Երիտասարդականի 2-րդ լավագույն մեկնարկը պատմության մեջ. Ինչո՞ւ է այն տպավորիչ

Հայաստանի երիտասարդական հավաքականը բավական հաջող է սկսել 2019թ. Եվրոպայի երիտասարդական առաջնության ընտրական մրցաշարը: Ընտրական 7-րդ խմբում հանդես եկող մեր ֆուտբոլիստները մեկնարկային խաղում հյուրընկալվելիս 3-0 հաշվով հաղթել էին Ջիբրալթարի հավաքականին, իսկ օրեր առաջ Մոսկվայում գոլազուրկ ոչ-ոքի ավարտեցին հանդիպումը խմբի ֆավորիտ համարվող Ռուսաստանի ընտրանու հետ:

Նշենք, որ ընտրական մրցաշարերում դա Հայաստանի և Ռուսաստանի երիտասարդական հավաքականների միջև կայացած 3-րդ հանդիպումն էր: Նախկինում նրանց ճանապարհները հատվել էին 2000թ. ընտրական մրցաշարում:

Երկու հանդիպումներն էլ անհաջող էին մեր ֆուտբոլիստների համար: 1999թ. մարտի 27-ին Գյումրիում կայացած խաղում Վարուժան Սուքիասյանի սաները 0-2 հաշվով պարտություն կրեցին: Իսկ մրցակցի հարկի տակ Հայաստանի հավաքականը 6 անպատասխան գնդակ ընդունեց սեփական դարպասը: 2000թ. ընտրական մրցաշարում մեր հավաքականը 4 միավորով 5 ընտրանիների մրցավեճում եզրափակել էր մրցաշարային աղյուսակը:

ՀՀ երիտասարդական հավաքականը 2 խաղում վաստակած 4 միավորով ընտրական 7-րդ խմբի առաջատարն է: Մեր ֆուտբոլիստները հիանալի հնարավորություն են ստացել զարգացնելու հաջողությունը, քանի որ առաջիկա երեք հանդիպումներն անցկացնելու են սեփական հարկի տակ՝ հաջորդաբար մրցելով Մակեդոնիայի (սեպտեմբերի 5-ին), Ջիբրալթարի (հոկտեմբերի 2-ին) և Ռուսաստանի (նոյեմբերի 10-ին) հավաքականների հետ:

Հայաստանի երիտասարդական հավաքականի համար 2019թ. Եվրոպայի երիտասարդական առաջնության ընտրական մրցաշարը 13-րդն է: 2 տուրից հետո գրանցած ցուցանիշը երկրորդն է հավաքականի պատմության մեջ:

Ավելի հաջող մեր երիտասարդ ֆուտբոլիստները մեկնարկել են միայն 2013թ. ընտրական մրցաշարում՝ Ռաֆայել Նազարյանի գլխավորությամբ տոնելով երկու անընդմեջ հաղթանակ: Մեկնարկային խաղում Հայաստանի հավաքականը սեփական հարկի տակ 4-1 հաշվով վստահ հաղթանակ էր տարել Չեռնոգորիայի ընտրանու նկատմամբ, ապա հյուրընկալվելիս պարտության էր մատնել Անդորրայի ֆուտբոլիստներին (1-0):

Մեկնարկային երկու հանդիպումներում մեր ֆուտբոլիստներին հաջողվեց անառիկ պահել սեփական դարպասը: Այդ ցուցանիշով երիտասարդական հավաքականի մեկնարկը լավագույնն է:

Ընտրական մրցաշարերում Հայաստանի երիտասարդական հավաքականին 4-րդ անգամ հաջողվեց երկու խաղ անընդմեջ դարպասն անառիկ պահել: Առաջին  անգամ դա հաջողվել էր 2001թ. Բելառուսի (1-0) և Լեհաստանի (2-0) հավաքականների հետ սեփական հարկի տակ անցկացրած հանդիպումներում, որոնցում մեր ֆուտբոլիստների գործողությունները ղեկավարում էր Անդրանիկ Ադամյանը:

Սամվել Պետրոսյանի գլխավորությամբ ՀՀ հավաքականին հաջողվել է դարպասն անառիկ պահել Նորվեգիայի և Լիխտենշտեյնի ընտրանիների հետ հանդիպումներում, որոնցում մեր ֆուտբոլիստները հաղթել են միևնույն 1-0 հաշվով:

2013թ. ընտրական մրցաշարում էլ Ռաֆայել Նազարյանի օրոք հավաքականը գոլ բաց չի թողել Ուելսի (1-0) և Չեռնոգորիայի (0-0) ընտրանիների հետ խաղերում:

Իսկ եթե հաշվի առնենք, որ ընտրական մրցաշարի մեկնարկից առաջ ՀՀ երիտասարդական հավաքականն ընկերական խաղում 1-0 հաշվով հաղթել էր մոլդովացիներին, ապա ստացվում է, որ արդեն 3 խաղ անընդմեջ մեր ընտրանին Արթուր Ոսկանյանի գլխավորությամբ գոլ բաց չի թողել:

Նման արդյունքի երիտասարդական հավաքականում հաջողվել է հասնել միայն Աբրահամ Խաշմանյանին: 2013թ. նոյեմբերին ՀՀ հավաքականը մրցակցի հարկի տակ ընտրական մրցախաղում 1-0 հաշվով հաղթել էր Բելառուսի ընտրանուն, իսկ հաջորդ տարվա օգոստոսին Իրանի հավաքականի հետ Երևանում անցկացրած ընկերական երկու հանդիպումներում էլ դարպասն անառիկ էր պահել (1-0, 0-0):

VivaroNews.am-ը ներկայացնում է Եվրոպայի երիտասարդական առաջնության ընտրական մրցաշարերում Հայաստանի երիտասարդական հավաքականի գրանցած արդյունքները մեկնարկային երկու խաղերում:

Աշոտ Հայրապետյան

Միացի՛ր հայկական ամենասպորտային Instagram-ին: