fbpx

Լրացուցիչ

«Ջիո՜ւվե, Ջիո՜ւվե…». Ինչպե՞ս և ինչո՞ւ Ռոնալդուն տեղափոխվեց «Յուվենտուս»

Մինչ Մեսին ամռանն այդպես էլ չկարողացավ իր անվանը լեգենդի հնչեղություն տալ Կատալոնիայից բացի գոնե իր հարազատ Արգենտինայում, արդեն իսկ 3 երկրներում հերոսացած Ռոնալդուն 33 տարեկանում ճանապարհ ընկավ նվաճելու նաև Իտալիան:

«Իմ տարիքի ֆուտբոլիստները, ամենայն հարգանքով նրանց նկատմամբ, գնում են Չինաստան կամ Քաթար: Ուստի այսպիսի մեծ ու հիասքանչ ակումբ գալը ինձ երջանկացնում է: Շնորհակալ եմ «Յուվենտուսին» այս հնարավորության համար»,- նշեց Ռոնալդուն նոր ակումբում իր ներկայացման ժամանակ՝ հիշեցնելով նաև, որ նա արդեն 33 տարեկան է, ոչ 23:

Այնուամենայնիվ, տարիքը չխանգարեց «Յուվենտուսի» ղեկավարությանը բավականին արագ ու վստահ, աշխարհի առաջնության շղարշում, առանց նյարդեր կրծող ձևականությունների ձևակերպել իր պատմության ամենամեծ ձեռքբերումը:

Ինչքա՞ն արժեցավ աշխարհի լավագույն ֆուտբոլիստը

Հաշվի առնելով, որ նախորդ տրանսֆերային ռեկորդով «Ծեր սենյորան» ընդամենը 10 մլն էր պակաս վճարել Գոնսալո Հիգուայինի համար, այս գնով «Ոսկե գնդակի» 5-ակի հաղթողի Թուրին բերելը ֆանտաստիկ գործարքի տպավորություն է ստեղծում:

«Ֆուտբոլիստը 60 գոլ է խփում մրցաշրջանում, իսկ նրան գնահատում են 100 մլն եվրո: Ու նույնիսկ եթե նրա դիմաց 1 մլրդ վճարեին, դա պատմական սխալ էր «Ռեալի» համար»,- գործարքից անմիջապես հետո հայտարարեց «Ռեալի» նախկին նախագահ Ռամոն Կալդերոնը, ում հեռանալուց հետո էլ 2009թ. Պերեսը Ռոնալդուին բերել էր Մադրիդ:

100 մլն եվրո «Ռեալին», + 5-ական մլն եվրո նախկին ակումբներին, այս գումարը «Յուվենտուսը» վճարելու է առաջիկա 2 տարվա ընթացքում: Ավելի բարդ է պորտուգալացու աշխատավարձային բյուջեն ապահովելը՝ տարեկան 30 մլն եվրո հարկումից հետո, ինչը նշանակում է որ պայմանագրի 4 տարիների ու ձեռքբերման դիմաց «Յուվեն» վճարելու է ընդհանուր առմամբ 345 մլն եվրո:

Գործարքի մասին առաջին լուրերից հետո «յուվենտինոների» շրջանում խուճապ տարածվեց, թե այսպիսի ծախսը կարող է թիմին ստիպել վաճառել առաջատարներին, մասնավորապես Պաուլո Դիբալային և Միրալեմ Պյանիչին: Հիմա արդեն պարզ է, որ Ռոնալդուն, ընդհակառակը, կնպաստի, որ բոլորն առանց որևէ ֆինանսական քմահաճույքների մնան Թուրինում ու խաղան աշխարհի լավագույն ֆուտբոլիստի կողքին: Իսկ վաճառել, թերևս, ստիպված լինեն միայն Գոնսալո Հիգուայինին, որը կարող է մոտ 60 մլն եվրո ետ բերել ակումբի բյուջե: Եվ դրա կարիքն էլ չէր լինի, եթե չլինեին թուրինցիների մյուս երկու ձեռքբերումները՝ Ժոաո Կանսելու (40 մլն եվրո) և Էմրե Ջանը (30 մլն եվրո):

Մի քանի օր առաջ տեղեկատվություն ստացվեց, թե FIAT ավտոգործարանի աշխատողները դուրս են եկել բողոքի՝ ընդդեմ Ռոնալդուի թանկարժեք ձեռքբերման: Թուրինցիները շատ արագ հարթեցին խնդիրը՝ հայտարարելով նաև, որ ընդամենը 5 աշխատող է դուրս եկել բողոքի, ինչը աշխատակազմի նույնիսկ 1 տոկոսը չի կազմում: Այո, Անյելիների ընտանիքի ավտոգործարանները (իսկ նրանց պատկանում են շատ հայտնի բրենդեր՝ Ferrari, Maserati, Lancia, Alfa Romeo, Jeep) ընդամենը մի փոքր կավելացնեն իրենց ներդրումը ակումբում և ամեն ինչը տեղը կընկնի: Ի դեպ, «Յուվենտուսը» մինչ այս շատ քիչ էր օգտվում Անյելիների բիզնես-ներարկումներից ու ֆինանսապես գրեթե հասել էր ծախսածածկման:

Ակնկալվում է, որ Ռոնալդուի աշխատավարձի 2/3 մասը կփակվի Ferrari-ի հետ հովանավորչական պայմանագրի հաշվին, մնացած գումարն էլ կփոխհատուցվի մի քանի ֆուտբոլիստների վաճառքի հաշվին, որոնցից ուշադրության արժանի է միայն Հիգուայինի անունը: Ռոնալդուի տրանսֆերի հայտարարումից հետո 1 օրվա ընթացքում «Յուվենտուսը» 520 000 մարզաշապիկ է վաճառել, դա ընդամենը 39%-ով է քիչ «Ծեր սենյորայի» մարզաշապիկների վաճառքի ՏԱՐԵԿԱՆ ծավալից, ակումբի թվիթերն էլ 1 մլն նոր հետևորդ է հավաքել: Իտալացի ֆինանսիստների գնահատմամբ՝ Ռոնալդուն տարեկան հավելյալ 35 մլն եվրո կգեներացնի «Յուվենտուսի» համար: Եզրահանգումը մեկն է՝ սա ոչ թե ճոխություն էր, այլ իրական ներդրում:

Ներքուստ ցնծում է ամբողջ Իտալիան

«Ռոման» փորձեց Ռոնալդուի ձեռքբերումը ծաղրել սոցցանցերում, բայց դա ընդամենը առաջին ու հպանցիկ ռեակցիա է: Իրականում, այս ձեռքբերումից ուրախ են Ա սերիայի բոլոր ակումբները: Նրանցից ոչ մեկն էլ Ռոնալդուին ձեռք բերել չէր կարողանալու, ոչ էլ հնարավոր կլիներ գոնե առաջիկա տարիներին ունենալ «Յուվենտուսից» ավելի ուժեղ կազմ: Բայց այս ձեռքբերումով ամբողջ Ա սերիան վերականգնեց իր հեղինակությունը: Գուցե և մոտ 15-20 տարվա դադարից հետո այստեղ գալիս է (ոչ հայտնվում) աշխարհի լավագույն ֆուտբոլիստներից մեկը:

«Ռոնալդուի հետևից շատ աստղեր կցանկանան տեղափոխվել Ապենիններ, իսկ «Յուվենտուսը» Չեմպիոնների լիգան վերջապես հաղթելու լավ շանս է ստացել»,- նշել է բրազիլացի Կաֆուն, ով վերջին ներկայացուցիչներից է այն լեգենդար սերնդից, որ նախընտրում էր խաղալ Իտալիայում: «Յուվենտուսն», իրոք, այս ձեռքբերումով լրացուցիչ խաղաքարտեր բաժանեց Ա սերիայի բոլոր ակումբներին՝ բարձրակարգ ֆուտբոլիստների համար տրանսֆերային պայքարում: Չհաշված նաև համընդհանուր հետաքրքրությունը լիգայի նկատմամբ, որ թույլ կտա մեծացնել հեռուստատեսային լսարանը և լրացուցիչ գովազդային պայմանագրեր ձեռք գցել:

Ի՞նչ է տալու Ռոնալդուն «Յուվենտուսին»

Միակ բանը, որ «Յուվենտուսը» վերջին տարիներին չի կարողանում ունենալ, Չեմպիոնների լիգայի գավաթն է՝ մի բան, որ Ռոնալդուն ամենաշատը նվաճեց այդ նույն վերջին տարիներին: Բնականաբար, թուրինցիները Իտալիայում առանց այդ էլ խնդիրներ չունեին ու Սկուդետո հաղթելու համար նրանց Ռոնալդու պետք չէր:

Բայց Ռոնալդու նրանց բացի ՉԼ-ից պետք էր նաև վերջին տարիների ֆինանսական առղոջացումն ու վերելքը ավելի վիզուալ արձանագրելու համար: ՉԼ նախորդ խաղարկությունում «Յուվենտուսը» վաստակեց ավելի շատ, քան չեմպիոն «Ռեալը», թիմը մշտական տեղ ունի ամենամեծ բյուջե ունեցող ակումբների շարքում, բայց թոփ-ակումբների ցանկը թվելիս շատերը երբեմն մոռանում էին «Ռեալի», «Բարսելոնայի», «Բավարիայի», ՊՍԺ-ի ու «Մանչեսթեր Յունայթեդի» շարքերում նշել նաև «Յուվենտուսին»: Նման բան դուք այլևս չեք համարձակվի անել, որովհետև Ռոնալդուի ահարկու հայացքը անմիջապես կհայտնվի ձեր մտքում:

33 տարեկանը մեծ տարիք չէ Իտալիայում խաղալու համար, Տոտին ու Զանետին կհաստատեն, բայց մեծ հարց է նաև այն, թե ինչքան է իրականում Ռոնալդուի ֆիզիոլոգիական տարիքը: Խաղային առումով Կրիշտիանուն կասկածներ չի հարուցում, մոտիվացիայի հարցով նույնպես: Տակտիկական ֆուտբոլը պորտուգալացին բնորոշեց որպես նոր մարտահրավեր իր համար, ու համոզմունք հայտնեց, որ կկարողանա «Յուվենտուսին» նոր, ավելի բարձր մակարդակի հասցնել:

«Ջիո՜ւվե, Ջիո՜ւվե…». Ռոնալդուի շուրթերից հենց այսպես հնչեց իր նոր ակումբի անունը:

Ալեգրիի համար էլ սա նոր հորիզոն է՝ իր գաղափարների շառավիղը մեծացնելու և դրանց ձգտելու համար: Բայց միաժամանակ նոր, ավելի բարդ աշխատանք, հատկապես՝ հանդերձարանում: «Յուվենտուսը» Ռոնալդուին շքեղ ընդունելություն ցույց տվեց, բայց և դեռևս կարողանում է պահել չափը և թույլ չտալ մտածելու, թե որևէ մեկը կարող է լինել ավելի մեծ, քան ակումբը:

Դա ամեն գնով պետք է պահել նաև առաջիկայում. Ռոնալդուի էգոյի ու «Ծեր սենյորայի» բնավորության բախումները պետք է բացառել: Սա Իտալիա է, այստեղ երբեմն տիտղոսները այնքան կարևոր չեն, ինչքան արժեքներն ու սկզբունքները, այլապես «Յուվեն» չէր կարողանա 1996թ. ի վեր ՉԼ 5 եզրափակիչ պարտվելով մնալ այսքան սիրված թիմ երկրպագուների կողմից, և այսքան ցանկալի ուղղություն «ոսկե գնդակի» դափնեկիրների համար: Մնում է զուտ մեկ հարց՝ կհաջողվի՞ արդյոք սկսել ևս մի մեծ սիրո պատմություն…

Կարեն Ռաֆայելյան


Խուլեն Լոպետեգի. ««Ռեալը» պարտավոր է հաղթել բոլոր մրցաշարերում»

Հայտնի է, թե Կուրտուան երբ կարող է իր նորամուտը նշել «Ռեալի» կազմում

«Ռեալը» կադրային խնդիրներ կունենա «Ատլետիկոյի» հետ խաղից առաջ

AS. Լոպետեգին երկու ֆուտբոլիստի տրանսֆեր է պահանջել Ֆլորենտինո Պերեսից

Ալեգրի. «Ոչ ոք «Ռեալին» չի նվիրել Չեմպիոնների լիգայի 4 գավաթները, դրանք հաղթել է Ռոնալդուն»

Ալեգրի. «Հիմա «Յուվենտուսն» ավելի շատ է ձգտում Չեմպիոնների լիգայի գավաթին»

Գոլ 1-ին խաղում. Ռոնալդուն նորամուտը նշել է գոլով (տեսանյութ)

Մոդրիչի գործակալը հայտարարել է, որ իր հաճախորդին հետաքրքրել է «Ինտերի» առաջարկը

«Ռեալի» դարպասապահը որոշել է փոխել ակումբային գրանցումը

«Ռեալը» պատրաստվում է գերֆանտաստիկ առաջարկով դիմել «Չելսիին»

The Sun. «Ռեալը» Մոդրիչի փոխարինողին «Տոտենհեմում» է գտել

Կլոպ․ «Չեմ ուզում հաղթել ամեն գնով, ես Սերխիո Ռամոսը չեմ»

Բեռնաբեուի գավաթ. «Ռեալը» ուժեղ գտնվեց «Միլանից» (տեսանյութ)

AS. Մոդրիչը վերջնական որոշում է կայացրել

Ռոնալդուի տեղափոխությունից 1 ամիս անց. ինչպիսի աճ է գրանցել «Յուվենտուսը» սոցցանցերում

Կասանո. «Ռոնալդուն 40 գոլ կխփի Ա սերիայում, բայց Չեմպիոնների լիգան «Բարսելոնան» կհաղթի»