Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․ - VNews
    • Լրահոս + Vnews

      Նորություններ Հայաստանից և աշխարհից

Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

94519388 2762558140528753 6970124814895808512 n - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

Կորոնավիրուսի համավարակի պատճառով հայ ժողովուրդն այս տարի յուրօրինակ է հարգանքի տուրք մատուցում Հայոց ցեղասպանության զոհերի հիշատակին։

Այսօր՝ ապրիլի 24-ին, առավոտյան 8-ից սկսած յուրաքանչյուրը կարող է իր և հարազատների անուններով հաղորդագրություններ ուղարկել 1915 կարճ համարին՝ ապահովելով յուրաքանչյուրիս խորհրդանշական մասնակցությունը Հայոց ցեղասպանության նահատակների ոգեկոչման միասնական արարողությանը: Արտերկրից պետք է ուղարկել 0037433191500 համարին:

94700137 3069798513099458 5505031201586413568 o 960x640 - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

Ուղարկված անունները երեկոյան լուսային էֆեկտով կարտացոլվեն Ծիծեռնակաբերդի հուշահամալիրի պատերին։ Յուրաքանչյուր հեռախոսահամարից հնարավոր է ուղարկել 5 անուն-ազգանուն: 1915 կարճ համարից կարող են հաղորդագրություն ուղարկել Հայաստանում և Արցախում գտնվողները: Մեկ հաղորդագրության արժեքը մեկ դրամ է:

Անվտանգության և կազմակերպչական նկատառումներից ելնելով՝ ոստիկանությունը մինչև ապրիլի 25-ի երեկո փակելու է դեպի Ծիծեռնակաբերդ մուտքը: Այսօր կառավարությունը բոլորի անունից 105000 ծաղիկ կդնի Հայոց ցեղասպանության զոհերի հիշատակին՝ Ծիծեռնակարբերդի հուշահամալիրում։

94708411 3032947533394957 5523040046703181824 o 960x640 - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

Ծիծեռնակաբերդում 11 ժամ տևողությամբ համերգային ծրագիր  կլինի (մոտ 60 ելույթ, շուրջ 160 մասնակից), որի ընթացքում խստորեն կպահպանվեն անվտանգության կանոնները։ Մասնակիցները միաժամանակ չեն լինելու Ծիծեռնակաբերդում, այլ փոխարինելու են իրար (առավելագույնը 5 անձ՝ բացօթյա միջավայրում)։ Ելույթ են ունենալու սիմֆոնիկ, ֆիլհարմոնիկ նվագախմբերը, Կամերային երաժշտության ազգային կենտրոնն իր երգչախմբերով ու նվագախմբերով, լարային քառյակներ, ճանաչված օպերային երգիչներ և այլք։ Ամբողջ ծրագիրը լինելու է բազմաժանր՝ սկսած ժողովրդական երաժշտությունից մինչև միջնադարյան երաժշտության ջազային մշակում։

Ցեղասպանության զոհերի հիշատակի միջոցառումները սկսվեցին երեկ։ Ապրիլի 23- ին՝ ժամը 21։00–ին, սկսեցին ղողանջել բոլոր եկեղեցիների զանգերը, որոնց ներքո մարեցին Երևանի և մարզկենտրոնների փողոցների լույսերը։  Մարդիկ մարեցին իրենց  բնակարանների լույսերը, և մոմերի, բջջային հեռախոսների լույսերով պատուհաններից խորհրդանշեցին միասնական ներկայությունն անմար կրակի շուրջ։

Վարչապետ Նիկոլ Փաշինյանը Facebook–ում տեսանյութ  հրապարակեց։

«Լուսավառ ոգեկոչման րոպեն Ծիծեռնակաբերդում»,– գրեց նա։

Տերմին, որից խորշում է Թուրքիան

Ցեղասպանություն տերմինը 1944թ. շրջանառության մեջ է դրել հրեական ծագումով լեհ իրավաբան, պրոֆեսոր Ռաֆայել Լեմկինը: Լեմկինի ընտանիքը հրեական Հոլոքոսթի զոհերից էր, եւ այս տերմինով նա ցանկանում էր նկարագրել ու սահմանել սպանությունների ու բռնությունների նացիստական համակարգված քաղաքականությունը, ինչպես նաեւ 1915թ. Օսմանյան կայսրությունում հայերի դեմ իրագործված վայրագությունները:

p36arm1AP 960x720 - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

1948թ. դեկտեմբերի 9-ին Միավորված ազգերի կազմակերպությունն ընդունեց «Ցեղասպանության հանցագործության կանխման եւ դրա համար պատժի մասին» կոնվենցիան, ըստ որի ցեղասպանությունը սահմանվում է որպես միջազգային հանցագործություն եւ ստորագրող պետությունները պարտավորվում են կանխել, ինչպես նաեւ պատժել ցեղասպանություն իրականացնողներին:

Օսմանյան կայսրությունում Առաջին համաշխարհային պատերազմի տարիներին իրագործված հայ բնակչության կոտորածներն անվանում են Հայոց ցեղասպանություն: Այդ կոտորածներն իրագործեց երիտթուրքական կառավարությունը՝ Օսմանյան կայսրության տարբեր շրջաններում:

hqdefault - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

Միջազգային առաջին արձագանքն այդ իրադարձություններին 1915թ. մայիսի 24-ի Ֆրանսիայի, Ռուսաստանի եւ Մեծ Բրիտանիայի համատեղ հայտարարությունն էր, որտեղ հայ ժողովրդի նկատմամբ կատարված բռնությունները բնորոշվեցին որպես «հանցագործություն մարդկության եւ քաղաքակրթության դեմ»: Կողմերը կատարված հանցագործության համար պատասխանատու էին համարում թուրքական կառավարությանը:

Ինչպես սկսվեց

Առաջին համաշխարհային պատերազմում երիտթուրքական կառավարությունը, ջանալով պահպանել թուլացած Օսմանյան կայսրության մնացորդները, որդեգրեց պանթուրքիզմի քաղաքականությունը, այն է, հսկայածավալ Թուրքական կայսրության ստեղծումը, որը պետք է տարածվեր մինչեւ Չինաստան, իր մեջ ներառելով Կովկասի, Միջին Ասիայի բոլոր թյուրքալեզու ժողովուրդներին: Ծրագիրը նախատեսում էր բոլոր ազգային փոքրամասնությունների թյուրքացում: Հայ բնակչությունը դիտվում էր որպես գլխավոր խոչընդոտ այս ծրագրի իրականացման ճանապարհին:

Hunchakian gallows 960x688 - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

Թերեւս, Հայոց ցեղասպանությունը ծրագրաված էր դեռ 1911-12 թթ., սակայն երիտթուրքերը որպես հարմար առիթ օգտագործեցին Առաջին համաշխարհային պատերազմի սկիզբը` այն իրագործելու համար:

Թվեր, որոնք դառը ճակատագրեր են

Առաջին համաշխարհային պատերազմի նախօրեին Օսմանյան կայսրությունում ապրում էին երկու միլիոնից ավելի հայեր: մոտ մեկուկես միլիոն հայ սպանվեց 1915-1923թթ. ժամանակահատվածում, իսկ մնացածները` բռնի մահմեդականացվեցին կամ ապաստանեցին աշխարհի տարբեր երկրներում:

1915թ. ապրիլի 24-ին սկիզբ առած ձերբակալություններով (հիմնականում Օսմանյան կայսրության մայրաքաղաք Կոստանդնուպոլսում) եւ դրան հետեւած հարյուրավոր հայ մտավորականների ոչնչացումով՝ սկսվեց հայ բնակչության բնաջնջման առաջին փուլը: Հետագայում աշխարհասփյուռ հայերը ապրիլի 24-ը սկսեցին նշել որպես Հայոց ցեղասպանության զոհերի հիշատակի օր:

ցեղդապանություն - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

Հայոց ցեղասպանության իրագործման երկրորդ փուլը մոտ 60000 հայ տղամարդկանց զորակոչն էր թուրքական բանակ, որոնք հետագայում զինաթափվեցին ու սպանվեցին իրենց թուրք զինակիցների կողմից:

Ցեղասպանության երրորդ փուլը նշանավորվեց կանանց, երեխաների, ծերերի ջարդով ու տեղահանությամբ դեպի Սիրիական անապատ: Տեղահանության ընթացքում հարյուր հազարավոր մարդիկ սպանվեցին թուրք զինվորների, ոստիկանների, քրդական ու չերքեզական ավազակախմբերի կողմից: Շատերը մահացան սովից ու համաճարակային հիվանդություններից: Հազարավոր կանայք ու երեխաներ ենթարկվեցին բռնության: Տասնյակ հազարավոր հայեր բռնի մահմեդականացվեցին:

altinay 468w - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․

Վերջապես, Հայոց ցեղասպանության վերջին փուլը մասսայական տեղահանությունների եւ հայ ազգի դեմ իր իսկ հայրենիքում իրագործած զանգվածային բնաջնջումների բացարձակ ժխտումն է թուրքական կառավարության կողմից: Չնայած Հայոց ցեղասպանության միջազգային ճանաչման շարունակական գործընթացին` Թուրքիան ամեն կերպ պայքարում է Հայոց ցեղասպանության ճանաչման դեմ:

Նրանք ընդունեցին, որ չկրկնվի

Հայոց ցեղասպանությունը ճանաչել են շատ պետություններ և միջազգային կազմակերպություններ։ Պաշտոնապես առաջինն ընդունել է Ուրուգվայը՝ 1965 թվականին։ Հայ ժողովրդի կոտորածը պաշտոնապես դատապարտել և ճանաչել են որպես ցեղասպանություն 34 երկիր` 2019թ. նոյեմբերի դրությամբ։ Ըստ միջազգային իրավունքի Հայոց ցեղասպանությունը ճանաչած երկրների և կազմակերպությունների ցանկը՝ հետևյալ հղումեվ․ https://www.mfa.am/hy/recognition/։

TheArmenainGenocide 960x738 - Մեր միտքը, սիրտը, հոգին այնտեղ են՝ Ծիծեռնակաբերդում․ ապրիլի 24- ն է․․․