 2200 սիմվոլից բաղկացած լինի, ապա դու պետք է ջանք չխնայես, որ ասելիքդ տեղ հասցնես, տեղավորվելով 2200 սիմվոլի մեջ:

Բացի այդ ամսագիրն այլ կերպ է աշխատում: Bazaar-ն ասես մեքենա լինի, այսինքն՝ յուրաքանչյուր ոք պատասխանատու է միայն իր աշխատանքի համար և չպետք է միջամտի դիմացինի աշխատանքին: Միակ դժվարությունը նոր համակարգին հարմարվելու մեջ էր:

Անտոն, 2008 թ. հիմնադրվեց ուկրաինական Bazaar-ը և այդ պահից ի վեր ամսագրի խմբագիրներն են եղել Նատալյա Գուզենկոն և Աննա Զեմսկովան:  Դուք քաջատեղյակ Եք ամսագրի զարգացման ողջ պատմությանը: Ասացեք խնդրեմ, ի՞նչ փոփոխությունների է ենթարկվել այն այս ողջ ընթացքում և  ի՞նչ փոփոխություններ Եք մտցրել Դուք:

Գիտեք, իրականում հայրենական շուկայում առկա բոլոր ամսագրերից Harper’s Bazaar-ը միկն է, որն  առաջին հերթին շեշտը դնում է ուկրաինական նորաձևության վրա և օժանդակում է ուկրաինացի դիզայներներին, և նույնիսկ երիտասարդ տաղանդների համար մրցույթներ է կազմակերպում:
Իրականում ես դժվարանում եմ խոսել իմ ներդրման մասին. ավելի լավ է գործընկերներիս հարցնեք այդ մասին (ժպտում է):

Harper’s Bazaar-ը դասական գեղեցկության մասին է:

Բնականաբար իմ լուման ունեցել եմ ամսագրի հաջողության հասնելու հարցում: Օրինակ ես պնդում էի, որ մենք կայքի կարիք ունենք, քանի որ այն միայն անցած տարի ստեղծվեց: Բացի այդ ես միշտ պաշտպանում եմ մեր սեփական կոնտենտը և վստահ եմ, որ այն պետք է սեփական ուժերով անել: Մենք անընդհատ կատարելագործվում ենք, ստեղծում ենք որակյալ կոնտենտ և շեշտադրում ենք նորարարությունների կարևորությունը:

Անտոն, հետաքրքիր է կոնտենտն ինչպե՞ս եք պատրաստում, այսինքն՝ ինքներդ եք ամբողջը ստեղծում, թե վերցնում եք մյուս երկրների Harper’s Bazaar-ից:

Գիտեք, երբեմն վերցնում ենք, քանի որ ամսագրի մանրակրկտորեն մշակված համակարգը թույլ է տալիս բոլոր երկրների խմբագրություններին համագործակցել և անվճար կիսվել նյութերով:
Օրինակ այժմ մենք բրիտանացի մոդել Ալեքսա Չանգի հետ “cover story” ենք անում, իսկ իսպանական Bazaar-ը դիմել է մեզ, նկարահանումներն ու հարցազրույցը վերատպելու թույլտվություն ստանալու համար:Ամսագրի քաղաքականությունն այնպիսին է, որ մենք կարող ենք որոշ նյութեր վերցնել մեր «ընկերներից», սակայն նյութի գերակշիռ մասը՝ 80 %-ը մենք ենք ապահովում:

Անտոն, հետաքրքիր է, թե ինչպե՞ս են անցնում Harper’s Bazaar-ի խմբագրի՝ Անտոն Երեմենկոյի աշխատանքային և հանգստյան օրերը: 

Ես շուտ եմ արթնանում,  սլանում եմ մարզասրահ, ինչից հետո վերադառնում եմ տուն և ուղևորվում եմ աշխատանքի: Աշխատավայրում հիմնական ժամանակս անց եմ կացնում  համակարգչի դիմաց. աշխատում եմ մինչև ժամը 7-ը, իսկ գործից հետո հանդիպում եմ ընկերներիս հետ: Այս ամենը կրկնվում է ամեն Աստծո օր:
Հանգստայան օրերի դեպքում պատկերն այլ է: Պատահում է, որ տրամադրություն չեմ ունենում, չեմ ցանկանում վեր կենալ անկողնուց, կամ վեր եմ կենում և քայլում եմ տան մեջ, ֆիլմեր եմ դիտում կամ գրքեր եմ ընթերցում: Լինում է իհարկե, այնպես, որ հանգստյան օրերին էլ եմ աշխատում, մասնակցում եմ սեմինարների, միջոցառումների, հանդիպումների:

Անտոն, կպատմեք մի փոքր ի՞նչ է մտնում խմբագրի պարտականությունների մեջ: 

Հմ (մտածում է), ես պետք է հերոսների գտնեմ, կապ հաստատեմ վերջիններիս հետ: Այսինքն, եթե ես ցանկանում եմ օրինակ հարցազրույց անցկացնել որևէ հայտնի ամերիկացի դիզայների հետ, ես պետք է անեմ ամեն հնարավոր և անգամ անհնարին բան, որ վերջինիս հետ հանդիպումը կայանա: Բացի այդ ես ուսումնասիրում եմ տենդենցները և փորձում եմ հասկանալ,թե ինչն է նորաձև, ինչը՝ ոչ: Ինչպես նաև զբաղվում եմ ոճաբանությամբ, հետաքրքիր թեմաներ եմ առաջարկում, գովազդատուների համար հատուկ նախագծեր եմ մտածում,  երբեմն անգամ մարքեթինգի տնօրենների հետ եմ հանդիպումներ ունենում: Այսքանը (ժպտում է):

Մրցակցությունը նպաստում է ամսագրի զարգացմանը: 

Անտոն, կարո՞ղ Եք գնահատել նորաձևության ոլորտն Ուկրաինայում: 

Այսպես ասեմ, ոլորտը կա, սակայն այն թերահաս է, քանի որ վերջերս է «ծնվել» (ծիծաղում է): Անկեղծ ասած, մեր բախտը բերել  է, քանի որ բավականաչափ գովազդատուներ ունենք և հենց նրանց շնորհիվ էլ մեդիա դաշտը գոյատևում է: Իր հերթին մեդիան հոգ է տանում դիզայներների մասին: Իրականությունն այնպիսին է, որ մենք շատ դիզայներներ ունենք, բայց ոլորտը շարունակում է կայուն կերպով զարգանալ, սակայն, մենք քաջ գիտակցում ենք, որ չպետք է հույս ունենանք, որ կհասնենք ամերիկյան կամ բրիտաանական նորաձևության ոլորտներին: Այնուամենայնիվ կարող եմ վստահեցնել ձեզ, որ ճիշտ ուղղությամբ ենք շարժվում:

Անտոն, արդեն մի քանի օր է ինչ Հայաստանում Եք: Կարո՞ղ Եք հայկական նորաձևության ոլորտին մոտավոր գնահատական տալ:

Վահան Խաչատրյանի շնորհիվ ես մի փոքր ծանոթ եմ հայկական նորաձևության ոլորտին, բայց 2-3 օրը շատ քիչ է, որ գնահատեմ այն, քանի որ ես չեմ հասցրել խանութներով շչջել: Օրինակ օդանավակայանում աչքս ծագեց “LaGalleria” խանութի գովազդը, սակայն ես այդպես էլ չհասցրեցի մտնել այդ խանութ: Ընդհանուր առմամբ հայկական նորաձևության ոլորտի վիճակն այդքան էլ վատ չէ, սակայն ինչպես ուկրաինականը,  այնպես էլ հայկականը պետք է անընդհատ ձգտի կատարելության և շարունակի զարգանալ:

Եկեք խոսեք մրցակցությունից: Harper’s Bazaar-ին հաջողվո՞ւմ է մրցակցել մյուս ամսագրերի հետ և ո՞րն է վերջինիս մրցակցային առավելությունը: 

Ես վստահորեն կարող եմ ասել, որ Harper’s Bazaar-ը դասական գեղեցկության մասին է և մենք շատ լավ գիտակցում ենք, թե մեր ընթերցողներն ովքեր են և ինչ են ակնկալում մեզանից: Մենք այնքան էսթետիկ ձևով ենք շեշտադրում այդ գեղեցկությունը, որ գովազդատուները միշտ «կախարդվում» են դրանով: Ի տարբերություն Vogue-ի մենք խոսում ենք դասական գեղեցկության լեզվով:
Բացի այդ, իհարկե մրցակցություն կա, և ասեմ որ այն նպաստում է ամսագրի զարգացմանը:

Անտոն, ո՞ր ամսագիրն է համարվում համար 1-ը Ուկրաինայում:

Ասեմ, որ Vogue-ը շատ գրագետ կոնտենտ է ստեղծում, բայց ինձ համար առաջին տեղում է Bazaar-ը, քանի որ այն պատմություն ունի, այն նորաձևության մասին առաջին ամսագիրն է, և եթե բառերն իրենց անուններով անվանենք, ապա իմացեք, որ ամսագիրն իր այսօրվա տեսքի համար պարտական է Bazaar-ի գեղարվեստական տնօրեն Ալեքսեյ Բրոդովիչին:
Մենք գնահատում ենք ամսագրի անցյալը, փորձում ենք պահել ու պահպանել վերջինիս արժեքները: Ես դժվարանում եմ տալ ուկրաինական «համար 1» ամսագրի անունը, քանի որ ամսագրերը բազմազան են և նրանցից յուրաքանչյուրը գտել է իր տեղնու դերը շուկայում և շարունակում է զարգանալ: Բոլոր ամսագրերն էլ զիլ են, բայց Bazaar-ը իմ սիրելին է:

 

Անտոն, մտահղացումները ո՞նց են ծագում, ինչի՞ց Եք ոգեշնչվում: 

Ես պարզապես անում եմ այն, ինչն իրոք ինձ հետաքրքրում է և կարծում եմ, որ այն հետաքրքրում է նաև մեր ընթերցողներին: Կստեմ, եթե ասեմ, որ նստոմ ու սպասում եմ ոգեշնչմանը, քանի որ, եթե դու պրոֆեսիոնալ ես, դու չպետք է սպասես, թե երբ ես ոգեշնչվելու, որ ստեղծագործես, այլ ինքդ քեզ պետք է ստիպես, ոգեշնչես, ուժ տաս և աշխատես, որ բոլոր նյութերդ  լավը լստացվեն: Իրականում ոգեշնչվածությունն ուղղակի հասկացություն է, և դու պարզապես պետք է բաց լինես մարդկանց և աշխարհի առջև և միշտ հետևես, թե ինչ է կատարվում շուրջբոլորդ:

Այժմ ի՞նչ համարի վրա է աշխատում Harper’s Bazaar-ի ողջ անձնակազմը և հայտնիներից ո՞ւմ հետ կցանկանայիք համագործակցել: 

Այժմ սեպտեմբերյան համարի վրա ենք աշխատում, վերջացրել ենք հուլիս-օգոստոս ամիսների համար նախատեսված համարը: Կազմի վրա բրիտանացի մոդել Ալեքսա Չանգն է, որը հագուստի հավաքածու ունի: Հարցի երկրորդ հատվածին դժվարանում եմ պատասխանել, քանի որ շատ շատերի հետ կցանկանայի համագործակցել (ժպտում է): Օրինակ Անյա Ռուբիկի հետ կաշխատեի, կամ կազմի վրա կուզենայի տեսնել 79-ամյա մոդել Վերուշկային: Նա մի անբացատրելի կին արարած է: Հմ (մտածում է), կար ժամանակ, որ տարված էի «Շատ տարօրինակ բաներ» հեռուստասերիալով և կցանկանայի համագործակցել սերիալի գլխավոր աստղ Միլի Բոբի Բրաունի հետ:

Մենք ճիշտ ուղղությամբ ենք շարժվում:

Սկսնակ լրագրողներին և բոլոր նրանց, ովքեր ցանկանում են մուտք գործել նորաձևության ոլորտ, ի՞նչ կմաղթեք: 

Լրագրողներին խորհուրդ եմ տալիս խորասուզվել բոլոր այն թեմաների մեջ, որոնք ցանկանում են լուսաբանել: Խորհուրդ եմ տալիս ընթերցել Նորա Գալի «Ողջ և մահացած խոսք» գիրքը և իհարկե շատ աշխատել, քանի որ այս ոլորտը շատ պահանջկոտ է և այստեղ ամեն ինչ կատարյալ պետք է լինի: Հենց դրանով էլ պայմանավորված պետք է շատ աշխատել, հատկապես, երբ նոր ես սկսում ուղիդ:Այսքանը (ժպտում է):

Զրուցեց Մարիամ Սուքիասյանը
Լուսանկարեց Պետրոս Հովհաննիսյանը
Վայր՝ TUMO

 

 


Ռիհաննա լինելու արվեստը. Երգչուհու արվեստոտ ֆոտոշարքը BAZAAR-ի համար

Ջենիֆեր Լոպեսը BAZAAR ամսագրի նոր շապիկին է (լուսանկարներ)

Զրուցեցինք Հայկ Կարոյի Կարապետյանի հետ

Զրուցեցինք Նարինե Դովլաթյանի հետ

Զրուցեցինք Արտյոմ Մանուկյանի հետ

Անժելա Սարաֆյանը Bazaar-ի հետ խոսել է «Westworld»-ի մասին (ֆոտոշարք)

#ПосиделиПоговорили с редактором Harper’s Bazaar Ukraine Антоном Еременко

Զրուցեցինք Արեգ Բալայանի հետ

Զրուցեցինք Արշալույս Հարությունյանի հետ

Զրուցեցինք Ամիրյան Միշի հետ

Զրուցեցինք Տաթև Հովակիմյանի հետ

Էնդի Ուորհոլ. անմահ անուն