Լևոն Արոնյանը պայքարը կշարունակի քառորդ եզրափակչում

Ավարտվեց արագ շախմատի Skilling Open առցանց մրցաշարի նախնական փուլը, որի արդյունքներով 8 ուժեղագույն շախմատիստները նոկաուտ համակարգով կշարունակեն պայքարը գլխավոր մրցանակի համար:

Մրցումների 3-րդ օրը հաջող ելույթների շնորհիվ Լևոն Արոնյանը շտկեց մրցաշարային վիճակը և քառորդ եզրափակչի ուղեգիր նվաճեց:

Ավարտական 5 մրցախաղերում Լևոնը 4 միավոր վաստակեց: Արոնյանը հաղթեց Յան-Քշիշտոֆ Դուդային, Անիշ Գիրիին ու Սերգեյ Կարյակինին, հաշտություն կնքեց Դին Լիժենի և Հիկարու Նակամուրայի հետ:

Նախնական փուլում անցկացրած 15 մրցախաղերում վաստակած 8,5 միավորով Արոնյանը զբաղեցրեց 5-րդ հորիզոնականը: Նա ընդամենը կես միավորով հետ մնաց Մագնուս Կառլսենից և Հիկարու Նակամուրայից:

Այսօր կայանալիք քառորդ եզրափակչում Արոնյանը կմրցի Յան Նեպոմնյաշչնու հետ: Մրցախաղը բաղկացած կլինի արագ շախմատի 4 պարտիաներից: Հավասար արդյունքի դեպքում հաղթողը կորոշվի լրացուցիչ մրցախաղում:

Քառորդ եզրափակչի մյուս զույգերը կազմել են Մագնուս Կառլսենն ու Անիշ Գիրին, Ուեսլի Սոն և Թեյմուր Ռաջաբովը, Մաքսիմ Վաշիե-Լագրավն ու Հիկարու Նակամուրան:

Միացի՛ր հայկական ամենասպորտային Instagram-ին: