Մինասյանը ճիշտ էր․ «Արարատ-Արմենիան» տակտիկապես հաղթեց «Սաբուրթալոյին» - VNews
Բաժիններ

Մինասյանը ճիշտ էր․ «Արարատ-Արմենիան» տակտիկապես հաղթեց «Սաբուրթալոյին»

«Այսօր տակտիկապես ճիշտ ֆուտբոլ խաղացինք: Ցանկանում էինք հավասար խաղամակարդակ ցուցադրել առաջին ու երկրորդ խաղակեսերում, և մենք արեցինք դա: Դրա համար էլ հաղթեցինք»,- «Սաբուրթալո» – «Արարատ-Արմենիա» պատասխան հանդիպումից հետո ասաց Վարդան Մինասյանը: Փորձենք հասկանալ՝ ինչ բաղադրիչներ ուներ այդ «տակտիկապես ճիշտ ֆուտբոլը»:

Առաջինը, որ աչքի զարնեց, «Արարատ-Արմենիայի» տակտիկական սխեմայի փոփոխությունն էր: Վարդան Մինասյանը, որը շատ հազվադեպ է հրաժարվում 4-2-3-1 սխեմայից, այս անգամ ընտրել էր 4-1-4-1-ը, որը որոշակի հատվածներում վերաձևվում էր 4-3-3-ի: Պետրոս Ավետիսյանը մնացել էր պահեստայինների նստարանին, քանի որ հարկավոր էր միջին գծում ապահովել կոմպակտություն: Միակ հենակետային Ալֆոնսե Կասեի առջևից գործում էին Արմեն Համբարձումյանն ու Գոռ Մալաքյանը, որոնց համագործակցությունը բավականին բեղմնավոր ստացվեց:

Մինասյանը միշտ հայտարարում է, որ իր թիմում չկան հիմնական կազմի և պահեստային ֆուտբոլիստներ: Ըստ մարզչի՝ մեկնարկային կազմն ընտրելիս առավելապես հաշվի է առնվում մրցակցի խաղաոճի գործոնը: Եվ քանի որ «Սաբուրթալոն» հրաշալի է կարողանում վերահսկել գնդակը և միշտ ցանկանում է իշխել խաղադաշտի միջին հատվածում, ծայրահեղ կարևոր էր այդ գոտին հուսալի պահելը: Ավետիսյանն անգնահատելի ուժ է դիրքային ֆուտբոլի ժամանակ, սակայն «Արարատ-Արմենիան» այս մրցավեճում էլ նախատեսել էր գնդակի վերահսկողությունը զիջել մրցակցին:

Մեկնարկը չափազանց գոհացուցիչ էր: Ֆուրջել Նարսինգը, որի կոպիտ սխալից էր «Արարատ-Արմենիան» բաց թողել «Սաբուրթալոյի» հետ նախորդ հանդիպման երկրորդ գոլը, փայլուն անցում ձեռնարկեց և գնդակը հրամցրեց Անտոն Կոբյալկոյին: Այդ «գիշատիչ» հարձակվողը գործի դրեց «մարդասպանի բնազդն» ու բացեց հաշիվը: Իսկ հետո Հայաստանի չեմպիոնը որոշեց տեմպը պահել ու տարածություններից իսպառ զրկել մրցակցին: Մեր թիմն անչափ բարձր պրեսինգի էր դիմում: Գործի էր դրվել 4-1-4-1 սխեման: Երբ մրցակիցը հաղթահարում էր «առաջին պաշտպան» Կոբյալկոյի ճնշումը, «ռազմադաշտ էր ներխուժում» Լիմա-Համբարձումյան-Մալաքյան-Նարսինգ քառյակը, վերջինիս թիկունքում էլ տեղակայվել էր Կասեն:

Շատ կարևոր էր նաև այն, որ թիմային շարժումը հիանալի էր ստացվում: Առջևի գծի ֆուտբոլիստների պրեսինգին ժամանակին էին արձագանքում նաև պաշտպանական քառյակի անդամները, որոնք անմիջապես առաջ էին գալիս ու բարձրից տեղակայում հետին գիծը:

Ամեն դեպքում, մերթընդմերթ ազատ տարածություն էր առաջանում Համբարձումյանի և Մալաքյանի թիկունքում: «Սաբուրթալոյի» 1-2 ֆուտբոլիստ փորձում էր տեղ զբաղեցնել այդ հատվածում ու գնդակ ստանալ:

Բայց Վրաստանի չեմպիոնը շատ հաճախ դիմում էր երկար փոխանցումների օգնությանը, հիմնականում եզրերից բարձրից ուղղահայաց փոխանցումներ էին հետևում առաջ: Մրցակիցը, հաշվի առնելով նախորդ հանդիպման փորձը, ջանում էր կրկին ճնշում գործադրել մեր եզրերի վրա՝ հուսալով, որ այս անգամ նույնպես ճեղքեր կառաջանան այնտեղ:

Վարդան Մինասյանը հանդիպումից առաջ խոսել էր խաղակեսերի միջև ուժերը ճիշտ բաշխելու մասին: Եթե մեր թիմը շարունակեր նույն տեմպով պրեսինգի դիմել, ապա մինչ ընդմիջում արդեն մեծ էներգիա ծախսած կլիներ, և երկրորդ խաղակեսում ուժերը կարող էին դավաճանել: Ուստի «Արարատ-Արմենիան» ժամանակ առ ժամանակ ավելի խորքից՝ կիսադաշտից էր դիմավորում մրցակցին՝ առջևում թողնելով միայն Կոբյալկոյին: Եվ հայկական թիմն ամեն ինչ շատ հստակ ու բարձր կարգապահությամբ էր անում: Ֆուտբոլիստների համակարգված բաշխվածությունը թույլ էր տալիս համարյա բացառելու վտանգավոր գրոհներ բաց թողնելու հնարավորությունը:

Մի կարևոր հանգամանք ևս․ դեռ երևանյան հանդիպումից առաջ հարց էր ուղղվել Գեորգի Պաշովին, թե ինչպես է դիմակայելու իր եզրում գործող ագրեսիվ հարձակվողին: Մինասյանը թույլ չտվեց, որ ֆուտբոլիստը պատասխանի՝ գաղտնիքները չբացահայտելու համար: Մտահղացումը կիրառվեց թե՛ առաջին, թե՛ պատասխան մրցավեճերի ժամանակ: Բայց այն ավելի արդյունավետ էր հենց Վրաստանում կայացած խաղում: Բանն այն է, որ Պաշովը բավականին բարձրից էր դիմավորում եզրային ֆուտբոլիստին, դեպքերի մեծամասնությունում՝ հենց մրցակցի կիսադաշտում: Բուլղարացուն այդ դեպքերում ապահովագրում էր կենտրոնական պաշտպան Անժելո Մենեզեսը, որը ստիպված էր լինում հասնել մինչև կիսադաշտ ու փակել մեկ այլ մրցակցի:

Հիշենք, թե «Արարատ-Արմենիան» ինչպես էր պաշտպանվում երևանյան խաղի ժամանակ: Այդ դեպքում օգտագործվում էր 4-4-2 սխեման, Ավետիսյանն ու Կոբյալկոն գործում էին առջևում: Բայց տարբերությունն այն էր, որ, ի տարբերություն աջ եզրային Նարսինգի, ձախ եզրային Լիման շատ մոտ էր գործում պաշտպանությանը՝ օգնելով Ռոժդի Աշենտեին: Առաջին խաղակեսում դա շատ լավ աշխատեց, սակայն ընդմիջումից հետո եղան անհատական սխալներ 2 եզրում էլ, ու ամեն ինչ «փլուզվեց»:

Մրցակիցն առաջին խաղակեսում ստեղծեց մի քանի վտանգավոր պահ, սակայն դրանցից երևի թե միայն մեկն էր իրապես սպառնալից: Առաջին 45 րոպեների խնդիրը կատարվեց: Սակայն 1-0 հաշվով հաղթանակը մեր թիմին չէր բավարարում: Հարկավոր էր ևս 1 գոլ խփել, բայց միաժամանակ անառիկ պահել սեփական դարպասը: Մինասյանն ընդմիջմանը փոխեց սխեման, ու թիմն արդեն պաշտպանվում էր 4-4-1-1 սխեմայով: Մալաքյանը նահանջել էր ու տեղ զբաղեցրել Կասեի կողքին, իսկ Համբարձումյանը մնացել էր Կոբյալկոյի թիկունքում:

Հիմա արդեն եկել էր Ավետիսյանի՝ խաղադաշտ դուրս գալու ժամանակը: Հարկավոր էր ավելի մեծ սրություն ապահովել առջևի գծում, փորձել վերադարձնելու գնդակի վերահսկողությունը, բայց «Արարատ-Արմենիան» շարունակելու էր ծայրահեղ ուշադիր խաղալ նաև պաշտպանությունում:

Մալաքյանին իրավիճակներից մեկում թվաց, թե մրցակիցն արդեն շրջանցել է Նարսինգին, թեև վերջինս վերահսկում էր նրա տեղաշարժը: Հայ ֆուտբոլիստն ընդառաջ դուրս եկավ, մրցակցի փոխանցումն անցավ, իսկ Մալաքյանի խաղային գոտին դատարկ մնաց: Գնդակն ընդունած խաղացողը վտանգավոր գրոհ զարգացրեց ու վաստակեց տուգանայինի իրավունք, երբ արդեն մտնում էր տուգանային հրապարակ:

Այդուհանդերձ, սա Մալաքյանի քիչ թերացումներից էր այս դիմակայությունում: Նա թե՛ Հայաստանում, թե՛ Վրաստանում կայացած հանդիպումներում խաղաց վստահ ու կատարեց իր առջև դրված խնդիրը:

«Արարատ-Արմենիան» ինտենսիվ ճնշում էր մրցակցին: Նրանից նախաձեռնությունը խլելը գործնականում չէր ստացվում, բայց ամենակարևորն այն էր, որ առկա էին առաջին խաղակեսի ռիթմն ու ամուր կապը խաղային գոտիների միջև: Հետո եղավ կոպտագույն սխալ «Սաբուրթալոյի» կողմից, երբ վրացական թիմի ֆուտբոլիստը գնդակը մեր կիսադաշտից ուղարկեց սեփական կիսադաշտ: Լիման հարվածային դիրք դուրս բերեց Կոբյալկոյին, 11-մետրանոց, Ավետիսյանը դիպուկ հարվածեց ու հաշիվը դարձրեց 2-0: Իդեալական սցենար՝ մեր թիմի համար:

«Արարատ-Արմենիան» խփած գոլից հետո վերադարձավ իր համար ավելի ավանդական՝ պաշտպանվելիս կիրառվող 4-4-2 սխեմային: Սկսեցին մրցակցին դիմավորել համարյա կիսադաշտից, մի խոսքով՝ աշխատում էին հնարավորինս հազվադեպ ռիսկի դիմել:

Մինասյանը թարմություն «ներարկեց» միջին գծին՝ Մալաքյանի փոխարեն խաղադաշտ մտցնելով Իլյա Անտոնովին: Չնայած մրցակիցը հատկապես վերջնամասում շատ լավ հնարավորություն ունեցավ գրավելու Հայաստանի չեմպիոնի դարպասը, մեր թիմի խաղային համակարգը գործեց համարյա առանց սխալների:

«Արարատ-Արմենիայի» կազմում վերջնամասում փոխարինման մտավ նաև հինգերորդ պաշտպանը՝ Ալեքսանդր Դամչևսկին:

Հաջողվեց պահպանել հաղթական հաշիվն ու պատմություն կերտել:

  • Այս հանդիպումն ապացուցեց, որ երևանյան պարտությունն իրականում ոչ թե մրցակցի շատ զորեղ լինելու, այլ «Արարատ-Արմենիայի» ընձեռած շանսերի հետևանքն էր: Երևանյան մրցավեճի երկրորդ խաղակեսում զգացվեց հոգնածության ու անհատական սխալների գործոնը, որոնցից էլ օգտվեց մրցակիցը: Մինասյանն այս անգամ հավասար էր բաշխել ուժերը խաղակեսերի միջև, և ամեն ինչ հարթ ընթացավ:
  • Մեր թիմն ուղղակի չէր կարող ավելի հարմար պահ գտնել երկրորդ գոլը խփելու համար: Եթե գոլն ուշանար, «Արարատ-Արմենիան» ուզած-չուզած բացվելու էր, և դա հղի էր լինելու մեծ վտանգներով: Իսկ արդեն կյանքի կոչված սցենարի հեղինակին հատուկ շնորհակալություն ենք հայտնում:
  • Չնայած տպավորիչ հաղթանակին՝ «Արարատ-Արմենիան» շարունակում է լուրջ խնդիրներ ունենալ դիրքային գրոհներ կազմակերպելիս: Դա նկատելի է նույնիսկ Բարձրագույն խմբի առաջնության խաղերում: Երբ մրցակիցը նրան հոժարակամ զիջում է գնդակը, «Արարատ-Արմենիան» ցույց չի տալիս իր լավագույն կողմերը, դրա համար էլ Մինասյանը հազվադեպ է փոխում մարտավարությունը: Թիմը պայմանական «Նոայի» հետ հանդիպմանը, երբ հաշիվը դարձնում է 1-0, ոչ թե փորձում է նույն տեմպով ճնշել մրցակցին, այլ հետ քաշվել և հակագրոհել:
  • Հենց այդ խնդիրն է պատճառը, որ թիմը չափից դուրս շատ է կիրառում երկար փոխանցումները Կոբյալկոյի ուղղությամբ: Մտահղացումն այն է, որ ռուս հարձակվողը հաղթի մենապայքարում և գնդակը փոխանցի եզրայիններից մեկին, որն էլ զարգացնի գրոհը: Սակայն գրոհները հիմնականում այդպես կառուցելը պարզունակ լուծում է չեմպիոնի համար: Տվյալ դեպքերում խաղն աշխատում են իրենց վրա վերցնել Ավետիսյանն ու Կասեն, որոնք գնդակի հետ վարվելու լավ կուլտուրա ունեն: Մինասյանը խորքից պաշտպանվող թիմերի հետ հանդիպումներում հենակետային գոտում միշտ հիմնական կազմում է ընդգրկում նաև Համբարձումյանին, որը լավ է տեսնում խաղադաշտն ու անհրաժեշտ պահին փոխում գրոհի ուղղությունը:
  • Հերթական անզուգական խաղն անցկացրեց կենտրոնական պաշտպան Դմիտրի Գուզը: Նա հաղթեց բոլոր մենապայքարներում, որոնց մասնակցել էր: Եզրերից հետևող սուր փոխանցումներին արձագանքում էր ռեակտիվ արագությամբ: Նա դեռ նախորդ մրցաշրջանից ուղղակի անհավանական ֆուտբոլ է ցուցադրում, և կարելի է պնդել, որ Հայաստանի Բարձրագույն խմբի լավագույն կենտրոնական պաշտպանն է այս պահին:
  • Եթե պաշտպանության առաջատարը Գուզն է, ապա միջին գծում նույն գործառույթը կատարում է Կասեն: Համոզված կարելի է ասել՝ նա այսօր անփոխարինելի ֆուտբոլիստ է «Արարատ-Արմենիայի» համար: Կոջոն, ինչպես իրեն հարգող ցանկացած հենակետային, հանդիսանում է թիմի «ողնաշարը» և գուցե որոշ չափով աննկատ, բայց հսկայածավալ աշխատանք է կատարում: Այդ ֆուտբոլիստը ցանկացած պահի կարող է փոխել խաղի ռիթմը, ճիշտ դադար պահել, «կարդալ» խաղադաշտում տեղի ունեցողն այնպես, ինչպես «Արարատ-Արմենիայում» ուրիշ ոչ ոք չի կարող:
  • Դե իսկ հարձակման գծում Կոբյալկոն «անմարդկային» արդյունավետություն է ցույց տալիս: Այն, որ նա բարձրակարգ գոլահար է, չի քննարկվում, բացի այդ՝ ճիշտ դիրք ընտրել գիտի, լավ մենապայքարներ է մղում ու ապակողմնորոշում պաշտպաններին: Բայց այստեղ կա նաև հոգեբանական կողմը: Երբ նա խաղադաշտում է, թիմի մարտական ոգին բացահայտորեն բարձրանում է:
  • Առջևում «Դյուդելանժի» հետ դիմակայությունն է: «Արարատ-Արմենիան» անցանելի մրցակից է ստացել, որի հետ, բնականաբար, հեշտ չի լինելու, բայց նաև իրատեսական է նրա արգելքը հաղթահարելը: Մինասյանը Հայաստանի հավաքականի հետ միասին ժամանակին, կարելի է ասել, 1 քայլով հետ մնաց բոլորիս բաղձալի երազանքից՝ մեծ մրցաշարի եզրափակիչ փուլից: Հիմա «Արարատ-Արմենիային» Եվրոպա լիգայի խմբային փուլից բաժանում է այդ 1 քայլը, ուստի հայ մասնագետն այս անգամ սխալվելու իրավունք չունի:

Միացի՛ր հայկական ամենասպորտային Instagram-ին:


Ովքեր են հայկական ֆուտբոլի տիտղոսակիր մարզիչները

Թվեք Ֆուտբոլի Հայաստանի առաջնության մասնակից բոլոր թիմերը՝ 1992 թվականից սկսած. VNews-ի Quiz-ը

Օգանան ընդամենը 9 ամսական էր, երբ Կասպարովը նորամուտը նշեց ՀՀ գավաթի մրցաշարում

Արմեն Պետրոսյան․ «Լավ կպատրաստվենք երկրորդ խաղին․ պայքարելու ենք մինչև վերջ» (տեսանյութ)

Վարդան Մինասյան․ «Այսօր ստեղծած գոլային պահերի քանակը կբավականացներ մի քանի հանդիպման համար» (տեսանյութ)

Օգանայի գոլն օգնեց «Արարատ-Արմենիային» հաղթելու «Գանձասար-Կապանին» (տեսանյութ)

VBet Հայաստանի գավաթ. «Արարատ-Արմենիա»- «Գանձասար-Կապան» (ուղիղ եթեր)

Բարձրագույն խմբի 17-րդ տուրի խորհրդանշական հավաքականը և լավագույն ֆուտբոլիստը

VBet Հայաստանի գավաթում սկսվում է վճռական փուլը․ Կիսաեզրափակիչ խաղերին ընդառաջ

Մինասյանը և Բիչախչյանը հետաքրքիր լուծումներ առաջարկեցին միմյանց․ ինչը դարձավ վճռորոշ նրանց թիմերի դիմակայությունում

«Արարատ-Արմենիան» ընթանում է նախորդ տարվա չեմպիոնական գրաֆիկի զգալի գերազանցմամբ

«Մեր բախտը փոքր-ինչ չբերեց, որ մեկ խմբում հայտնվեցինք կովկասյան հավաքականների հետ»․ Իլյա Անտոնով

Վարդան Բիչախչյան․ «Կար զգացողություն՝ որ թիմն առաջինն իր պահերից մեկն օգտագործեր, նա էլ հաղթելու էր» (տեսանյութ)

Վարդան Մինասյան․ «Հավասար հանդիպում էր, ուղղակի մենք իրացրինք մեր գոլային պահը» (տեսանյութ)

Մեկ գոլը որոշիչ եղավ «Արարատ-Արմենիա» – «Շիրակ» խաղում, «Նոան» վճռորոշ մրցավեճում հաղթեց «Փյունիկին» (տեսանյութ)

«Արարատ-Արմենիա» – «Շիրակ»․ Մեկնարկային կազմեր, ուղիղ հեռարձակում (տեսանյութ)