Երևանի պատմամշակութային շենքերից մեկի ճակատային մասում ապօրինի աշխատանքները դադարեցվել են

Երևանի Տիգրան Մեծի պողոտայի վրա՝ Հանրապետության հրապարակի հարևանությամբ գտնվող պատմամշակութային արժեք ներկայացնող շենքի ճակատի վրա սեփականատիրոջ կողմից իրականացվող աշխատանքները եղել են ապօրինի։ Այդ մասին «Ֆեյսբուք»-ի իր էջում գրել է Երևանի քաղաքապետի մամուլի խոսնակ Հակոբ Կարապետյանը։

«Շենքի վրա տեղադրվել է շվաքարան և փորձ է արվել ներկել ճակատը՝ առանց համապատասխան թույլտվության: Քաղաքապետարանի քաղաքաշինության և հողի վերահսկողության վարչության աշխատակիցները տեղում վարչական ակտ են կազմել՝ պարտավորեցնելով դադարեցնել աշխատանքները և հանել շվաքարանը: Յուրաքանչյուր վերակառուցում, լինի պատուհանների փոխում, շվաքարանի տեղադրում, օդորակչի տեղադրում և այլն, պետք է իրականացվի ԿԳՄՍ համապատասխան ստորաբաժանման եզրակացության հիման վրա և Երևանի քաղաքապետարանի թույլտվությամբ»,- գրել է Երևանի քաղաքապետի մամուլի խոսնակը և հավելել, որ օրենսդրության պահանջների հետագա անտեսումը կարող է քրեական պատասխանատվություն առաջացնել:

Կարապետյանը շնորհակալություն է հայտնել Տիգրան Գալստյանին՝ խնդրի վրա ուշադրություն հրավիրելու համար: